2 Samwelĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Amalwa wa Dawĩdĩ

¹ Kandi enyũma wʼaho, Dawĩdĩ mwaswĩrya Abafĩlĩstĩnĩ, kandi mwakĩndabo; na Dawĩdĩ mwĩmya obũsondolĩ bʼomũyĩ mukulu erĩlũsyabo omo byala byʼAbafĩlĩstĩnĩ.

² Kandi mwaswĩrya eMoabũ, neryo mwalengabo omo lukoba, erilambikabo ahisi oko kitaka; kandi mwagababo mo milondo ĩbĩrĩ owʼerĩkwa nʼowatendĩkwa. NʼAbanya Moabũ mobabya bagombe ba Dawĩdĩ, ibakaleta omuhako.

³ Neryo Dawĩdĩ mwakĩnda Hadadezerĩ mugala wa Rehobĩ, omwami wʼeZoba, omugulu ayasũbaya obutabale buwe kandi bʼoko Lũsĩ.

⁴ Kandi Dawĩdĩ mwamusagula abakagendaya esyosabayĩrĩ elfu nguma nʼamagana alinda (1,700), nʼabasĩrĩkanĩ abakagenda omo bisando, elfu makũmĩ abiri (20,000); neryo Dawĩdĩ mwabandanga ebitego byʼesyosabayĩrĩ syosĩ syʼesyogalĩ, nĩkwa mwabika esyosabayĩrĩ busana nʼesyogalĩ erĩgana.

⁵ Nʼomugulu Abanya Sũrĩa bʼeDamaseke, basyawatĩkaya Hadadezerĩ omwami wʼeZoba, Dawĩdĩ mwĩta oko Basũrĩa ko bandu elfu makũmĩ abiri nʼĩbĩrĩ (22,000).

⁶ Neryo Dawĩdĩ mwahĩra abateya omo Sũrĩa yʼeDamaseke; nʼAbasũrĩa mobabya bagombe ba Dawĩdĩ, mobahaka omuhako. NʼOmwami Mukulu mwakĩndĩsya Dawĩdĩ ehosĩ aya.

⁷ Kandi Dawĩdĩ mwĩmya esyongabo syʼesyamagetsi esyabya oko bagombe ba Hadadezerĩ, mwaletasyo eYerũsalema.

⁸ Kandi omwami Dawĩdĩ mwĩmya emiringa mingi eBeta nʼeBerotaĩ, emĩyĩ ya Hadadezerĩ.

⁹ Kandi omugulu Toĩ omwami wʼeHamatĩ owa ko Dawĩdĩ abĩrĩkĩnda omulondo gosĩ wa Hadadezerĩ,

¹⁰ Toĩ mwatuma Yoramũ mugala wuwe eyiri omwami Dawĩdĩ, erĩmũbũkya, nʼerimutsumula, kusangwa mwalwa na Hadadezerĩ nʼerĩmũkĩnda; kusangwa Hadadezerĩ abya akalwa na Toĩ. Neryo Yoramũ mwaleta ebindu byʼebĩtsĩpa, nʼebindu byʼesyamagetsi nʼebindu byʼemiringa.

¹¹ Omwami Dawĩdĩ mwasololerabyo Omwami Mukulu, haguma nʼebĩtsĩpa nʼesyamagetsi ebyo asolola erĩlũa oko bihanda byosĩ ebyo akĩnda;

¹² ebya Sũrĩa, nʼebya Moabũ, nʼebyʼabana ba Amonĩ, nʼebyʼAbafĩlĩstĩnĩ, ebya Amaleke, nʼoko minyego ya Hadadezerĩ, mugala wa Rehobũ, omwami wʼeZoba.

¹³ Na Dawĩdĩ mwayibanira erĩna omugulu asubula erĩĩta Abasũrĩa elfu ĩkũmĩ nʼomunani (18,000) omo Musya wʼOmũnyũ.

¹⁴ Kandi mwahĩra abasĩrĩkanĩ eEdomũ; mwahĩra abateya eEdomũ ehosĩ, nʼAbanya Edomũ bosĩ mobabya bagombe ba Dawĩdĩ. NʼOmwami Mukulu mwakĩndĩsya Dawĩdĩ ehosĩ aya.

Abakulu bʼomo bwami bwa Dawĩdĩ

¹⁵ Neryo Dawĩdĩ mwatabalira Abaĩsraelĩ bosĩ; kandi Dawĩdĩ mwatwa erĩbanza litunganene oko bandu buwe bosĩ.

¹⁶ Kandi Yoabũ mugala wa Zerũya abya mukulu wʼemilondo; na Yehosafatĩ mugala wa Ahĩlũdĩ abya mũhandĩkĩ;

¹⁷ na Sadokĩ mugala wa Ahĩtũbũ, na Ahĩmelekĩ mugala wa Abĩatarĩ, babya bahererĩ; na Zeraya abya mũhandĩkĩ mukulu.

¹⁸ Na Benaya mugala wa Yehoyada abya mukama wʼAbakeretĩ, nʼAbapeletĩ; nʼabagala ba Dawĩdĩ babya bamũsũbũkĩre.