2 Samwelĩ 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akabya mwami wʼeĨsraelĩ nʼe Yũda

¹ Neryo ebihanda byosĩ byʼAbaĩsraelĩ mobyahĩka uku Dawĩdĩ eHebũronĩ, bati, Lebaya tuli makũha wawe nʼomubiri wawe.

² Oko migulu yalaba, omugulu Saũlo abya mwami akatutabalira, nina we wabya ukasondolera Ĩsraelĩ erihongoka nʼeriswasa; kandi Omwami Mukulu mwakubwira ati, wasyalĩsya abandu bage Ĩsraelĩ, kandi Wasyabya mũsondolĩ wʼAbaĩsraelĩ.

³ Neryo, abakulu bosĩ bʼAbaĩsraelĩ mobeya omwami eHebũronĩ; nʼomwami Dawĩdĩ mwalagana nabo endagano eHebũronĩ embere syʼOmwami Mukulu; neryo mobahakabya Dawĩdĩ yʼamagũta eribya mwami wʼeĨsraelĩ.

⁴ Dawĩdĩ abya wʼemyaka makũmĩ asatu omugulu atsũka eritabala, kandi mwatabala myaka makũmĩ ani.

⁵ EHebũronĩ mwatabalira Yũda emyaka irinda na mikera ndatu; nʼe Yerũsalema mwatabalira Abaĩsraelĩ bosĩ nʼAbayũda emyaka makũmĩ asatu nʼeyĩsatu.

Dawĩdĩ akayĩmĩraya eYerũsalema

⁶ Kandi omwami nʼabandu buwe mobasya eYerũsalema erilwa nʼAbayebũsĩ, esyondũlanĩ syʼekihugo ekyo, ababwira Dawĩdĩ bati, Esyondĩmatĩme nʼebirema basyakuhiga eno, sĩwendĩsyahĩka kuno; ĩbakaganĩraya bati, Dawĩdĩ siangatoka eriingirako.

⁷ Nĩkwa Dawĩdĩ mwayĩmĩrya ahakagatĩre hʼeSĩonĩ; oyũ go mũyĩ wa Dawĩdĩ.

⁸ Neryo Dawĩdĩ mwabũga oko kiro ekyo ati, Oyũkĩta Abayebũsĩ iruke omo mugende wʼamagetsi, kandi ahĩke oko birema nʼesyondĩmatĩme, abo mutima wa Dawĩdĩ aponĩre. Kyaleka ĩbabũga bati, Ebirema nʼesyondĩmatĩme; sibendisyingira omo nyũmba.

⁹ Neryo Dawĩdĩ mwĩkala ahakagatĩre, mwalukaho mo mũyĩ wa Dawĩdĩ. Neryo Dawĩdĩ mwahĩmba oko mbande syosĩ erĩtsũka eMĩlo nʼomo mbande syʼomwisi.

¹⁰ Kandi Dawĩdĩ mwakamaha nʼeribya mukulu; kusangwa Omwami Mukulu, Nyamuhanga wʼemilondo abya haguma naye.

¹¹ Neryo Hĩramũ omwami wʼeTĩro mwatumira Dawĩdĩ yʼabakwenda, nʼemiti yʼeMĩerezĩ, nʼababatsĩ, nʼabahĩmbĩ bʼamabwe; mobahĩmbĩra Dawĩdĩ yʼenyũmba.

¹² Na Dawĩdĩ mwaminya ngoko Mwami Mukulu abĩrĩmũhanganĩa mo mwami oko Baĩsraelĩ, kandi kwʼabĩrĩhamya obwami buwe busana nʼabandu buwe Abaĩsraelĩ.

Dawĩdĩ akaswahalĩkanaya abandi bakalĩ

¹³ Kandi Dawĩdĩ abere abĩhũma eHebũronĩ mwayĩmĩrya abandi bahwekĩ nʼabakalĩ eYerũsalema; kandi Dawĩdĩ mwaswabuta abandi bagala nʼabali.

¹⁴ Neryo aya wa mena wʼabana abutira eYerũsalema: Samũa, na Sobabũ, na Natana, na Solomono,

¹⁵ na Ĩbũhari, na Elĩsũa, na Nefegĩ, na Yafia,

¹⁶ na Elĩsama, na Elĩada na Elĩfeletĩ.

Dawĩdĩ akakĩnda Abafĩlĩstĩnĩ

¹⁷ Kandi omugulu Abafĩlĩstĩnĩ bowa ko babĩrĩhakabya Dawĩdĩ erĩmũsĩngya mo mwami wa Ĩsraelĩ, Abafĩlĩstĩnĩ bosĩ mobayasonda-sonda Dawĩdĩ; neryo omugulu Dawĩdĩ owa, mwandagalira ahakagatĩre.

¹⁸ Neryo Abafĩlĩstĩnĩ mobasa mobatsungana omusya wʼeRefaĩmũ.

¹⁹ Neryo Dawĩdĩ mwabũlya Omwami Mukulu, ati, Nyinahetuke erilwa nʼAbafĩlĩstĩnĩ kwehĩ? Unemwendĩsyahĩrabo omo byala byage kwehĩ? Neryo Omwami Mukulu mwabwira Dawĩdĩ ati, Uhetuke; kusangwa kwenene ngandĩsyahĩra Abafĩlĩstĩnĩ omo byala byawe.

²⁰ Neryo Dawĩdĩ mwaya eBaalĩ-perazĩmũ, mwakĩndabo; mwabũga ati, Omwami Mukulu abĩrĩkĩnda esyonzĩgũ syage ngʼeribwaga lyʼamagetsi. Kyaleka iniahula erĩna lyʼaho mo Balĩ-perazĩmũ.

²¹ Kandi Abafĩlĩstĩnĩ mobasĩga esisumba syabo syʼaho; na Dawĩdĩ nʼabandu buwe mobahekasyo.

²² NʼAbafĩlĩstĩnĩ mobaswahetukiraho kandi, eritsungana omo musya wʼeRefaĩmũ.

²³ Neryo omugulu Dawĩdĩ abũlaya Omwami Mukulu, Omwami Mukulu mwabũga ati, Susyehetukiraho; ũtĩmbe enyũma kubo, wasire ebwanga bwʼemiti yʼemitugunda.

²⁴ Neryo, omugulu wasyowa esyongyĩndo sĩkahĩndĩra oko mitwe yʼemiti yʼemitugunda, neryo wasyayitsinga lũba, kusangwa oko saa eyo Omwami Mukulu abirigenda embere syawe erĩswĩrya omulondo wʼAbafĩlĩstĩnĩ.

²⁵ Neryo Dawĩdĩ mwakola atya, ngoko Mwami Mukulu amuhana, mwaswĩrya Abafĩlĩstĩnĩ erĩtsũka eGeba erĩhĩka aho ũkahĩkĩra eGezerĩ.