2 Samwelĩ 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwa Dawĩ dĩ lwʼendũlĩ

¹ Neryo ebĩ bye bĩnywa bya Dawĩdĩ byʼendũlĩ. Dawĩdĩ mugala wa Yese ati, Nʼomundu oyo wahamĩbawa ati, Nʼoyo Nyamuhanga wa Yakobo ayisoga eribya mwami, Nʼomwĩmbĩ mubuya wa Ĩsraelĩ ati,

² Omũlĩmũ wʼOmwami Mukulu akabũga ũmwʼĩngye, Nʼekĩnywa kiwe mokyabya oko lulimi lwage.

³ Nyamuhanga wa Ĩsraelĩ mwabũga, Omũlemberĩ wa Ĩsraelĩ mwabũga nage, Oyukatabala oko bandu nʼeritunganene Oyukatabala omʼubaha lya Nyamuhanga,

⁴ Ali ngʼekyakakala kyʼetũtũtũ, omugulu eryuba likahuluka, Engyakya eyite kwʼebĩtũ, Omugulu ebiti birere birere bikalasa oko kitaka, Ngʼekyakakala ekĩkakoleraya enyũma wʼembũla.

⁵ Kwenene ekĩtũnga kyage sikiri kitya na Nyamuhanga kwehĩ? Nĩkwa abirilagana nage endagano yʼerikota, Eyĩtondekĩre omo myatsi yosĩ, kandi ĩsĩkĩre. Kusangwa omulamo wage gosĩ, nʼerisonda lyosĩ lyage, Kandi Nyamuhanga sĩendĩsyaberereryabo kwehi?

⁶ Nĩkwa abate na ndũndĩ bosĩ basyahigula ngʼemisakisaki, Kusangwa sibetoka erihambwa omo byala;

⁷ Nĩkwa omundu oyũkatũla kubo Litolere iniabya nʼekyuma nʼolumango lwʼerĩtũmo. Kandi basyahĩsĩrĩbwa nʼomuliro aho wabo.

Esyombangĩ sya Dawĩdĩ nʼebyo bakola

⁸ Aya wa mena wʼesyombangĩ esyo Dawĩdĩ abya awite; Yasoboamũ Omũtakemonĩ, omukulu wʼabakulu; naye abirikirawa mo Adĩno Omũezĩnĩ kusangwa ĩta amagana munani oko saa nguma.

⁹ Oyũmũsũbũkĩre nĩ Eleazarĩ mugala wa Dodaĩ mugala wʼOmũahohĩ, omuguma gʼoko mbangĩ ĩsatu ababya haguma na Dawĩdĩ, omugulu bapona Abafĩlĩstĩnĩ abahĩndana erilwa nʼabalume ba Ĩsraelĩ ĩbamabĩlũaho.

¹⁰ Iye mwahangana mwaswĩrya Abafĩlĩstĩnĩ erĩhĩka aho ebyala biwe byaluhira, nʼebyala biwe mobyamakirira oko mũyalĩ; ekiro ekyo, Omwami Mukulu mwakola erilama ĩnene; nʼabandu mobamusubako eriyaheka eminyego misa.

¹¹ Kandi akwamĩrwe na Sama mugala wa Age Omũhararĩ. Kandi Abafĩlĩstĩnĩ mobahĩndana omo ndeko nguma, ahabya eririma Ĩyoswĩre mwʼebĩtsalĩ; nʼabandu mobasaga Abafĩlĩstĩnĩ.

¹² Nĩkwa Sama mwahangana omo katĩkatĩ kʼeririma eryo, mwalwiralyo, kandi mwĩta Abafĩlĩstĩnĩ; kandi Omwami Mukulu mwayira erilama ĩnene.

¹³ Kandi abasatu bʼoko bandu bakulu makũmĩ asatu mobandagala, mobahĩka uku Dawĩdĩ omo mugulu wʼerigesa, oko mwangalũ wʼeAdũlamũ; nʼomulondo wʼAbafĩlĩstĩnĩ abya ahandĩre ekilaliriro omo musya wʼeRefaĩmũ.

¹⁴ Na Dawĩdĩ oko mugulu oyo abya ahakagatĩre; nʼomulondo wʼAbafĩlĩstĩnĩ oko mugulu oyo eBetelehemũ.

¹⁵ Neryo Dawĩdĩ mwakandira ati, Kumbe hali mundu wangamba oko magetsi wʼerĩpũlya wʼekitehero kyʼoko lũkyo lwʼeBetelehemũ!

¹⁶ Nʼesyombangĩ ĩsatu mosyatula ekilaliriro kyʼAbafĩlĩstĩnĩ, mobayateha magetsi omo kitehero kyʼeBetelehemũ ekiri hakũhĩ nʼolũkyo mobahekago mobaleterago Dawĩdĩ; nĩkwa mwagana erĩpũlya kugo, nĩkwa mũtũlĩrago embere syʼOmwami Mukulu.

¹⁷ Ati, Kibye hali kwĩngye, uwe Mwami Mukulu erikola ekĩ; nyĩpũlaye omusasi wʼabandu abatsama engebe yabo kwehĩ? Kyaleka iniagana erĩpũlyago. Esyombangĩ ĩsatu esyo mosyakola emyatsi eyĩ.

¹⁸ Kandi Abĩsayĩ, mugala wabo Yoabũ, mugala wa Zerũya, yo wabya mukulu wʼamakũmĩ asatu. Naye mwasumba erĩtũmo liwe erilwa nʼamagana asatu kandi mwĩtabo, naye yũkũmayĩre omo basatu abo.

¹⁹ Abya wʼerikengwa omo makũmĩ asatu, kyaleka iniabya mukulu wabo; nĩkwa mwatahĩka oko basatu bʼerĩmbere.

²⁰ Na Benaya, mugala wa Yehoyada mugala wʼembangĩ wʼeKabũzeelĩ, oyo wakola emĩbĩrĩ eyĩkalĩre, yo wĩta abagala babiri ba Arĩelĩ wʼeMoabũ; naye mwandagala neryo mwĩta endale yʼomo buhya omo kiro kyʼeritsuku lyʼenzururu.

²¹ Kandi mwĩta Omũmĩsĩrĩ, omundu wʼerĩswekya. Omũmĩsĩrĩ abya nʼerĩtũmo omo byala biwe; nĩkwa iye mwamwandagalirako nʼomũtso, kandi mwabakula erĩtũmo omo byala byʼOmũmĩsĩrĩ, mwamwĩta mulyo.

²² Benaya mugala wa Yehoyada, mwakola emyatsi eyĩ, ĩnĩakũmayĩre ngʼesyombangĩ ĩsatu.

²³ Abya wʼerĩsĩkĩbwa kwilaba amakũmĩ asatu, nĩkwa mwatahĩka oko basatu bʼerĩmbere. Kandi Dawĩdĩ mwamuyira mo mukulu wʼabateya buwe.

²⁴ Asahelĩ mugala wabo Yoabũ abya muguma gʼoko makũmĩ asatu; na Elhananĩ mugala wa Dodo wʼeBetelehemũ,

²⁵ Sama Omũharodĩ, Elĩka Omũharodĩ,

²⁶ na Helezĩ Omũpalĩtũ, na Ĩra mugala wa Ĩkesĩ Omũtekoa,

²⁷ na Abĩezerĩ Omũanatotĩ, na Mebũnaĩ Omũhũsa,

²⁸ na Zalmonĩ Omũahohĩ, na Maharaĩ Omũnetofatĩ,

²⁹ na Helebũ mugala wa Baana Omũnetofatĩ, na Ĩtaĩ mugala wa Rĩbaĩ wʼeGĩbea gʼoko bana ba Benyamĩna,

³⁰ na Benaya Omũpĩratonĩ, na Hĩdaĩ wʼesyonyũsĩ sya Gaasĩ,

³¹ na Abĩ-albonĩ Omũarbatĩ, na Azĩmavetĩ Omũbarũmĩ,

³² na Elĩaba Omũsaalbonĩ, abagala ba Yasenĩ, na Yonatana,

³³ na Sama Omũhararĩ, na Ahĩamũ mugala wa Sararĩ Omũararĩ,

³⁴ na Elĩfeletĩ Omugala wa Ahasũbaĩ, mugala wa Mũmakatĩ, na EHamũ mugala wa Ahĩtofelĩ Omũgĩlonĩ,

³⁵ na Hezronĩ Omũkaramelĩ, na Paraĩ Omũarũbĩ,

³⁶ na Ĩgalĩ mugala wa Natana wʼeZoba, na Banĩ Omũgadĩ,

³⁷ na Zelekĩ Omũamonĩ, na Naharaĩ Omũbeerotĩ, abahekĩ bʼebyuma byʼamalwa bya Yoabũ mugala wa Zerũya,

³⁸ na Ĩra Omũĩtũrĩ, na Garebe Omũĩtũrĩ,

³⁹ na Ũrĩa Omũhĩtĩ; abosĩ makũmĩ asatu nʼabalinda.