2 Samwelĩ 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Zĩba akalega Mefĩbosetĩ

¹ Kandi Dawĩdĩ abere abilaba oko singi yʼekitwa, Zĩba omugombe wa Mefĩbosetĩ mwahĩndana naye iniane nʼesyopunda ĩbĩrĩ ĩsĩnasesĩrwe, kandi ĩsĩhekĩre amandu magana abiri, nʼemisamo yũmĩre yʼebĩnyũ erĩgana, nʼebindi bĩgũma ĩgana byʼekipwa, nʼekihu kyʼebĩnyũ.

² Nʼomwami mwabũlya Zĩba, ati, Esĩ nĩ syakĩ kwehĩ? Na Zĩba ati, Esĩ ni syʼeriheka abʼekĩtũnga kyʼOmwami; nʼamandu nʼebĩgũma byʼekipwa nʼebyalya byʼabalwana; nʼebĩnyũ ni byʼabandu bakaluha erĩpũlĩryabyo omo mbwarara.

³ Neryo omwami mwabũga ati, Omugala wʼomukama wawe alihi kwehĩ? Neryo Zĩba mwamubwira ati, Lebaya, ĩkere eYerũsalema; kusangwa mwabũga ati, Mũnabwĩre ekĩtũnga kya Ĩsraelĩ kyasyanyĩsũbũlĩrya obwami bwa tata.

⁴ Neryo omwami mwabwira Zĩba ati, ebyosĩ bya Mefĩbosetĩ ni byawe. Neryo Zĩba mwabũga ati, Ngakũnamira; uleke nyibane eriganyirwa omo meso wawe, uwe omukama wage, uwe mwami!

Sĩmeĩ akatsuma Dawĩdĩ

⁵ Nʼomugulu omwami Dawĩdĩ ahĩka eBahũrĩmũ, mohahuluka omundu wʼomo kĩtũnga kya Saũlo, oyo wahulawa mo Sĩmeĩ, mugala wa Gera; mwahuluka, iniakamutsuma akasa.

⁶ Neryo mwagusa uku Dawĩdĩ kwʼamabwe, nʼoko bagombe bosĩ bʼomwami Dawĩdĩ; nʼabandu bosĩ, nʼesyombangĩ syosĩ mobabya oko byala biwe byʼamali nʼoko malembe.

⁷ Kandi Sĩmeĩ, mwabũga akatsuma ati, Ũlũaho, Ũlũaho, uwe mundu wʼomusasi, nʼomundu mutya-mutya.

⁸ Omwami Mukulu abĩrĩkũsũbũlĩrya omusasi gosĩ wʼekĩtũnga kya Saũlo, kandi wabiritabala omo mwanya wuwe; nʼOmwami Mukulu abĩrĩhĩra obwami omo byala bya mugala wawe Abũsaloma, kandi, wabirihambwa omo bubi bwawe, kusangwa uli mundu wʼomusasi.

⁹ Neryo Abĩsayĩ mugala wa Zerũya mwabwĩra omwami ati, Busana nakĩ embwa eyĩholĩre eyĩ ikatsuma omukama wage mwami kwehĩ? Uleke nyilabe nyĩmũlũsaye kʼomutwe wuwe.

¹⁰ Nʼomwami mwabũga ati, Nyiwite mwatsi wahi nenyũ ĩnywe bagala ba Zerũya kwehĩ? Amatsuma, kandi Omwami Mukulu amabya abirimubwira ati, Tsuma Dawĩdĩ; neryo nindi wasyabũga ati, Wamakola utya busana nakĩ kwehĩ?

¹¹ Neryo Dawĩdĩ mwabwira Abĩsayĩ nʼabagombe buwe bosĩ, atĩ, Mugala wage oyo mbũtĩre, akasonda-sonda engebe yage; Omũbenyamĩna oyo sĩangalabya kwʼaho kwehĩ? Mumuleke, kandi muleke atsume; kusangwa Omwami Mukulu abirimubwira.

¹² Mbino Omwami Mukulu asyalangira obũlĩge bwage, nʼerĩnyĩsũbũlĩrya ebibuya busana nʼeritakira liwe mũnabwire.

¹³ Neryo Dawĩdĩ nʼabandu buwe mobayitsingira enzira; na Sĩmeĩ naye mwalaba omo kitambi kyʼekitwa eyisirya wuwe, nʼeritsuma, nʼerimugusa kwʼamabwe, nʼerimugusa kwʼolũtũtũ.

¹⁴ Neryo omwami nʼabandu bosĩ ababya haguma naye, mobahĩka ibamaluha; naye mwaluhukiraho.

Erihana lya Hũsaĩ nʼerya Ahĩtofelĩ

¹⁵ Kandi Abũsaloma, nʼabandu bosĩ, abandu ba Ĩsraelĩ, mobahĩka eYerusalema, na Ahĩtofelĩ haguma naye.

¹⁶ Neryo omugulu Hũsaĩ, Omũarũkĩ, omwĩra wa Dawĩdĩ, ahĩka eyiri Abũsaloma, Hũsaĩ mwabwira Abũsaloma ati, Omwami akote! Omwami akote!

¹⁷ Na Abũsaloma mwabũlya Hũsaĩ ati, Obũ bo bubuya oko mwĩra wawe kwehĩ? Busana nakĩ mutagenda nʼomwĩra wawe kwehĩ?

¹⁸ Na Hũsaĩ mwabwira Abũsaloma ati, Iyihi! oyo Mwami Mukulu, nʼabandu aba, bʼAbaĩsraelĩ bosĩ babiriyisoga, nasyabya wuwe, kandi nasyĩkala naye.

¹⁹ Nʼakandi nangakolerandi kwehĩ? Sinangakola embere sya mugala wuwe kwehĩ? Ngoko nabirikolera embere sya tata wawe, ko nasyabya nyitya embere syawe.

²⁰ Neryo Abũsaloma mwabwira Ahĩtofelĩ ati, Utuhane ekyo tukole. Tukolekĩ kwehĩ?

²¹ Neryo Ahĩtofelĩ mwabwira Abũsaloma ati, Ingira ahali abahwekĩ ba tata wawe, abo asĩga erĩteya enyũmba; nʼAbaĩsraelĩ bosĩ basyowa ko wabiribya nye uku tata wawe. Neryo ebyala byʼabali haguma nawe bosĩ byasyakala.

²² Neryo mobabambira Abũsaloma yʼehema endata wʼenyũmba, neryo Abũsaloma mwingira oko bahwekĩ bʼĩse wuwe omo meso wʼAbaĩsraelĩ bosĩ.

²³ Nʼerĩhano lya Ahĩtofelĩ, oko biro ebyo, lyabya ngoko mundu akabũlaya ekĩnywa kya Nyamuhanga. Erĩhano lyosĩ lya Ahĩtofelĩ ahali Dawĩdĩ nʼahali Abũsaloma ko lyabya litya.