2 Samwelĩ 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akaganyira Mefĩbosetĩ

¹ Neryo Dawĩdĩ mwabũga ati, Ko hakĩnasĩgalĩre muguma omo kĩtũnga kya Saũlo, nyitoke erimukolera ekibuya busana na Yonatana kwehĩ?

² Neryo habya omugombe wʼenyũmba ya Saũlo erĩna liwe iyo Zĩba, neryo mobamubirikira eyiri Dawĩdĩ; nʼomwami mwamũbũlya ati, Uwe Zĩba kwehĩ? Naye mwabũga ati, Ĩngye indi mugombe wawe.

³ Nʼomwami mwabũga ati, Ko sihakiri nʼomuguma wʼomo kĩtũnga kya Saũlo, nyitoke erimukolera ekibuya kya Nyamuhanga kwehĩ? Neryo Zĩba mwabwira omwami ati, Yonatana akinawite mugala, oyũlehemĩre kwʼebisando.

⁴ Nʼomwami mwamũbũlya ati, Ali hahi kwehĩ? Na Zĩba mwabwira omwami ati, Lebaya, ali omo nyũmba ya Makĩrĩ mugala wa Amĩelĩ, eLodĩbarĩ.

⁵ Neryo omwami Dawĩdĩ mwamutumirako mobamũlũsya omo nyũmba ya Makĩrĩ mugala wa Amĩelĩ eLodĩbarĩ.

⁶ Na Mefĩbosetĩ, mugala wa Yonatana, mugala wa Saũlo, mwahĩka eyiri Dawĩdĩ, mwatũlama, mwamũnamira ahisi. Neryo Dawĩdĩ mwabũga ati, Mefĩbosetĩ. Naye mwasũbĩrya ati, Omugombe wawe yono!

⁷ Na Dawĩdĩ mwamubwira ati, Sigubahe; kusangwa kwenene ngandĩkũkangya ekibuya busana na Yonatana tata wawe, kandi ngandĩkũsũbũlĩrya esyombibi syosĩ sya Saũlo tata wawe kandi wasyalira akalyo oko mesa yage obutusa.

⁸ Kandi Mefĩbosetĩ mwamũnamira ahisi, mwabũga ati, Ko mugombe wawe ni wahi, uti ukasamalira embwa ĩholĩre nga ngye ko nyiri.

⁹ Neryo omwami mwabirikira Zĩba, omugombe wa Saũlo, mwamubwira ati, Ebyosĩ ebyabya bya Saũlo nʼebyʼekĩtũnga kiwe nabirihabyo uku mwitsikulu wʼomukama wawe.

¹⁰ Nawe wasyamulimira amalima, uwe, nʼabagala bawe, nʼabagombe bawe; kandi wasyahulula emyaka eyo, omugala wʼomukama wawe abane akʼerirya; nĩkwa Mefĩbosetĩ mugala wʼomukama wawe asyalira oko mesa yage emigulu yosĩ. Nĩkwa Zĩba abya nʼabagala ĩkũmĩ nʼabatanu nʼabagombe makũmĩ abiri.

¹¹ Neryo Zĩba mwabwira omwami ati, Ngʼebyosĩ ebyo mukama wage omwami abirihana omugombe wuwe, omugombe wawe asyakolabyo atya. Nĩkwa Mefĩbosetĩ mwalira oko mesa ya Dawĩdĩ ngʼomuguma gʼoko bagala bʼomwami.

¹² Na Mefĩbosetĩ abya awite mugala mulere, erĩna liwe iyo Mĩka. Nʼabosĩ abĩkala omo nyũmba ya Zĩba babya bagombe ba Mefĩbosetĩ.

¹³ Neryo Mefĩbosetĩ mwĩkala eYerũsalema yʼatya; kusangwa abya akalira oko mesa yʼOmwami emigulu yosĩ. Kandi abya alehemĩre kwʼebisando bibiri byosĩ.