2 Samwelĩ 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Yoabũ akakunga Dawĩdĩ eririra Abũsaloma

¹ Kandi Yoabũ mwabwirwa ambu, Omwami akalira nʼerĩsũsũmanira Abũsaloma.

² Nʼerĩkĩnda lyʼekiro ekyo molyahinduka mwʼĩsũsũmana oko bandu bosĩ; kusangwa bandu mobowa ekiro ekyo ambu, Omwami akwĩre bũlĩge busana na mugala wuwe.

³ Nʼabandu mobingira omo mũyĩ ekiro ekyo mo bũbĩsobĩso, nga bandu bakwĩre esĩsonĩ bakatibita bakombomba nga bakasaga amalwa.

⁴ Kandi omwami mwaswika obũsũ buwe, neryo omwami mwalira nʼomulenge munene, ati, Uwe mugala wage Abũsaloma, Uwe Abũsaloma mugala wage, mugala wage!

⁵ Neryo Yoabũ mwingira omo nyũmba ahali omwami, ati, Mũnabwĩre wabirihemula abagombe bawe bosĩ, ababĩrĩlamya engebe yawe mũnabwĩre, nʼengebe yʼabagala bawe nʼabali bawe, nʼengebe yʼabagala bawe nʼabali bawe, nʼengebe yʼabakalĩ bawe, nʼengebe yʼabahwekĩ bawe;

⁶ kusangwa wabirianza abakũkwĩre obusu, kandi wabĩrĩkwa abamũnabwĩre, uti, abanya-mwami nʼabagombe ni buyira busana nawe. Kusangwa mũnabwĩre namaminya kumbe Abũsaloma ngʼalyabyaho, netu ĩtwe bosĩ nga twabirihola mũnabwĩre, byangakũtsemesĩrye ndeke.

⁷ Neryo lino uhangane, uhuluke, ũbũge ebĩkakĩranaya abagombe bawe; kusangwa ngalahĩrĩraya oko Mwami Mukulu, wamatendihuluka sĩhendĩsyasĩgala mundu nʼomugama haguma nawe omo kiro ekĩ; nʼekyo kyasyakala kwilaba ebibi byosĩ ebyabĩrĩkũhĩkako erĩtsũka omo bũlwana bwawe nʼerĩhĩka lino.

⁸ Neryo omwami mwahangana, mwĩkala oko lũkyo. Neryo omugulu babwira abandu bati, Lebaya, omwami ĩkere oko lũkyo; neryo abandu bosĩ mobahĩka embere syʼomwami. Nĩkwa Abaĩsraelĩ babya ibabiritibita obuli mundu omo hema yiwe.

⁹ Nʼabandu bosĩ babya ibakakuba obuhaka omo bihanda byosĩ bya Ĩsraelĩ, bati, Omwami mwatũlamya omo byala byʼesyonzĩgũ syetu, kandi mwatũlamya omo byala byʼAbafilĩstĩnĩ; na lino abirisaga Abũsaloma erĩlũa omo kihugo.

¹⁰ Nĩkwa Abũsaloma, oyo twahakabaya magũta tuti atutabale, abiriholera omo malwa. Na lino busana nakĩ mwabere bũkũtũ okwʼĩsũbũlya omwami Dawĩdĩ kwehĩ?

Bakasũbaya Dawĩdĩ yʼewuwe

¹¹ Neryo omwami Dawĩdĩ mwatuma uku Zadokĩ na Abĩatarĩ abahererĩ ati, Mũbũge nʼabakulu bʼAbayũda, muti, Busana nakĩ mwabere bʼenyũma-nyũma okwʼireta omwami omo nyũmba yiwe kwehĩ? Kusangwa ebĩnywa byosĩ byʼAbaĩsraelĩ bosĩ byabĩrĩhĩka oko mwami erimuleta omo nyũmba yiwe.

¹² Ĩnywe muli bagala betu, ĩnywe muli makũha wage nʼomũnyokũ wage; neryo busana nakĩ muli bʼenyũma-nyũma okwʼireta omwami kandi kwehĩ?

¹³ Kandi mubwire Amasa, muti, Suli ĩkũha lyage nʼomũnyokũ wage kwehĩ? Nyamuhanga anyikole atya, na kwilaba aho, nga siwendibya mukulu wʼomulondo embere syage ebiro byosĩ omo mwanya wa Yoabũ.

¹⁴ Litya mwabindula emitima yʼabandu bosĩ ba Yũda ngʼomutima wʼomundu muguma; kyaleka ibatumira oko mwami, bati, Usubule nʼabagombe bawe bosĩ.

¹⁵ Neryo omwami mwasubula, mwahĩka eYorodanĩ. NʼAbayũda bosĩ mobasa eGilgalĩ, erĩyahĩndana nʼomwami, erĩmũsokya eYorodanĩ.

Eribikula lya Sĩmeĩ

¹⁶ Neryo Sĩmeĩ mugala wa Gera, Omũbenyamĩna, oyo wabya wʼeBahũrĩmũ, mwanguha mwandagala nʼabalume bʼeYũda erĩyahĩndana nʼomwami Dawĩdĩ.

¹⁷ Kandi abya nʼabalume ba Benyamĩna haguma naye elfu nguma, (1,000) na Zĩba omugombe wʼekĩtũnga kya Saũlo, nʼabagala buwe ĩkũmĩ nʼabatanu nʼabagombe buwe makũmĩ abiri haguma naye; kandi mobasoka eYorodanĩ embere syʼOmwami.

¹⁸ Kandi obwato mobwasoka erĩyasokya ekĩtũnga kyʼOmwami nʼerikola ebyo abya akasĩma. Neryo Sĩmeĩ mugala wa Gera mwawa ahisi embere syʼOmwami abisoka eYorodanĩ.

¹⁹ Neryo mwabwira omwami ati, omukama wage sianyiganzire erĩlolo, kutse syibuke ebyo mugombe wawe akola nabi ekiro ekyo mukama wage mwami alũa eYerũsalema, ati omwami akahĩrabyo oko mutima wuwe.

²⁰ Kusangwa omugombe wawe anasĩ ko nabĩrĩhalya; neryo, lebaya namasa mũnabwĩre mo wʼembere owʼekĩtũnga kya Yosefũ erĩyahĩndana nʼomukama wage omwami.

²¹ Nĩkwa Abĩsayĩ mugala wa Zerũya mwasũbĩrya mwabũga ati, Kwe Sĩmeĩ sĩendĩkwa busana nʼeritsuma oyo Mwami Mukulu ayisoga mo mwami kwehĩ?

²² Neryo Dawĩdĩ mwabũga ati, ko ngandikolakĩ nenyũ ĩnywe bagala ba Zerũya, muti mũnabwĩre mukabya nzĩgũ syage kwehĩ? Hane oyo wangĩtwa omo Ĩsraelĩ mũnabwĩre kwehĩ? Kusangwa Sĩnyasĩ ko ndi mwami wa Ĩsraelĩ mũnabwĩre kwehĩ?

²³ Neryo omwami mwabwira Sĩmeĩ ati, sĩwendĩkwa. Neryo omwami mwamũlahĩrĩrya.

Mefĩbosetĩ akayahĩndana nʼomwami

²⁴ Kandi Mefĩbosetĩ mugala wa Saũlo mwandagala erĩyahĩndana nʼomwami; kusangwa abya ĩsĩalĩterya ebisando biwe, kutse erĩtwa esyonderũ siwe, kutse erĩerya esyongimba siwe, erĩtsũka ekiro mwami agenda erĩhĩka ekiro asuba eka yo buholo.

²⁵ Neryo omugulu ahĩka eYerũsalema erĩhĩndana nʼomwami, omwami mwamũbũlya ati, Busana nakĩ mutagenda nage kwehĩ Mefĩbosetĩ?

²⁶ Naye mwamũsũbĩrya ati, Mukama wage mwami, omugombe wage mwandeba; kusangwa omugombe wawe mwabũga ati, Ngandiyisesera epunda inatoka erigenda kuyo, inagenda nʼomwami; kusangwa omugombe wawe alehemĩre.

²⁷ Kandi abirinyirega oko mukama wage omwami; nĩkwa omukama wage mwami ali ngʼomũlaĩka wa Nyamuhanga. Neryo Ukole ekĩsĩmĩrwe omo meso wawe.

²⁸ Kusangwa abosĩ bʼekĩtũnga kya tata balwe ngʼabandu bʼoluholo embere syʼOmukama wage mwami; nĩkwa mowahĩra omugombe wawe omo katĩkatĩ kʼabakalira oko mesa yawe. Ngwite hamũlĩ yahi erisyalakira omwami kwehĩ?

²⁹ Neryo omwami mwamubwira ati, Busana nakĩ ukasuba omo myatsi yawe kwehĩ? Nabĩrĩbũga nyiti, Uwe na Zĩba mugabane ekihugo.

³⁰ Na Mefĩbosetĩ mwabwira omwami ati, Ega, ĩmaye ekyosĩ, kusangwa omukama wage ahĩkĩre eka wuwe yo buholo.

Barzĩlaĩ akalagana na Dawĩdĩ

³¹ Neryo Barzĩlaĩ Omũgĩleadĩ abya ĩnĩabĩrĩlũa eRogelĩmũ; neryo mwaya eYorodanĩ haguma nʼomwami, erĩsokya omwami yʼeYorodanĩ.

³² Kandi Barzĩlaĩ abya mũsyakulu kutsibu, iniawite myaka makũmĩ munani; kandi abya ĩyũkahũkĩra omwami omugulu abya eMahanaĩmũ; kusangwa abya mundu munene kutsibu.

³³ Neryo omwami mwabwira Barzĩlaĩ ati, Wase tusoke haguma nawe, nage ngandisyakubika haguma nage eYerũsalema.

³⁴ Kandi Barzĩlaĩ mwasũbĩrya omwami, ati, Nasyaswakota biro bingahi, uti nangahetukira eYerũsalema haguma nʼomwami kwehĩ?

³⁵ Mũnabwĩre indi wʼemyaka makũmĩ munani; nangatoka eriminyerera ekibuya nʼekibi kwehĩ? Omugombe wawe angatoka erĩgerya ebyo ngalya kutse ebyo ngapũlaya kwehĩ? Nangaswatoka erĩowa omulenge wʼabalume nʼabakalĩ abakimba kwehĩ? Omugombe wawe angaswalĩtohera omukama wage omwami busana nakĩ kwehĩ?

³⁶ Omugombe wawe anzĩre erisoka eYorodanĩ haguma nʼomwami lisa; nʼomwami angaswandiha nʼoluhembo lungaha busana nakĩ kwehĩ?

³⁷ Ngakũbũlaya, Uleke omugombe wawe, asubule, inaholera oko mũyĩ wage, ahali amahero wa tata na koyo. Nĩkwa lebaya omugombe wawe Kĩmũhamũ; uleke asoke haguma nʼomukama wage omwami; umukolere ebyo ũkasĩma.

³⁸ Nʼomwami mwamũsũbĩrya ati, Kĩmũhamũ akandisoka haguma nage, nage ngandimukolera ebyo ũsĩmĩre; nʼekĩndũkĩ ekyo wasyanyisondako, nasyakukolerakyo.

³⁹ Nʼabandu bosĩ mobasoka eYorodanĩ, nʼomwami mwasoka; nʼomwami mwalyatsirira Barzĩlaĩ, mwamutsumula; naye mwasuba ewuwe.

Obũha omo katĩkatĩ kʼeĨsraelĩ nʼe Yũda

⁴⁰ Neryo omwami mwasokera eGĩlgalĩ, na Kĩmũhamũ mwagenda haguma naye; nʼabandu bosĩ ba Yũda, nʼekihande kyʼabandu ba Ĩsraelĩ mobagenda haguma nʼomwami.

⁴¹ Neryo, abandu bosĩ ba Ĩsraelĩ mobayasangana nʼomwami, mobabwira omwami bati, Busana nakĩ abagala betu abandu bʼeYũda bakwĩba, nʼerĩsokya omwami eYorodanĩ nʼekĩtũnga kiwe, nʼabandu bosĩ ba Dawĩdĩ haguma naye kwehĩ?

⁴² Nʼabalume bʼeYũda mobasũbĩrya balume ba Ĩsraelĩ bati, Kusangwa omwami ni wʼekihanda kyetu; neryo mukahitanira omwatsi oyũ busana nakĩ kwehĩ? twanalĩre oko kalyo kʼOmwami kwehĩ? kutse atuhere lũsũnzo lwahi kwehĩ?

⁴³ Nʼabalume bʼeĨsraelĩ mobasũbĩrya balume ba Yũda bati, Ĩtwe tuwite magabo ĩkũmĩ oko mwami, neryo tũsĩngene uku Dawĩdĩ kwilaba nywe; neryo busana nakĩ mukatupona kwehĩ? Muti erĩhano lyetu sĩryangatsũka okwʼĩsũbũlya omwami wetu kwehĩ? Nʼebĩnywa byʼabandu bʼeYũda mobyakala kwilaba ebĩnywaʼbyʼabandu ba Ĩsraelĩ.