2 Samwelĩ 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Embĩta nyibi ya Seba

¹ Kandi mohahuluka omundu mutya-mutya, erĩna liwe iyo Seba mugala wa Bĩkũrĩ, Omũbenyamĩna; naye mwabuha engubi, ati, Situli nʼoluhande na Dawĩdĩ, kutse situwite omwandu uku mugala wa Yese; ĩnywe Baĩsraelĩ, obuli mundu aye omo hema yiwe.

² Neryo abandu bosĩ bʼeĨsraelĩ mobaleka erikwama Dawĩdĩ, mobakwama Seba mugala wa Bĩkũrĩ; nĩkwa bandu ba Yũda mobakwama omwami wabo erĩlũa eYorodanĩ erĩhĩka eYerũsalema.

³ Neryo Dawĩdĩ mwahĩka omo nyũmba yiwe eYerũsalema; nʼomwami mwĩmya abakalĩ ĩkũmĩ abahwekĩ buwe, abo asĩga erĩteya enyũmba yiwe, neryo mwahĩrabo omo nyũmba yʼerĩteyĩbwa, kandi mwahabo ebyʼerirya, nĩkwa mwatahĩka aho bali. Neryo mobakingirwamo erĩhĩka ekiro kyʼoluholo lwabo, mobabyaho omo bũkwakalĩ.

Yoabũ akĩta Amasa

⁴ Neryo omwami mwabwira Amasa ati, Unyibirikirire abandu ba Yũda bahĩndane oko biro bisatu, nawe ubye hano.

⁵ Na Amasa mwayabirikira Abayũda; nĩkwa mwalabya oko biro amulaga.

⁶ Neryo Dawĩdĩ mwabwira Abĩsayĩ, ati, Lino Seba mugala wa Bĩkũrĩ asyatwagalya nabi kwilaba Abũsaloma; wĩmaye abagombe bʼomukama wawe, umukwamirire, akasyayibanira emĩyĩ ĩkagatĩre akayĩbalya omo meso wetu.

⁷ Nʼabandu ba Yoabũ mobahuluka mobamukwama, nʼAbakeretĩ, nʼAbapeletĩ, nʼesyombangĩ syosĩ; mobalũa eYerũsalema, eriyakwama Seba mugala wa Bĩkũrĩ.

⁸ Nʼomugulu babya okwʼĩbwe ĩnene eriri eGĩbea, Amasa mwasyahĩndana nabo. Kandi Yoabũ abya ambite esyongimba siwe syʼamalwa, ĩnĩakũndĩkĩre omukoba, nʼomũyalĩ iniane omo lubo ĩnĩakũndĩkĩre oko ndungu yiwe, nʼomugulu abya akagenda omũyalĩ wuwe mwakulika mwatoga.

⁹ Na Yoabũ mwabũlya Amasa ati, Ni buholo ukʼuwe kwehĩ mugala wetu? Neryo Yoabũ mwahamba Amasa omo nderũ omo byala biwe byʼamali erimulyatsirira.

¹⁰ Nĩkwa Amasa mwatalebya omũyalĩ owabya omo byala bya Yoabũ; neryo mwalũbago omo kabunda, mũta amala wuwe wʼahisi, mwatasyamũswĩrya; neryo Amasa mwahola. Na Yoabũ na Abĩsayĩ mugala wabo mobakwamirira Seba mugala wa Bĩkũrĩ.

¹¹ Kandi mohahangana hakũhĩ na Amasa omuguma gʼoko balwana ba Yoabũ Mwabũga ati, Oyo wanzĩre Yoabũ, nʼoyuli oko luhande lwa Dawĩdĩ akwame Yoabũ.

¹² Na Amasa abya agalamĩre omo musasi wuwe omo katĩkatĩ kʼembalu. Nʼomugulu omundu oyo alangira abandu bosĩ ko bimene, iye mwaheka Amasa erĩmũlũsya omo mbalu mwamũhĩra okolĩ, mwamuswika olukimba, omugulu alangira obuli mundu wahĩkaho akahangana.

¹³ Kandi Amasa abere abĩlũsĩbwa omo mbalu, abandu bosĩ mobakwama Yoabũ, erikwamirira Seba mugala wa Bĩkũrĩ.

Seba akĩtawa

¹⁴ Neryo Yoabũ mwalaba omo bihanda byosĩ byʼAbaĩsraelĩ erĩhĩka eAbelĩ, nʼeBetĩ-maka, nʼoko Baberĩtĩ bosĩ; nabo mobahĩndanĩbwa haguma eriyamukwamirira.

¹⁵ Neryo mobasa mobamugotera eAbelĩ wʼeBetĩ-maka, kandi mobalundaho ekilundo kyʼomutaka oko mũyĩ, nakyo mokyegemera oko hakangatĩre hakyo; nʼabandu bosĩ ababya haguma na Yoabũ mobatobongola olũhĩmbo, erĩtererya lwʼahisi.

¹⁶ Neryo omũkalĩ wʼamenge gʼoko mũyĩ oyo mwabirikira, ati, Mowe, mowe; ngababũlaya, munyibwirire Yoabũ muti, ase hakũhĩ, ngabũge naye.

¹⁷ Naye mwaya hakũhĩ naye; nʼomũkalĩ mwamũbũlya ati, Uwe Yoabũ kwehĩ? Naye mwasũbĩrya ati, Nĩ ĩngye. Neryo mwamubwira ati, Wowe ebĩnywa byʼomutsana wawe. Naye mwasũbĩrya ati, Nyĩnowĩre.

¹⁸ Neryo mwabũga ati, Oko mugulu wa kera bagenda bakabũga bati, Basyabũlya erĩhano lyʼeAbelĩ; omwatsi iniahweraho.

¹⁹ Ĩngye indi omo katĩkatĩ kʼabandu bʼobuholo nʼogʼoko bateregula omo Ĩsraelĩ. Ĩnywe mukasonda erĩherya omũyĩ na nyĩnya muguma omo Ĩsraelĩ. Busana nakĩ mukasonda erĩherya omwandu wʼOmwami Mukulu kwehĩ?

²⁰ Neryo Yoabũ mwasũbĩrya ati, Tandũsyaho, kibye hali kwʼĩngye, erĩtsandya kutse erĩherya!

²¹ ko bite bitya. Nĩkwa omundu wʼekihugo kyʼebitwa kyʼeEfũraĩmũ, oyukahulawa mo Seba mugala wa Bĩkũrĩ, abiripona omwami, ye Dawĩdĩ; mũmũhũlũkaye ĩyowene, nage ngandĩlũa oko mũyĩ. Neryo omũkalĩ oyo mwabwira Yoabũ ati, Omutwe wuwe akandĩrengerĩbwa ũkwʼĩnywe oko lũhĩmbo.

²² Neryo omũkalĩ oyo mwaya eyiri abandu bosĩ nʼamenge wuwe. Neryo mobatwa omutwe wa Seba mugala wa Bĩkũrĩ, mobagusirago Yoabũ. Neryo Yoabũ mwabuha engubi, neryo abandu mobalũa oko mũyĩ oyo, obuli mundu mwaya eka wuwe. Na Yoabũ nibya mwasuba eYerũsalema oko mwami.

Abakulu ba Dawĩdĩ

²³ Nĩkwa Yoabũ yo wabya mukulu wʼomulondo gosĩ wʼabasĩrĩkanĩ bʼeĨsraelĩ; na Benaya mugala wa Yehoyada abya mukulu wʼAbakeretĩ nʼAbapeletĩ;

²⁴ na Adoramũ abya mukulu wʼabakobe; na Yosafatĩ mugala wa Ahĩlũdĩ abya mũhandĩkĩ wʼebitabu;

²⁵ na Seva abya mũhandĩkĩ; na Zadokĩ na Abĩatarĩ babya bahererĩ;

²⁶ na Ĩra Omũyaĩrĩ, yo wabya mũhererĩ wa Dawĩdĩ nibya.