2 Samwelĩ 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ amahalya omwʼiganza bandu

¹ Kandi erihitana lyʼOmwami Mukulu molyagulumira oko Baĩsraelĩ, neryo mwĩmũkya Dawĩdĩ erireta obũlĩge oko Ĩsraelĩ ati, Genda uyaganze Abaĩsraelĩ nʼAbayũda.

² Nʼomwami mwabwira Yoabũ omukulu wʼomulondo wʼabasĩrĩkanĩ wabya naye, ati, Genda omo katĩkatĩ kʼebihanda byosĩ bya Ĩsraelĩ, erĩtsũka eDanĩ nʼerĩhĩka eBerĩ-seba, muganze abandu, inatoka eriminya emiganzo yʼabandu.

³ Na Yoabũ mwabwira omwami ati, Omwami Mukulu Nyamuhanga wawe atomeke oko bandu ngendo erĩgana, nomo bangabya bangahi; nʼameso wʼomukama wage omwami alangirekyo; nĩkwa omukama wage omwami akatsemera omwatsi oyũ busana nakĩ kwehĩ?

⁴ Nĩkwa ekĩnywa kyʼOmwami mokyasĩnga ekya Yoabũ, nʼekyʼabakulu bʼemilondo. Neryo Yoabũ nʼabakulu bʼomulondo wʼabasĩrĩkanĩ mobalũa embere syʼOmwami, eriyaganza bandu ba Ĩsraelĩ.

⁵ Kandi mobasoka eYorodanĩ, mobalalirira eAroerĩ, oko luhande lwʼamali lwʼomũyĩ owali omo katĩkatĩ kʼomusya wʼeGadĩ, erĩlolya eYazerĩ.

⁶ Neryo mobahĩka eGĩleadĩ, nʼekihugo kyʼeTahatĩ-mũhodĩsĩ; kandi mobahĩka eDanĩ-yaanĩ, mobatĩmba erĩhĩka eSĩdonĩ,

⁷ kandi mobahĩka ahakagatĩre hʼeTĩro, nʼoko mĩyĩ yosĩ yʼAbahĩtĩ, nʼeyʼAbakanana; kandi mobahongoka eLutambi lwʼeYĩkwa lwʼeYũda, eBerĩ-seba.

⁸ Neryo omugulu batĩmba oko kihugo kyosĩ mobahĩka eYerũsalema ibamabibuga emikera mwenda nʼebiro makũmĩ abiri.

⁹ Neryo Yoabũ mwatwalira omwami yʼemiganzo yʼabandu; mohabya esyombangĩ elfu magana munani (800,000) abakakula omũyalĩ; nʼabandu ba Yũda babya elfu magana atanu (500,000).

Omukama Mukulu akatswera Dawĩdĩ

¹⁰ Neryo omutima wa Dawĩdĩ mwasĩsĩra enyũma wʼeriganza bandu. Neryo Dawĩdĩ mwabwira Omwami Mukulu ati, Nahalĩrye kutsibu oko byo nakolĩre; nĩkwa lino kĩsĩ-kĩsĩ Uwe Mwami Mukulu ubuyire amalolo wʼomugombe wawe; kusangwa nabirikola obũkĩrũ bo kutsibu.

¹¹ Kandi omugulu Dawĩdĩ abuka omo ngyakya, ekĩnywa kyʼOmwami Mukulu mokyahĩka oko mũmĩnyererĩ Gadĩ, omũlangĩrĩ wa Dawĩdĩ, ati,

¹² Ugende, ũbũge na Dawĩdĩ, uti Omwami Mukulu akabũga ati, Namahĩraho myatsi ĩsatu busana nawe, usombole muguma kuyo inaminya erikukolerago.

¹³ Neryo Gadĩ mwahĩka eyiri Dawĩdĩ, mwamubwira, mwabũga naye ati, Emyaka irinda yʼenzala ĩkũhĩkeko omo kihugo kyawe kwehĩ? Kutse wanzĩre erisaga esyonzĩgũ syawe emikera ĩsatu sikakukwama kwehĩ? Kutse habye obũkonĩ bwʼakasũsũ ebiro bisatu omo kihugo kyawe kwehĩ? Ũganĩraye erĩsũbĩrya lyahi nasyasũbũlĩrya oyo wanyituma.

¹⁴ Neryo Dawĩdĩ mwabwira Gadĩ, ati, Namabulirwa kutsibu; tuwe lino omo byala byʼOmwami Mukulu; kusangwa eriganyira liwe nĩʼnene; kandi Suleke ngawa omo byala byʼomundu.

Omwami Mukulu akatuma obũkonĩ bwʼakasũsũ

¹⁵ Neryo Omwami Mukulu mwatuma obũkonĩ bwʼakasũsũ oko Ĩsraelĩ erĩtsũka omo ngyakya erĩhĩka oko mugulu owahulawa; mohahola bandu elfu makũmĩ alinda (70,000) erĩtsũka eDanĩ erĩhĩka Berĩ-seba.

¹⁶ Nʼomugulu omũlaĩka asumba ebyala biwe erĩlolyabyo eYerũsalema erĩheryako, Omwami Mukulu mwayĩbũnũla oko kibi ekyo, mwabwira omũlaĩka oyo waheraya bandu, ati, Bingaho; Ũkakĩraye ebyala byawe. Nʼomũlaĩka wʼOmwami Mukulu abya hakũhĩ nʼekĩhũmbĩro kya Araũna Omũyebũsĩ.

¹⁷ Neryo Dawĩdĩ mwabũga nʼOmwami Mukulu omugulu alangira omũlaĩka akaswĩrya bandu, ati, Lebaya, nabĩrĩhalya, kandi nabirikola ekibi; nĩkwa esyombũlĩ esĩ, syakolĩrekĩ kwehĩ? kĩsĩ-kĩsĩ nyiti, ebyala byawe bilwe nage, bibye oko kĩtũnga kya tata wage.

Dawĩdĩ akahĩmba ekiherero oko kĩhũmbĩro kya Araũna

¹⁸ Neryo Gadĩ mwasa mweya Dawĩdĩ, mwamubwira ati, Hetuka, Ũhĩmbĩre Omwami Mukulu yʼekiherero omo kĩhũmbĩro kya Araũna Omũyebũsĩ.

¹⁹ Neryo Dawĩdĩ mwahetukirayo ngoko Gadĩ amubwira, kandi ngoko Mwami Mukulu ahana.

²⁰ Neryo Araũna mwagusa meso, mwalangira omwami nʼabagombe buwe bakasa erĩlolya eyo ali; na Araũna mwahuluka mũnamĩrya obũsũ buwe bʼoko kitaka embere syʼOmwami.

²¹ Kandi Araũna mwabũga ati, omukama wage omwami akasira omugombe wuwe busana nakĩ kwehĩ? Neryo Dawĩdĩ mwabũga ati, Erigula ekĩhũmbĩro kyawe, nyĩhĩmbĩre Omwami Mukulu yʼekiherero, obũkonĩ bwʼakasũsũ bũkakĩrĩbawe omo bandu.

²² Neryo Araũna mwabwira Dawĩdĩ ati, omukama wage mwami ĩmaye ebyo asĩmĩre ahongebyo; lebaya, esyonde busana nʼobuhere bwʼerĩokererya, nʼebindu byʼerĩhũmba nʼesyongomo syʼesyonde busana nʼesyongwĩ.

²³ Ebyosĩ ebĩ, uwe mwami, Araũna akaha byʼOmwami. Kandi Araũna mwabwira omwami ati, Omwami Mukulu Nyamuhanga wawe akũlĩge.

²⁴ Neryo omwami mwabwira Araũna ati, Iyihi; nĩkwa ngandigulakyo ukʼuwe kwenene omo nzwere; kutse sinangahongera Omwami Mukulu Nyamuhanga wage yʼamahere wʼerĩokererya ahatagũlĩre. Neryo Dawĩdĩ mwagula ekĩhũmbĩro ekyo nʼesyonde oko sekelĩ syʼebĩtsĩpa makũmĩ atanu (50).

²⁵ Neryo Dawĩdĩ mwahĩmbĩra Omukama Mukulu yʼekiherero, kandi mwahonga amahere wʼerĩokererya nʼamahere wʼobuholo. Neryo Omwami Mukulu mwowa erĩbũganganira ekihugo, nʼobũkonĩ bwʼakasũsũ mobwakakĩrĩbwa oko Ĩsraelĩ.