2 Samwelĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Abenerĩ bakanzana na Dawĩdĩ

¹ Neryo mohabya malwa mangi omo katĩkatĩ kʼekĩtũnga kya Saũlo nʼekĩtũnga kya Dawĩdĩ. Kandi Dawĩdĩ mwasa akabana maka, nĩkwa ekĩtũnga kya Saũlo mokyasa kikahwerekerera.

² Kandi Dawĩdĩ mwabutira abagala bʼeHebũronĩ; akambere kuwe kabya Amnonĩ, wa Ahĩnoamũ Omũyezreelĩ.

³ Nʼowʼakabiri wuwe, ye Kĩreabũ wa Abĩgaĩlĩ muka Nabalĩ Omũkaramelĩ; nʼowʼakasatu ye Abũsaloma mugala wa Maaka mwali wa Talmaĩ omwami wʼeGesũrĩ;

⁴ nʼowʼakani, Adonĩya mugala wa Hagĩtĩ; nʼowʼakatanu Sefatĩa mugola wa Abĩtalĩ;

⁵ nʼowʼendatu Ĩtĩramũ wa Egla omũkalĩ wa Dawĩdĩ, aba bo Dawĩdĩ abutira eHebũronĩ.

⁶ Neryo omugulu habya malwa omo katĩkatĩ kʼekĩtũnga kya Saũlo nʼekĩtũnga kya Dawĩdĩ, Abenerĩ mwayibanira maka omo kĩtũnga kya Saũlo.

⁷ Nĩkwa Saũlo abya nʼomũhwekĩ, erĩna liwe lyabya Rĩzĩpa, mwali wa Ahĩa; neryo Ĩsĩbosetĩ mwabũlya Abenerĩ ati, Busana nakĩ wabirigotsera nʼomũhwekĩ wa tata kwehĩ?

⁸ Neryo Abenerĩ mwahitana kutsibu, busana nʼebĩnywa bya Ĩsĩbosetĩ, ati, Kwʼĩngye indi mutwe wʼembwa ya Yũda kwehĩ? Mũnabwĩre namakola ebibuya oko kĩtũnga kya tata wawe Saũlo, nʼoko bagala babo nʼoko bĩra buwe, kandi sinditakuhotera omo byala bya Dawĩdĩ; nĩkwa ũkanyĩhandĩkĩrĩraya olubanza mũnabwĩre busana nʼomũkalĩ oyũ.

⁹ Nyamuhanga akolere Abenerĩ, yʼatya na kwilaba aho, namatendimukolera nyitya, ngoko Mwami Mukulu abĩrĩlahĩrĩrya Dawĩdĩ;

¹⁰ eritwanganĩa obwami bwʼekĩtũnga kya Saũlo, nʼerisingika obwami bwa Dawĩdĩ oko Baĩsraelĩ nʼoko Bayũda, erĩtsũka eDanĩ nʼerĩhĩka eBerĩ-sheba.

¹¹ Neryo Ĩsĩbosetĩ mwataluka erĩsũbĩrya Abenerĩ ekĩnywa, kusangwa ubaha Abenerĩ.

¹² Kandi Abenerĩ mwatumira uku Dawĩdĩ kwʼeyo ali, ati, Ekihugo ni kyandi kwehĩ? Ulagane nage, nasyakũwatĩkya erikuletera Abaĩsraelĩ bosĩ.

¹³ Neryo Dawĩdĩ mwabũga ati, Lyowene, ngandilagana nawe; nĩkwa ekiguma ngakusondako, nyiti, siwendisyalola oko bũsũ bwage, ute watsũka erireta Mĩkalĩ, mwali wa Saũlo, omugulu ukasa erinyilolako.

¹⁴ Kandi Dawĩdĩ mwatumira Ĩsĩbosetĩ, mugala wa Saũlo yʼabakwenda, ati, Umbe omũkalĩ wage Mĩkalĩ, oyo nayĩtahĩraya oko bĩtsũle ĩgana byʼAbafĩlĩstĩnĩ.

¹⁵ Neryo Ĩsĩbosetĩ mwatuma, mwamũlũsya ũkwʼĩba wuwe ye Paltĩelĩ mugala wa Laĩsĩ.

¹⁶ Nʼĩba wuwe mwamũkwamanĩsya, mwagenda inianemulira, mwamukwama erĩhĩka eBahũrĩmũ. Neryo Abenerĩ mwamubwira ati, Genda, Usubule; naye mwasubula.

¹⁷ Neryo Abenerĩ mwakanĩa nʼabakulu bʼAbaĩsraelĩ, ati, Oko mugulu wʼerĩmbere momwasonda Dawĩdĩ eribya mwami wenyũ.

¹⁸ Lino mukolekyo; kusangwa Omwami Mukulu abiriahula Dawĩdĩ ati, Omo byala byʼomugombe wage Dawĩdĩ nasyalamĩrya mwʼabandu bage Ĩsraelĩ erĩlũa omo byala byʼAbafĩlĩstĩnĩ, nʼomo byala byʼesyonzĩgũ syabo syosĩ.

¹⁹ Kandi Abenerĩ mwabũgĩrabyo omo matwĩ wʼAbabenyamĩna; kandi Abenerĩ mwayabwira Dawĩdĩ eHebũronĩ emyatsi yosĩ eyĩsĩmĩrwe na Ĩsraelĩ nʼeyĩsĩmĩrwe nʼekĩtũnga kyosĩ kya Benyamĩna.

²⁰ Na Abenerĩ mwaya eyiri Dawĩdĩ eHebũronĩ, haguma nʼabandu makũmĩ abiri. Neryo Dawĩdĩ mwatsumbira Abenerĩ nʼabandu babya haguma naye erirya ĩnene.

²¹ Neryo Abenerĩ mwabwira Dawĩdĩ ati, Ngandihangana inagenda, nasyahĩndanĩa Ĩsraelĩ yosĩ oko mukama wage omwami, ibatoka erilagana nawe endagano, kandi iwatoka eritabala oko bosĩ ngoko mutima wawe anzĩre. Neryo Dawĩdĩ mwatuma Abenerĩ; naye mwagenda nʼobuholo.

Yoabũ akĩta Abenerĩ

²² Neryo, abagombe ba Dawĩdĩ na Yoabũ mobalũa omo mulondo, mobaletanĩa abanyegwa bangi. Nĩkwa Abenerĩ isiali haguma na Dawĩdĩ eHebũronĩ; kusangwa iniabirimutuma, iniabirigenda nʼobuholo.

²³ Neryo omugulu Yoabũ nʼomulondo gosĩ owabya haguma naye bahĩka, mobabwira Yoabũ, bati, Abenerĩ mugala wa Nerĩ, mwahĩkĩre oko mwami, naye abirimuhamula, abirigenda buholo.

²⁴ Neryo Yoabũ mwahĩka eyiri omwami, ati, Wamakolakĩ kwehĩ? Lebaya, Abenerĩ mwakũhĩkĩreko; busana nakĩ wabirimutuma, kandi abirigenda kwehĩ?

²⁵ Ũnasĩ Abenerĩ mugala wa Nerĩ, kwʼasyakuteba, nʼeriminya emigendere yawe nʼemibere yawe, nʼeriminya ebyosĩ gukakola.

²⁶ Neryo omugulu Yoabũ alũa eyiri Dawĩdĩ, mwatuma bakwenda erikwama Abenerĩ, kandi mobamũsũbũlĩrya oko kitsinga kyʼeSĩra; nĩkwa Dawĩdĩ syabya asĩ ebyo.

²⁷ Neryo omugulu Abenerĩ asuba eHebũronĩ, Yoabũ mwamuhengeka omo katĩkatĩ kʼolũkyo erĩkanĩa naye omo bihwehwe, neryo mwamutsimitiraho omo kabunda, neryo mwahola, busana nʼomusasi wa Asahelĩ mugala wabo.

²⁸ Nʼenyũma wʼaho, omugulu Dawĩdĩ owa, mwabũga ati, Ĩngye nʼobwami bwage Situli ko musango na kera embere syʼOmwami Mukulu busana nʼomusasi wa Abenerĩ mugala wa Nerĩ.

²⁹ Atogere oko mutwe wa Yoabũ, nʼoko kĩtũnga kyʼĩse wuwe; kandi ekĩtũnga kya Yoabũ sikibuleko oyũkalũa mʼomusasi, kutse omuhaga, kutse oyukegemera oko mũtso, kutse oyukawa omo mũyalĩ kutse oyukabula kalyo.

³⁰ Neryo Yoabũ na Abĩsayĩ mugala wabo mobĩta Abenerĩ yo batya, kusangwa iye mwĩta mugala wabo ye Asahelĩ omo malwa eGĩbeonĩ.

Dawĩdĩ akalira Abenerĩ

³¹ Kandi Dawĩdĩ mwabwira Yoabũ, nʼabandu bosĩ ababya naye, ati, Mutulange esyongimba syenyũ, mũyambalaye emisarandwe, mulire embere sya Abenerĩ. Nʼomwami Dawĩdĩ mwakwama omundala.

³² Mobata Abenerĩ yʼeHebũronĩ batya; nʼomwami mwasumba omulenge wuwe, mwalirira okwʼisinda ya Abenerĩ; nʼabandu bosĩ mobalira.

³³ Nʼomwami mwasũsũmanira Abenerĩ, ati, Abenerĩ angaholĩre ngʼomũkĩrũ kwehĩ?

³⁴ Ebyala byawe mobitabohwa, Kutse ebisando byawe mobĩtahĩrwa ko buhulula; Ngʼomundu ukawa embere syʼabandu babi, nawe mowawa utya. Neryo abandu bosĩ mobaswamulira kandi.

³⁵ Neryo abandu bosĩ mobasa erihatikana Dawĩdĩ erirya kalyo; nĩkwa Dawĩdĩ mwalahĩrya, ati, Nyamuhanga anyikolere atya na kwilaba aho, namagerya akalyo, kutse kindi kindu kyosĩ, erĩhĩka okwʼirenga lyʼeryuba.

³⁶ Nʼabandu bosĩ mobayĩtegererya ekyo, mokyatsemesyabo; nʼebyosĩ omwami akola mobyatsemesya abandu bosĩ.

³⁷ Nʼekiro ekyo abandu bosĩ nʼeĨsraelĩ yosĩ mobaminya erĩĩta Abenerĩ mugala wa Nerĩ ko litabya isonda lyʼOmwami.

³⁸ Nʼomwami mwabwira bagombe buwe ati, Sĩmwasĩ kʼomunya-mwami nʼomundu mukulu abĩrĩkwa mũnabwĩre omo katĩkatĩ kʼeĨsraelĩ kwehĩ?

³⁹ Kandi mũnabwĩre ĩngye nahwerekerere nomo nandi mwami oyo Nyamuhanga ayisoga; nʼabalume aba abagala ba Zerũya, banyĩremĩre. Omwami Mukulu ahembe omukola-nabi ngʼebibi biwe ko biri.