2 Timoteo 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye Paũlo, omukwenda wa Kristo Yesu omwʼisonda lya Nyamuhanga, natumawa erĩkanganĩa engebe eyalagawa busana nʼabandu ababirimatikana na Kristo Yesu.

² Ngakusakira uwe Tĩmoteo, mugala wage mwanze: Olukogo, nʼeriganyira, nʼobuholo, bibye ukʼuwe bĩkalũa uku Nyamuhanga Tata, na Kristo Yesu Omukama wetu.

Ewasĩngya nʼerihanda omutima

³ Ngaha Nyamuhanga oyo ngakolera yo wasĩngya, omo bunya-mutima obute mwʼebibi, ngoko aboso-kulu wage bakola. Kandi ngamuha ewasĩngya omugulu ngakwibuka ebiro byosĩ omwʼisaba lyage, omo kiro nʼomwʼitungi.

⁴ Namibuka emĩsonĩa yawe, kandi nyĩkwĩre olukando lwʼerikulolako, obutseme bwage buosũle.

⁵ Neryo ngibuka erĩkĩrĩrya lyawe lyʼekwenene; ngʼeryo mukaka wawe Loĩsĩ na koyo wawe Eũnĩkĩ babya bawite. Kandi nawe nyasĩ uwiteryo nibya.

⁶ Busana nʼomwatsi oyũ, Ngakwĩbũkaya nyiti, Ũtegaye olũsũnzo olo Nyamuhanga akuha omugulu nakũhĩra kwʼebyala.

⁷ Kusangwa Omũlĩmũ ogo Nyamuhanga abirituha Sialireka tukubaha; nĩkwa Omũlĩmũ wuwe akatũsũlaya omo bũtokĩ nʼolwanzo, nʼerĩyĩteya.

⁸ Neryo subye nʼesĩsonĩ erĩtũla omwatsi busana nʼOmukama wetu; kandi subye nʼesĩsonĩ busana nage ĩngye mundu wʼomũlĩkĩ wuwe. Nĩkwa usangire nage omo malĩge busana nʼEngulu Yowene omo maka ago Nyamuhanga akakuha.

⁹ Iye abĩrĩtũlamya nʼeritubirikira eribya bahigulwa buwe-buwe. Mwatakola atya busana nʼemikolere yetu, nĩkwa busana nʼerĩyĩsũnza liwe nʼolukogo luwe. Kandi mwatuha olukogo olũ omwisi wa Kristo Yesu embere wʼerĩtsũka lyʼemigulu.

¹⁰ Nĩkwa lino lwabĩrĩtũbĩsũlĩrwa omwʼibutuka lyʼOmũlamya wetu Kristo Yesu. Kusangwa Kristo abiribuga amaka wʼoluholo, kandi abĩrĩmĩnyĩkalya engebe nʼeritindahola omo Ngulu Yowene.

¹¹ Nyamuhanga abĩrĩnyĩhĩra erĩtũla Engulu Yowene nʼeribya mukwenda nʼOmũkangĩrĩrya.

¹² Busana nʼomwatsi oyũ, ngagalawa omo myatsi eyo. Nĩkwa sĩnyĩkwĩre esĩsonĩ, kusangwa nyĩnasĩ oyo nabĩrĩkĩrĩrya, kandi nyĩnasĩ ndeke kwʼakatoka erĩteya ebyo abĩrĩhĩra omo byala byage erĩhĩka oko kiro ekyo.

¹³ Uhambe ndeke ebĩnywa byʼekwenene ebyo nakũ kangĩrĩraya, ebikakuha olulengo lwʼerikwama. Wĩkale omwʼĩkĩrĩrya nʼolwanzo ebikabya byetu busana nʼerimatikana na Kristo Yesu.

¹⁴ Ũtegaye emyatsi mibuya eyo wabirihabwa, omo maka wʼOmũlĩmũ Abũyĩrĩre oyo wĩkere omwisi wetu.

¹⁵ Kandi ũnasĩ ngoko abosĩ abali omo kihugo kyʼeAsĩa babirinyitswako, haguma na Fĩgelo na Hermogene.

¹⁶ Omukama aganyire enyũmba ya Onesĩforo, kusangwa esyongendo nyingi ĩnĩakanyĩsĩkaya omutima. Kandi mwatabya nʼesĩsonĩ busana nʼamahulula wage omo nyũmba yʼomũlĩkĩ.

¹⁷ Nĩkwa ekiro ahĩka eRoma mwanyisonda-sonda kutsibu, neryo mwanyibana.

¹⁸ Omukama amuhe eribana eriganyira lyʼomukama oko kiro ekyo. Kandi ũnasĩ ndeke ebyosĩ anyikolera eEfeso.