2 Samwelĩ 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Abũsaloma akatsotsaya emitima yʼabandu

¹ Nĩkwa enyũma wʼaho, Abũsaloma mwayĩkokoterya egalĩ nʼesyosabayĩrĩ, nʼabalume makũmĩ atanu eritibita embere siwe.

² Kandi Abũsaloma mwabuka omo ngyakya-ngyakya nʼerihangana oko mũsĩke wʼenzira yʼoko lũkyo; neryo omugulu omundu abya awite olubanza olo mwami angasoha, Abũsaloma mwamubirikira ati, Uli gʼoko mũyĩ wahi kwehĩ? Naye ati, Omugombe wawe ni muguma gʼoko bihanda byʼAbaĩsraelĩ.

³ Neryo Abũsaloma mwamubwira ati, Emyatsi yawe ni mibuya, itunganene; nĩkwa sihali mundu oyo mwami ahĩrĩreho erĩkowa.

⁴ Kandi Abũsaloma mwabũga ati, Kumbe nayirawa mo mũtswerĩ omo kihugo, neryo obuli mundu oyuli kʼolubanza kutse omwatsi iniatoka erĩnyĩhĩkako, nage inamusohera erĩbanza!

⁵ Neryo omugulu Omundundi ahĩka hakũhĩ erĩmũnamira, mwasumba ebyala biwe, mwamuhamba mwamulyatsirira.

⁶ Kandi omo mũsĩndo oyũ, Abũsaloma kwʼayĩra atya Abaĩsraelĩ bosĩ abasa oko mwami busana nʼerisoha omwatsi. Neryo Abũsaloma mwĩba emitima yʼabandu ba Ĩsraelĩ yʼatya.

Oluhota lwa Abũsaloma

⁷ Neryo enyũma wʼemyaka makũmĩ ani, Abũsaloma mwabwira omwami ati, Ngakũbũlaya, ũnyĩrĩgĩre erĩberererya erĩlahĩrya lyage, eryo nabĩrĩlahĩrĩrya Omwami Mukulu eHebũronĩ.

⁸ Kusangwa omugombe wawe mwalahĩrya erĩlahĩrya omugulu nabya nyĩkere eGesũrĩ eSũrĩa, nyiti, Omwami Mukulu amaswanyĩsũbya eYerũsalema, neryo nasyamukolera.

⁹ Neryo omwami mwamubwira ati, Ugende buholo. Neryo mwahangana, mwaya eHebũronĩ.

¹⁰ Nĩkwa Abũsaloma mwatuma abalĩngĩ omo bihanda byosĩ byʼeĨsraelĩ, ati, Omugulu mũkowa omulenge wʼengubi, neryo mwasyabũga, muti, Abũsaloma ni mwami eHebũronĩ.

¹¹ Kandi abandu magana abiri mobabirikirwa eYerũsalema, mobagenda na Abũsaloma ĩsĩbasĩ mwatsi wahi, mobagenda omo butaminya.

¹² Neryo Abũsaloma mwatumira uku Ahĩtofelĩ Omũgĩlonĩ, omũhanĩ wa Dawĩdĩ, oko mũyĩ wuwe, eGĩlo, omugulu abya akahera mahere. Nʼoluhota molwakala; kusangwa abandu mobakanya uku Abũsaloma omugulu gosĩ.

Dawĩdĩ akasaga oluhota lwa Abũsaloma

¹³ Neryo omukwenda mwahĩka eyiri Dawĩdĩ, ati, Emitima yʼabandu ba Ĩsraelĩ yakwamĩre Abũsaloma.

¹⁴ Neryo Dawĩdĩ mwabwira bagombe buwe bosĩ ababya haguma naye eYerũsalema, ati, Muhangane, tutibite; bite bitya isitwendibalako nʼomundu muguma busana na Abũsaloma. Mwanguhe erigenda, akasyatũhĩkako, akatuyira nabi, nʼerĩherya omũyĩ omo boya bʼomũyalĩ.

¹⁵ Nʼabagombe bʼomwami mobamubwira bati, Lebaya, abagombe bawe basĩkĩre erikola ekyo mukama wage mwami akandiyisoga.

¹⁶ Neryo omwami mwahuluka, nʼabosĩ bʼenyũmba yiwe mobamukwama. Nĩkwa omwami mwasĩga abakalĩ ĩkũmĩ, ababya bahwekĩ, erĩteya enyũmba.

¹⁷ Neryo omwami mwahuluka nʼabandu bosĩ haguma naye, nĩkwa mobahangana oko nyũmba yʼendũlĩ.

¹⁸ Nĩkwa abagombe buwe bosĩ mobalaba hakũhĩ naye; nʼAbakeretĩ bosĩ, nʼAbapeletĩ bosĩ, nʼAbagĩtĩ bosĩ, abalume magana ndatu bakamukwama bakalũa eGatĩ, mobalabira embere syʼOmwami.

¹⁹ Neryo omwami mwabũlya Ĩtaĩ Omũgĩtĩ, ati, Busana nakĩ ukagenda netu kwehĩ? Subula, Wĩkale nʼomwami; kusangwa uli mũlũa-hali, kandi uli mũsayĩ; suba aho wawe.

²⁰ Kusangwa wasa mũlĩgolo musa-musa, nangaswaleka iwalendera netu mũnabwĩre omugulu ngaya eyo nangaya kwehĩ? Subula utwale nʼabagala benyũ; eriganyira nʼekwenene bibye haguma nawe.

²¹ Na Ĩtaĩ mwasũbĩrya omwami ati, Ngoko Mwami Mukulu aliho, kandi ngoko mukama wage mwami aliho, kwenene aho mukama wage mwami asyabya, nomo lyangabya ihola, kutse eribyaho, ha nʼaho mugombe wawe asyabya.

²² Kandi Dawĩdĩ mwabwira Ĩtaĩ, ati, Ugende, usoke. Na Ĩtaĩ Mũgĩtĩ mwasoka, nʼabandu buwe bosĩ, nʼabana bosĩ ababya naye.

²³ Neryo omugulu ekihugo kyosĩ kyabya kikalira nʼomulenge munene, abandu bosĩ mobasoka. Nʼomwami naye mwasoka akũsĩ kʼeKĩdũronĩ, nʼabandu bosĩ mobasoka erĩlolya omo nzira yʼembwarara.

Zadokĩ akasũbaya erĩsandũko lyʼendagano eYerũsalema

²⁴ Neryo Zadokĩ mwasa, nʼAbalawĩ bosĩ haguma naye, ĩbahekĩre erĩsandũko lyʼendagano ya Nyamuhanga; mobateka erĩsandũko lya Nyamuhanga lyʼahisi; na Abĩatarĩ mwahetuka erĩhĩka aho abandu bosĩ balũĩra omo mũyĩ.

²⁵ Kandi omwami mwabũga na Zadokĩ, ati, Mũsũbaye erĩsandũko lya Nyamuhanga lyʼeka. Namabana eriganyira omo meso wʼOmwami Mukulu, akandĩsyanyĩsũbũlya, nʼerĩnyĩkangyalyo, nʼaherĩkala liwe.

²⁶ Nĩkwa abũga ati, sindikutsemera, nyine hano, anyikole ekyo anzĩre.

²⁷ Neryo omwami mwabũga nʼomũhererĩ Zadokĩ, ati, Suli mũlangĩrĩ kwehĩ? Suba omo mũyĩ nʼobuholo, nʼabagala bawe babiri, Ahĩmazĩ mugala wawe, na Yonatana mugala wa Abĩatarĩ.

²⁸ Lebaya, ngandirinda omo bisokero byʼembwarara erĩhĩkĩra aho ekĩnywa kĩkalũa ukʼuwe kyasyanyĩmĩnyĩsya.

²⁹ Neryo Zadoki na Abĩatarĩ mobasũbya erĩsandũko lya Nyamuhanga lyʼeYerũsalema kandi; mobĩkalayo.

Dawĩdĩ akahana Hũsaĩ erĩsĩnga Ahĩtofelĩ

³⁰ Neryo Dawĩdĩ mwahetuka omo bwiruka bwʼeMĩzeĩtũnĩ, mwalira akahetuka; ĩnĩaswĩkĩre omutwe, mwagenda isiambite esyongendero. Nʼabandu bosĩ ababya haguma naye mobaswika emitwe yabo, mobahetuka, bakalira.

³¹ Neryo omuguma mwabwira Dawĩdĩ ati, Ahĩtofelĩ ni gʼoko bahoterĩ haguma na Abũsaloma. Neryo Dawĩdĩ mwabũga ati, Uwe Mwami Mukulu, ngakusaba nyiti, ubindule erĩhano lya Ahĩtofelĩ mo bũkĩrũ.

³² Neryo, omugulu Dawĩdĩ ahĩka omo singi aho Nyamuhanga abya akasabirwa, Hũsaĩ, Omũarũkĩ mwasa erĩhĩndana naye iniabiritulanga olukimba luwe, nʼomutaka iniane oko mutwe wuwe.

³³ Neryo Dawĩdĩ mwamubwira ati, Wamagenda haguma nage, wasyandũhya ngʼomuheke.

³⁴ Nĩkwa wamasuba omo mũyĩ, ukabwira Abũsaloma uti, Nasyabya mugombe wawe uwe mwami; ngoko nabya mugombe wa tata wawe omo mugulu alaba, litya ngandibya mugombe wawe lino. Neryo wasyanyĩsĩngĩra erihana Ahĩtofelĩ.

³⁵ Kandi suwite eyo yo Zadokĩ na Abĩatarĩ abahererĩ kwehĩ? Neryo omwatsi wahi wasyowa omo nyũmba yʼOmwami Wasyabya ukabwirago Zadokĩ na Abĩatarĩ abahererĩ.

³⁶ Lebaya, abagala babiri baneyo, ye Ahĩmazĩ, mugala wa Zadokĩ, na Yonatana, mugala wa Abĩatarĩ; abo bo Wasyabya ukanyituma ebyosĩ ũkasyowa.

³⁷ Neryo Hũsaĩ omwĩra wa Dawĩdĩ, mwingira oko mũyĩ; na Abũsaloma naye mwahĩka eYerũsalema.