2 Samwelĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akenda erĩsandũko lyʼendagano eGezerĩ

¹ Kandi Dawĩdĩ mwaswahĩndanĩa bandu abayisogawa bosĩ bʼAbaĩsraelĩ, elfu makũmĩ asatu (30,000).

² Neryo Dawĩdĩ mwahangana, mwagenda nʼabandu bosĩ ababya naye, bakaya eBaale-yũda, busana nʼeriyendayo erĩsandũko lya Nyamuhanga, erikahulawa omo Lĩna, rye rĩna lyʼOmwami Mukulu wʼemilondo oyo wĩkere endata oko makerũbĩ.

³ Kandi mobahĩra erĩsandũko lya Nyamuhanga oko galĩ nyihya-nyihya, mobalũsyalyo omo nyũmba ya Abĩnadabũ eyabya oko kitwa; kandi Ũza na Ahĩo, abagala ba Abĩnadabũ, mobasondola egalĩ nyihyanyihya eyo.

⁴ Kandi mobalũsyayo omo nyũmba ya Abĩnadabũ, eyabya oko kitwa, haguma nʼerĩsandũko lya Nyamuhanga; na Ahĩo mwatangirira erĩsandũko.

⁵ Na Dawĩdĩ nʼekĩtũnga kyosĩ kya Ĩsraelĩ mokyatsangira embere syʼOmwami Mukulu omo mihanda yosĩ yʼemĩzĩkĩ eyabatsawa omo miti yʼekĩlagũ, nʼesyonanga, nʼesyonzenze, nʼamalenga, nʼebiyamba, nʼesyonzoga.

⁶ Kandi omugulu bahĩka oko kibuga kyʼerĩhũmbĩrako kya Nakonĩ, Ũzamwasumba ebyala biwe mwahamba okwʼĩsandũko lya Nyamuhanga, mwahambiriralyo; kusangwa esyonde mosyatwĩkangalyalyo.

⁷ Nʼerihitana lyʼOmwami Mukulu molyagulumira uku Ũza; na Nyamuhanga mwamũswĩrĩryaho busana nʼeritindakenga liwe; neryo mwaholeraho oko mũsĩke wʼerĩsandũko lya Nyamuhanga.

⁸ Neryo Dawĩdĩ mwahitana, kusangwa Omwami Mukulu mwĩta Ũza; neryo mwalukaho mo Perezĩ-ũza, erĩhĩka lino.

⁹ Kandi Dawĩdĩ mubaha Omwami Mukulu ekiro ekyo; ati, Erĩsandũko lyʼOmwami Mukulu lyasyambĩkako liti kwehĩ?

¹⁰ Neryo Dawĩdĩ mwatanza erĩhũmĩrya erĩsandũko lyʼOmwami Mukulu lyʼewuwe omo mũyĩ wa Dawĩdĩ; nĩkwa Dawĩdĩ mwalabyalyo luhande, mwatwalalyo omo nyũmba ya Obedĩ-edomũ Omũgĩtĩ.

¹¹ Nʼerĩsandũko lyʼOmwami Mukulu molyabuga mikera ĩsatu omo nyũmba ya Obedĩ-edomũ Omũgĩtĩ; Omwami Mukulu mwatsumula Obedĩ-edomũ, nʼekĩtũnga kiwe kyosĩ.

Dawĩdĩ akahũmĩraya erĩsandũko lyʼe Yerũsalema

¹² Neryo omwami Dawĩdĩ mwabwirwa, ambu, Omwami Mukulu abiritsumula ekĩtũnga kya Obedĩ-edomũ, nʼebyosĩ awite, busana nʼerĩsandũko lya Nyamuhanga. Neryo Dawĩdĩ mwayenda erĩsandũko lya Nyamuhanga lyʼomo nyũmba ya Obedĩ-edomũ, mwakolyalyo omo mũyĩ wa Dawĩdĩ nʼobutseme.

¹³ Neryo abaheka erĩsandũko lyʼOmwami Mukulu, babere babigenda bika ndatu, Dawĩdĩ mwahonga ende yʼekiborogonye.

¹⁴ Na Dawĩdĩ mwasatira embere syʼOmwami Mukulu nʼomũhwa wuwe gosĩ; kandi Dawĩdĩ abya iniambite eefodĩ yʼekĩtanĩ.

¹⁵ Na Dawĩdĩ nʼekĩtũnga kyosĩ kya Ĩsraelĩ mokyahetũkya erĩsandũko lyʼOmwami Mukulu nʼerĩũta obogo, haguma nʼomulenge wʼengubi.

¹⁶ Neryo omugulu erĩsandũko lyʼOmwami Mukulu lingira omo mũyĩ wa Dawĩdĩ, Mĩkalĩ mwali wa Saũlo mwaleberya omwʼĩdĩrĩsa mwalangira omwami Dawĩdĩ akayisumbanga nʼerisatira embere syʼOmwami Mukulu; neryo mwamupona omo mutima wuwe.

¹⁷ Neryo mobĩngĩrya erĩsandũko lyʼOmwami Mukulu, mobasingikalyo omo mwanya walyo omo katĩkatĩ kʼerĩhema eryo Dawĩdĩ abambiralyo; kandi Dawĩdĩ mwahonga amahere wʼerĩokererya nʼamahere wʼobuholo embere syʼOmwami Mukulu.

¹⁸ Neryo Dawĩdĩ abere abuga erihonga obuhere bwʼerĩokererya nʼamahere wʼobuholo, mwatsumula bandu omo lĩna lyʼOmwami Mukulu wʼemilondo.

¹⁹ Neryo mwagabira bandu bosĩ, omo katĩkatĩ kʼendeko yosĩ ya Ĩsraelĩ; abalume nʼabakalĩ, obuli mundu ekibege kyʼobundu, nʼerĩgabo lyʼeyĩswĩ, nʼomusamo wʼebĩgũma byʼebĩnyũ byũmĩre. Nʼabandu bosĩ mobakũlũka obuli mundu eka wuwe.

Mĩkalĩ akaserebula Dawĩdĩ

²⁰ Neryo omugulu Dawĩdĩ asubula eritsumula ekĩtũnga kiwe, Mĩkalĩ mwali wa Saũlo mwahuluka erĩhĩndana na Dawĩdĩ, mwabũga ati, Omwami wʼeĨsraelĩ alwe mubuya ati mũnabwĩre, eriyambulira embere syʼameso wʼabatsana buwe ba bagombe buwe, omundu mutya-mutya kwʼakayambula bũtakwa ĩsonĩ!

²¹ Neryo Dawĩdĩ mwabwira Mĩkalĩ ati, Bĩlũe embere syʼOmwami Mukulu, oyo wayisoga ngye kwilaba tata wawe, na kwilaba ekĩtũnga kiwe kyosĩ, nʼerĩnyĩhĩra mo mũtabalĩ wʼabandu bʼOmwami Mukulu, nʼAbaĩsraelĩ; kikaleka inasyatsangira embere syʼOmwami Mukulu.

²² Kandi nasyabya nʼerĩtendĩsĩmwa kwilaba aho, ĩnayĩkehya omo meso wage; nĩkwa oko batsana abo wahula, nasyasĩkĩbwa kubo.

²³ Neryo Mĩkalĩ mwali wa Saũlo mwatabuta mwana erĩhĩka oko luholo luwe.