2 Samwelĩ 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Enzala yʼemyaka ĩsatu

¹ Neryo mohabya enzala oko biro bya Dawĩdĩ oko myaka ĩsatu ikwamirirene; neryo Dawĩdĩ mwasonda-sonda Omwami Mukulu. Neryo Omwami Mukulu mwabũga ati, Ni busana na Saũlo, na busana nʼekĩtũnga kiwe kyʼolubanza lwʼomusasi, kusangwa mwĩta Abagĩbeonĩ.

² Neryo omwami mwabirikira Abagĩbeonĩ mwabwirabo [nĩkwa Abagĩbeonĩ sibabya bʼoko bana ba Ĩsraelĩ nĩkwa abasĩgalira abʼoko Baamorĩ; nʼabana bʼeĨsraelĩ ĩbamabĩlahĩrĩryabo; na Saũlo mwasonda erĩĩtabo omo bũha busana nʼabana ba Ĩsraelĩ na Yũda].

³ Na Dawĩdĩ mwabũlya Abagĩbeonĩ ati, Ngandibakolerakĩ kwehĩ? Nangahanulakĩ imomwatoka eritsumula bandu bʼOmwami Mukulu kwehĩ?

⁴ NʼAbagĩbeonĩ mobamubwira bati, Si mwatsi wʼebĩtsĩpa kutse wʼesyamagetsi omo katĩkatĩ ketu na Saũlo kutse ekĩtũnga kiwe; kandi si mwatsi wetu erĩĩta mundu omo Ĩsraelĩ. Neryo Dawĩdĩ mwabũga ati, Ekyo mwasyabũga kyo nasyabakolera.

⁵ Neryo mobabwira omwami bati, Omundu oyo watubuga, nʼoyo wayĩsũnza ati, tũherĩbawe situbye omo mitano yosĩ ya Ĩsraelĩ,

⁶ tuhabawe abalume balinda oko bagala buwe, netu tukandisyahanikabo embere syʼOmwami Mukulu eGĩbeonĩ ewa Saũlo, omuyisogwa wʼOmwami Mukulu. Neryo omwami mwabũga ati, Ngandibahabo.

⁷ Nĩkwa omwami mwabalya Mefĩbosetĩ, mugala wa Yonatana mugala wa Saũlo, busana nʼerĩlahĩrya lyʼOmwami Mukulu eryabya omo katĩkatĩ kabo, omo katĩkatĩ ka Dawĩdĩ na Yonatana mugala wa Saũlo.

⁸ Nĩkwa omwami mwahamba abagala babiri ba Rĩzĩpa mwali wa Aĩa, abo abutira Saũlo, Armonĩ na Mefĩbosetĩ; kandi abagala batanu ba Mĩkalĩ mwali wa Saũlo, abo abutira Adrĩelĩ mugala wa Barzĩlaĩ Omũmeholatĩ.

⁹ Neryo mwahabo omo byala byʼAbagĩbeonĩ, nabo mobahanikabo oko kitwa embere syʼOmwami Mukulu, abalinda bosĩ mobahola haguma. Kandi mobĩtwa omo biro byʼerigesa, omo biro byʼerĩmbere, okwʼĩtsũka lyʼerigesa ekisusu.

¹⁰ Na Rĩzĩpa mwali wa Aĩa mwĩmya olukimba lwʼomutole, mwayisanziralo okwʼĩbwe, okwʼĩtsũka lyʼerigesa nʼerĩhĩka omugulu wʼeriwa lyʼembũla; kandi mwatalĩga esyonyonyũ sĩkĩkyĩra kubo omo musibo, kutse esyonyama syʼomolĩ omo kiro.

¹¹ Kandi Dawĩdĩ abwirawa ekyo Rĩzĩpa mwali wa Aĩa, omũhwekĩ wa Saũlo, akola.

Dawĩdĩ akahũmaya amakũha wa Saũlo na Yonatana

¹² Neryo Dawĩdĩ mwayenda makũha wa Saũlo nʼawa Yonatana mugala wuwe omo byala byʼabandu bʼeYabesĩ-gĩleadĩ, abĩbago omo nzira yʼeBetĩ-sanĩ, aho Abafĩlĩstĩnĩ bahanikabo, ekiro Abafĩlĩstĩnĩ bĩtĩra Saũlo eGĩlboa.

¹³ Kandi mwaleta amakũha wa Saũlo nʼamakũha wa Yonatana mugala wuwe, mobahĩndanĩa makũha wʼabahanikawa.

¹⁴ Neryo mobata amakũha wa Saũlo nʼawa Yonatana mugala wuwe omo kihugo kya Benyamĩna eZela, omwʼisinda yʼĩse wuwe Kĩsĩ; mobaberererya ebyosĩ omwami ahana. Nʼenyũma wʼaho Nyamuhanga mowa erisaba lyabo busana nʼekihugo.

Amalwa omo katĩkatĩ ka Ĩsraelĩ nʼAbafĩlĩstĩnĩ

¹⁵ Neryo omugulu Abafĩlĩstĩnĩ balwa kandi nʼeĨsraelĩ; Dawĩdĩ mwandagala nʼabagombe buwe, mobalwa nʼAbafĩlĩstĩnĩ, neryo Dawĩdĩ mwaluha.

¹⁶ Neryo Ĩsĩbĩbenobĩ, oyo wabya gʼoko bali-bali, obũlĩto bwʼerĩtũmo liwe bwabya sekelĩ syʼemiringa magana asatu, iniambite omũyalĩ muhya-muhya, mwasonda erĩĩta Dawĩdĩ.

¹⁷ Nĩkwa Abĩsayĩ mugala wa Zerũya mwamũwatĩkya, mwaswĩrya Omũfĩlĩstĩnĩ, mwamwĩta. Neryo abalume ba Dawĩdĩ mobalahĩrya bati, Susyesyagenda haguma netu omo malwa, ũkasyalĩmya amaha wʼeĨsraelĩ.

Dawĩdĩ akakĩnda esyombangĩ

¹⁸ Neryo enyũma wʼebyo mohaswabya awandi malwa nʼAbafĩlĩstĩnĩ eGobũ; neryo Sĩbekaĩ Omũhũsatĩ mwĩta Safũ oyo wabya gʼoko bagala ba Rafahĩ.

¹⁹ Kandi mohaswabya amalwa nʼAbafĩlĩstĩnĩ eGobũ; na Elhananĩ mugala wa Yare-oregĩmũ Omũbetelehemũ, mwĩta Golĩata Omũgĩtĩ, olumango lwʼerĩtũmo liwe lwabya ngʼomuti wʼomũlũkĩ.

²⁰ Kandi mohabya awandi malwa eGatĩ, ahabya omundu muli-muli, abya awite esyondato oko buli byala, nʼesyondato oko buli kisando, eriganzabyo nĩ makũmĩ abiri nʼĩnĩ; naye abutawa uku Rafahĩ oyo.

²¹ Nʼomugulu asunata Ĩsraelĩ, Yonatana mugala wa Sĩmeĩ, mugala wabo Dawĩdĩ, mwamwĩta.

²² Abanĩ aba babutawa eGatĩ nʼomundu muli-muli oyo, na Dawĩdĩ nʼabagombe buwe mobĩtabo.