2 Samwelĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akasonda erĩhĩmbĩra Nyamuhanga yʼenyũmba

¹ Kandi omugulu omwami ĩkala omo nyũmba yiwe, nʼOmwami Mukulu abere abĩmũlũhũkya oko nzĩgũ siwe oko mbande syosĩ,

² omwami mwabwira Natanĩ omũmĩnyererĩ, ati, Langira, ĩngye nyĩkere omo nyũmba yʼemĩerezĩ, nĩkwa erĩsandũko lya Nyamuhanga lĩkere omo hema yʼebĩsũkũlĩryo.

³ Na Natanĩ mwabwira omwami ati, Ego, Ukole ebyosĩ biri omo mutima wawe; kusangwa Omwami Mukulu ali haguma nawe.

⁴ Neryo omo kiro ekyo, ekĩnywa kyʼOmwami Mukulu mokyahĩka uku Natanĩ, kiti,

⁵ Ugende Ubwire omugombe wage Dawĩdĩ uti, Omwami Mukulu akabũga ati, Wasyambĩmbĩra enyũmba yʼerĩĩkalamo kwehĩ?

⁶ Kusangwa sĩndĩnatĩkala omo nyũmba erĩtsũka ekiro nalũsaya abana ba Ĩsraelĩ bʼeMĩsĩrĩ, erĩhĩka mũnabwĩre, nĩkwa nabirigendera omo hema nʼomo hʼerĩĩkala.

⁷ Ehosĩ nabiriyigendera nʼabana bosĩ ba Ĩsraelĩ, ko nanabũgĩre kĩnywa oko muguma gʼoko bihanda bya Ĩsraelĩ, oyo nahana eribya omũlĩsya wʼabandu bage Ĩsraelĩ, nyiti, Busana nakĩ sĩmwetambĩmbĩra enyũmba yʼeMĩerezĩ kwehĩ?

⁸ Neryo lino ukandibwira omugombe wage Dawĩdĩ, uti, Omwami Mukulu wʼemilondo ati, Nakũlũsaya omo lũlĩsĩryo, erikwama esyombũlĩ, ubye mũtabalĩ busana nʼabandu bage, oko Baĩsraelĩ;

⁹ kandi nabiribya haguma nawe ehosĩ waya, kandi nabĩrĩtsĩkya esyonzĩgũ syawe syosĩ embere syawe; kandi nasyayira erĩna lyawe mwʼĩnene ngʼamena wʼabakulu abali munakihugo.

¹⁰ Kandi asyahamula omwanya wʼabandu bage Ĩsraelĩ, kandi nasyahandabo, ibatoka erĩĩkala aho wabo, ĩbataswatũndwa kandi; kutse abandu bʼebibi sĩbendĩsyagalyabo kandi, ngʼerĩmbere,

¹¹ kandi ngʼekiro nahana abatswerĩ babye bakateya bandu bage Abaĩsraelĩ; nawe nasyakũlũhũkya oko nzĩgũ syawe syosĩ. Kandi Omwami Mukulu akakubwira ati, asyahĩmba enyũmba busana nawe.

¹² Omugulu ebiro byawe byasyahĩkana, nawe wasyeya abotata-kulu bawe, nasyĩmanĩa omwana wawe enyũma syawe, oyũkandĩsyalũa kuwe, kandi nasyasĩkya obwami buwe.

¹³ Asyahĩmba enyũmba busana nʼerĩna lyage, nage nasyasĩkya ekĩtũmbĩ kyʼobwami buwe kera na kera.

¹⁴ Kandi nasyabya ĩse wuwe, naye asyabya mugala wage. Amakola ebibi nasyamuhabula nʼomũtso wʼabandu, nʼemĩbĩbũ yʼabana bʼabandu;

¹⁵ nĩkwa obwenge bwʼolwanzo lwage sĩbwendĩsyamũlũako, ngoko nalũsayabo uku Saũlo, oyo nalũsaya embere syawe.

¹⁶ Nʼekĩtũnga kyawe nʼobwami bwawe bũkandĩsyasĩkĩbwa na kera embere syawe; ekĩtũmbĩ kyawe kyʼobwami kyasyasĩkĩbwa kera na kera.

¹⁷ Oko bĩnywa byosĩ ebĩ nʼomo nzolĩ syosĩ esĩ, Natanĩ kwʼabwira Dawĩdĩ yʼatya.

Erisaba lya Dawĩdĩ

¹⁸ Neryo omwami Dawĩdĩ mwingira omo Hema ĩbũyĩrĩre, mwĩkala embere syʼOmwami Mukulu mwabũga ati, Ĩngye ĩndĩkĩ, uwe Mukama, Omwami Mukulu, nʼekĩtũnga kyage ni kihi, uti nomo wanamangolya hano kwehĩ?

¹⁹ Nĩkwa oyũ abya mwatsi muke omo meso wawe, Uwe Mukama Omwami Mukulu; nĩkwa wabiriahula ekĩtũnga kyʼomugombe wawe erĩhĩka oko mugulu muli owakandisyasa; nʼoyũ nibya ni mugambo wʼabandu, Uwe Mukama, Omwami Mukulu!

²⁰ Kandi Dawĩdĩ angaswakubwira kĩndĩkĩ kwilaba aho kwehĩ? Kusangwa ũnasĩ omugombe wawe, uwe Mukama, Omwami Mukulu.

²¹ Busana nʼekĩnywa kyawe, kandi ngʼomutima wawe ĩgowene wabirikola ebyosĩ byʼobukulu, erĩmĩnyĩsyabyo oko mugombe wawe.

²² Busana nʼekyo uli mukulu, uwe Mwami Mukulu, Nyamuhanga; kusangwa sihali oyulingene nawe, kutse sihali gundi Nyamuhanga ate inina we, ngʼebyosĩ twabĩrĩowĩra omo matwĩ wetu.

²³ Kandi ni kihandakĩ muna-kihugo ekiringene nʼabandu bawe, nga Ĩsraelĩ kwehĩ? abo Nyamuhanga ayayĩtongoleraya ĩyowene-wene eribya kihanda, nʼeriyibanira erĩna, nʼeribakolera emyatsi minene, nʼemyatsi yʼerĩũbahya busana nʼekihugo kyawe, embere syʼabandu bawe, abo wayĩtongoleraya erĩlũa eMĩsĩrĩ erĩlũa omo bihanda nʼomo nyamuhanga syabo kwehĩ?

²⁴ Kusangwa wabĩrĩyĩhanganĩrya abandu bawe Ĩsraelĩ babye bandu bawe kera na kera, kandi uwe Mwami Mukulu, wabiribya Nyamuhanga wabo.

²⁵ Na lino uwe Mwami Mukulu Nyamuhanga, ekĩnywa ekyo wabĩrĩbũga busana nʼomugombe wawe, na busana nʼekĩtũnga kiwe, ũsĩkayekyo ebiro byosĩ, kandi Ukole ngoko wabĩrĩbũga.

²⁶ Kandi erĩna lyawe ripipawe kera na kera, babũge bati, Omwami Mukulu wʼemilondo ni Nyamuhanga wʼeĨsraelĩ; nʼekĩtũnga kyʼomugombe wawe Dawĩdĩ kĩmanĩbawe embere syawe.

²⁷ Kusangwa uwe, Mwami Mukulu wʼemilondo, Nyamuhanga wa Ĩsraelĩ, wabĩrĩkũmbũlĩra omugombe wawe, uti, Nasyakũhĩmbĩra enyũmba; kyaleka omugombe wawe iniabana omo mutima wuwe erikulakira omwʼisaba erĩ.

²⁸ Na lino uwe Mukama, Omwami Mukulu, uli Nyamuhanga, nʼebĩnywa byawe ni kwenene, kandi wabirilaga omugombe wawe ekindu kibuya ekĩ.

²⁹ Na lino eritsumula enyũmba yʼomugombe wawe lĩkũtsemesaye, yikote embere syawe. Kusangwa uwe, Mukama Mukulu, wabĩrĩbũgakyo, nʼenyũmba yʼomugombe wawe itsumulawe omo mũyĩsa wawe kera na kera.