2 Samwelĩ 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akapipa Nyamuhanga omo lwimbo

¹ Neryo Dawĩdĩ mwabwira Omwami Mukulu ebĩnywa byʼolwimbo olũ omo kiro ekyo Mwami Mukulu amũlamaya omo byala byʼesyonzĩgũ siwe syosĩ, nʼomo byala bya Saũlo.

² Neryo mwabũga ati, Omwami Mukulu nĩ mũlamya wage, nʼahakagatĩre nage, omũlamya wage;

³ Nyamuhanga wage, yukanyihanganira, ngamusagirako; Iye ni ngabo yage, nʼoyukanyimira, ni busagiro bwage, Nĩ mũlamya wage, oyũkandamaya oko bitsibu.

⁴ Ngandilakira Omwami Mukulu, oyutolere eripipwa; Ko nasyalamĩbwa nyitya oko nzĩgũ syage.

⁵ Kusangwa ebisunda byʼoluholo mobyanyĩtĩmbako; Nʼerigunga lyʼerĩherya molyanũbahya.

⁶ Emikoba yʼeKũlĩmũ moyanyĩtĩmbako; Ebitego byʼoluholo mobyanyibambira.

⁷ Omo bũlĩge bwage monalakira Omwami Mukulu; Ega, monalakira Nyamuhanga wage; Naye mowa omulenge wage omo Hekalũ yiwe, Nʼekiriro kyage busana nʼerĩwatĩkĩbwa mokyahĩka omo matwĩ wuwe.

⁸ Neryo ekihuga mokyasũkana nʼerititimana, Ebibanza byʼelubula mobyatengatengana Mobyasũkana, kusangwa mwahitana.

⁹ Mohahetuka omũkĩ akalũa omo mihuli yiwe, Nʼomuliro owakalũa omo buno buwe mwahĩsya. Amakala mwaka mugo.

¹⁰ Mũnamya olubula nibya neryo mwandagala; Nʼomwĩrĩmya wʼenyahĩnda abya omwisi wʼebisando biwe.

¹¹ Kandi mwagenda oko kerũbĩ, mwaguluka; Ega, mwabutuka oko bĩpũpa byʼerihunga.

¹² Kandi mwayira omwĩrĩmya mo manyũmba wʼerĩmũtĩmbako, Ebireko byʼamagetsi, ebĩtũ byʼomususa byʼekyanya.

¹³ Okwʼĩkangabasanĩa embere siwe, Amakala wʼomuliro mwakĩbwa,

¹⁴ Omwami Mukulu mwalũmĩra omo kyanya. NʼOwendata Kutsibu mwabũya omulenge wuwe.

¹⁵ Mwalasa emisoha yiwe, mwapanza-panzayo; Omwʼĩpalya, mwahigabo.

¹⁶ Neryo emigende yʼomo ngetsi moyahuluka, Nʼebibanza byʼekihugo mobyaswikulwa, Busana nʼerikunga lyʼOmwami Mukulu, Omo muyaga wʼomuka wʼenĩndo yĩwe.

¹⁷ Mwatuma erĩlũa endata, mwanyĩmya; Mwanyisabula omo magetsi mangi;

¹⁸ Mwanyĩlamya oko nzĩgũ yage eyĩkalĩlire, Ukwʼabo abanyĩkwa obusu; Kusangwa babya banyĩrengĩrye kagala.

¹⁹ Mobanyĩhĩkako oko kiro kyʼobuligo bwage; Nĩkwa Omwami Mukulu mwabya kĩhambĩrĩryo kyage.

²⁰ Mwanyĩhũlũkya ahate bwĩko; Mwanyĩlamya, kusangwa anyitsemera,

²¹ Omwami Mukulu mwanyihemba ngʼeritunganene ryage; Abirinyiriha kusangwa Sindi nʼomusango.

²² Kusangwa nabirikwama esyonzira syʼOmwami Mukulu, Sinditaketa Nyamuhanga wage.

²³ Kusangwa nabirikwama ebilayiro biwe byosĩ; Kandi emigambo yiwe, sĩndĩtasĩgayo.

²⁴ Nabya nyĩhĩkene embere siwe; Kandi monayĩteya oko bibi byage.

²⁵ Neryo Omwami Mukulu abirinyiriha ngʼeritunganene ryage, Ngʼeriera lyage omo meso wuwe.

²⁶ Oko babuya wasyayĩkangya mo mubuya, Nʼoko mundu oyũhĩkene wasyayĩkangya oyũhĩkene;

²⁷ Oko yo werĩre wasyayĩkangya ngʼoyo werĩre; Nʼahali oyũhengemĩre wasyayĩkangya ngʼoyũkalĩre.

²⁸ Kandi wasyalamya bandu abakagalawa; Nĩkwa ekitsule kyawe kiri oko yukayiheka iwaminya erĩkehyabo.

²⁹ Kusangwa uli tala yage, uwe Mwami Mukulu; Kandi Omwami Mukulu asyakolerya omwĩrĩmya wage.

³⁰ Kusangwa busana nawe ngalaba omo mulondo; Busana na Nyamuhanga wage ngalenga oko lũhĩmbo.

³¹ Nĩkwa Nyamuhanga, enzira yiwe ĩhĩkene; Ekĩnywa kyʼOmwami Mukulu kikalengawako; Iye ni ngabo busana nʼabosĩ abakamusagirako.

³² Kusangwa Nyamuhanga nindi, ate Mwami Mukulu kwehĩ? Nʼoyukatulwira nindi ate Nyamuhanga wetu kwehĩ?

³³ Nyamuhanga ni hʼerisagira lyage erĩkalĩre; Akasondola abahĩkene omo nzira yiwe.

³⁴ Akayira ebisando byage ngʼebyʼengabi, Akanyĩhanganaya buholo oko bitwa.

³⁵ Akĩgĩsaya ebyala byage erilwa, Kikaleka ebyala byage ĩbyakondomya obuta bwʼomulinga

³⁶ Kandi wabirimba engabo yʼerilamya lyawe; Nʼerĩwatĩkya lyawe lyabirinyiyira mo mukulu.

³⁷ Wabĩrĩhĩra omwanya busana nʼebisando byage, Nʼebisando byage sibyetatendera.

³⁸ Monatibita oko nzĩgũ syage, nʼerĩheryasyo; Kandi mondasubula nde natĩndabo.

³⁹ Nabiribugabo ngĩtabo, sibetasyahangana; Ega, syabiriwa omwisi wʼebisando byage.

⁴⁰ Kusangwa wabirimba amaka wʼerilwa; Wabĩrĩkondomerya ahisi hʼesyonzĩgũ syage.

⁴¹ Wabirireka esyonzĩgũ syage ĩsyanyĩlolya kwʼemigongo, Ngaheraya abakanyĩkwa obusu.

⁴² Mobakeba-keba, nĩkwa sihali wangalamyabo; Mobasamalira oko Mwami Mukulu, nĩkwa mwatasũbĩryabo.

⁴³ Neryo monatũndũlabo mo hike-hike ngʼolũtũtũ lwʼekitaka, Monahĩndabo nʼeriryatangirirabo ngʼolondo omo syonzira.

⁴⁴ Wabĩrĩnyĩlamya okwʼinegena lyʼabandu bage; Wabirinyibika eribya mukulu wʼebihanda; Abandu ndasĩ basyanyikolera.

⁴⁵ Abʼehali bakatenya bati bakanyikenga, Omugulu bakanyowa, bakanyikenga.

⁴⁶ Abʼehali basyahwerekerera, Basyahuluka ahakagatĩre habo ibanemutitimana.

⁴⁷ Omwami Mukulu aneho; mupipe oyukanyimira; Nyamuhanga nĩ mũlamya wage wʼamaka, ahamĩbawe.

⁴⁸ Nyamuhanga yũkanyĩkĩsĩraya, Oyũkakinda esyonzĩgũ syage,

⁴⁹ Nʼoyũkanyĩlũsaya omo nzĩgũ syage; Ega, ukanyisumbira endata oko bandu abakanyibambira; Ũkanyĩlamaya oko mundu wʼomwaga.

⁵⁰ Neryo ngandiha ewasĩngya ukʼuwe Mwami Mukulu, omo katĩkatĩ kʼebihanda, Ngandimbira erĩna lyawe nʼeripipalyo.

⁵¹ Akaha omwami wuwe erĩkĩnda lĩnene, Akakangaya obubuya buwe bwʼolwanzo oko mundu oyo abiriyisoga, Uku Dawĩdĩ nʼoko bana buwe, kera na kera.