2 Samwelĩ 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Yoabũ akalenga omwami erĩsũbũlya Abũsaloma

¹ Neryo Yoabũ mugala wa Zerũya mwaminya omutima wʼOmwami kwʼakwĩre olukando lwa Abũsaloma.

² Neryo Yoabũ mwatuma eTekoa, mwendayo omũkalĩ wʼamenge, mwamubwira ati, Ngakusaba, uyiyire ngʼomũlĩrĩ, wambale olukimba lwʼekiriro, kandi sũyĩhakabaye amagũta, nĩkwa ubye ngʼomũkalĩ oyo wamabuga mugulu muli akalira abaholĩ.

³ Uye eyiri omwami, kandi ũbũge naye omo mũsĩndo oyũ. Neryo Yoabũ mwamuhana ebyo akandĩbũga.

⁴ Nʼomugulu omũkalĩ wʼeTekoa abũga nʼomwami, mwayĩtũlĩka, mwamũnamira, ati, Uwe mwami, ũnyĩwatĩkaye.

⁵ Neryo omwami mwabũga naye ati, Wabere uti kwehĩ? Naye mwasũbĩrya ati, Indi mũkwakalĩ kwenene, kusangwa ĩbage aholĩre.

⁶ Nʼomutsana wawe abya iniawite abagala babiri, neryo mobalwira omolĩ, kandi isihali oyo wangalekyabo, nĩkwa omuguma mwakenza ogundi, mwamwĩta.

⁷ Kandi lebaya, ekĩtũnga kyosĩ kyabiribambira omutsana wawe bati, Ulete oyo wĩta mugala wabo, netu tũmwĩte busana nʼengebe ya mugala wabo oyo ĩta, nʼerĩherya omũlĩ wʼomwandu. Basyalĩmya batya amaha wage, ĩsĩbendĩsyasĩgĩra ĩbage yo lĩna kutse mũsĩgalira munakihugo.

⁸ Neryo omwami mwabwira omũkalĩ ati, Genda eka wawe, nage nasyahamula omwatsi wawe.

⁹ Nʼomũkalĩ wʼeTekoa mwabwira omwami ati, Uwe mukama wage nʼomwami, erĩlolo libye kwĩngye, nʼoko kĩtũnga kya tata; nʼomwami nʼekĩtũmbĩ kiwe kyʼobwami bibye butsira musango.

¹⁰ Kandi omwami mwabũga ati, Omundu oyukakubwira mwatsi, undetereye, naye sĩendĩsyaswakũtũlako.

¹¹ Neryo omũkalĩ mwabũga ati, Ngakũbũlaya, omwami ibuke Omwami Mukulu Nyamuhanga wawe, omũkĩsya wʼomusasi sĩaheraye kandi, bakasyaherya omugala wage. Naye mwabũga ati, Ngoko Mwami Mukulu aliho, sihendisyabya oluywiri lʼomugala wawe nʼoluguma olukandisyatogera ahisi.

¹² Neryo omũkalĩ oyo mwabũga ati, Ngakusaba nyiti Uleke omutsana wawe abũge kĩnywa oko mukama wage mwami. Naye ati, Ego bũga.

¹³ Nʼomũkalĩ mwabũga ati, Busana nakĩ wabĩrĩyĩtsũtsa omwatsi ali ngʼoyũ erilwa nʼabandu ba Nyamuhanga kwehĩ? Kusangwa omwʼĩbũga ekĩnywa ekĩ omwami ali ngʼoyuli kʼomusango, kusangwa omwami sĩalĩsũbũlaya oyo wahigawa wuwe.

¹⁴ Kusangwa twasyahola, kwenene ituli ngʼamagetsi agũtĩrwe ahisi, awate angaswatehwa kandi; nĩkwa Nyamuhanga sĩalĩlũsaya engebe, nĩkwa akayira enzira, ati oyo wahigawa syasyegusawa ehandi.

¹⁵ Neryo nabĩrĩhĩka erĩbũga ekĩnywa ekĩ nʼomukama wage mwami kusangwa bandu babĩrĩnyũbahya; nʼomutsana wawe mwabũga ati, Ngandĩtabũga nʼomwami; mbino omwami akandĩberererya erĩbũlya lyʼomugombe wuwe wʼobũkalĩ.

¹⁶ Kusangwa omwami akandĩowa, nʼerĩlamya omugombe wuwe omo byala byʼomundu oyo wasonda erĩnyĩherya nʼomugala wage haguma nʼerĩtũlũsya omo kihugo Nyamuhanga alaga.

¹⁷ Neryo omutsana wawe mwabũga ati, Ngakusaba nyiti, Uleke ekĩnywa kyʼomukama wage mwami kĩkũtekanaye ngʼomũlaĩka wa Nyamuhanga, omukama wage omwami, kwʼali atya, erisombola ebibuya nʼebibi. Kandi Omwami Mukulu, Nyamuhanga wawe abye haguma nawe.

¹⁸ Neryo omwami mwasũbĩrya, mwabwira omũkalĩ oyo ati, Ngakusaba, sũnyĩbĩse ekĩnywakĩ ngandĩkũbũlya. Nʼomũkalĩ mwabũga ati, Na lino kĩsĩ-kĩsĩ mukama wage mwami abũge.

¹⁹ Neryo omwami mwabũga ati, Ebyala bya Yoabũ biri haguma nawe omo byosĩ ebĩ kwehĩ? Nʼomũkalĩ mwasũbĩrya ati, Omutima wawe kwʼaliho, mukama wage mwami, sihali oyo wangakebera oko byala byʼamali kutse ebyʼamalembe oko kĩnywa ekyo mukama wage mwami abĩrĩbũga. Kusangwa ega omugombe wawe Yoabũ, yo wanyihana, kandi yo wahĩra ebĩnywa byosĩ ebĩ omo buno bwʼomutsana wawe;

²⁰ busana nʼeribindula omwatsi oyũ, Yoabũ mugombe wawe abirikola ekĩ. Nʼomukama wage ni wʼamenge, awali ngʼamenge wʼomũlaĩka wa Nyamuhanga, eriminya emyatsi yosĩ eyiri muna-kihugo.

²¹ Neryo omwami mwabwira Yoabũ ati, Nasyakola omwatsi oyũ kwenene; neryo ugende ũsũbũlaye omũlwana Abũsaloma.

²² Na Yoabũ mwawa ahisi, mwatsumula omwami; neryo Yoabũ mwabũga, ati, Mũnabwĩre omugombe wawe asĩ ko nabiribana eriganyirwa omo meso wawe, uwe mukama wage mwami, kusangwa omwami abĩrĩberererya erĩbũlya lyʼomugombe wuwe.

²³ Neryo Yoabũ mwahangana mwaya eGesũrĩ, mwaleta Abũsaloma eYerũsalema.

²⁴ Nĩkwa omwami mwabũga ati, Abũsaloma akitire omuwe, nĩkwa sialole oko bũsũ bwage. Neryo Abũsaloma mwakitira omuwe, mwatalangira obũsũ bʼomwami.

Obubuya bwa Abũsaloma

²⁵ Nĩkwa omo Ĩsraelĩ yosĩ sihabya mundu mubuya nga Abũsaloma kutse eripipwa nga ye; erĩtsũka oko kisando kiwe erĩhĩka oko kahũlĩhũlĩ kʼomutwe wuwe isiali ko bulema.

²⁶ Kandi omugulu asĩsa esyonzwiri syʼomutwe wuwe [abya akasĩsasyo oko ndũlĩ yʼobuli mwaka kusangwa ĩsĩkamũlĩtohera, kyaleka ĩnĩasĩsasyo]; mwalenga esyonzwiri syʼomutwe wuwe ĩsyamahĩka oko sekelĩ magana abiri omo lulengero lwʼOmwami.

²⁷ Kandi Abũsaloma mwabuta bagala basatu, na mwali muguma, erĩna liwe iyo Tamarĩ; naye abya mũkalĩ wʼobũsũ bubuya.

Abũsaloma akalola ũkwʼĩse

²⁸ Neryo Abũsaloma mwĩkala emyaka ĩbĩrĩ yosĩ eYerũsalema; kandi mwatalola oko bũsũ bʼomwami.

²⁹ Neryo Abũsaloma mwatumira uku Yoabũ, erimutuma eyiri omwami; nĩkwa mwagana eriasa eyo ali; neryo mwamutumirako engendo yʼakabiri, nĩkwa mwagana eriasa.

³⁰ Kyaleka iniabwira bagombe buwe ati, Eririma lya Yoabũ liri hakũhĩ nʼeryage, kandi awite mwʼekisusu; mugende mũhĩsayeryo. Neryo abagombe ba Abũsaloma mobahĩsya eririma eryo.

³¹ Neryo Yoabũ mwahangana mwaya ewa Abũsaloma, mubwira ati, Busana nakĩ abagombe bawe bahĩsĩrye eririma lyage kwehĩ?

³² Neryo Abũsaloma mwasũbĩrya Yoabũ, ati, Monakũtũmĩreko, nyiti, Wase, ngakutume eyiri omwami, ũmũbũlaye, uti, nalũĩre eGesũrĩ busana nakĩ kwehĩ? Lĩlwe lyowene kumbe nyikineyo. Na lino Uleke nyisamalire obũsũ bwʼomwami; hamabya hali erĩlolo ũmwʼĩngye, anyĩte.

³³ Neryo omugulu Yoabũ ahĩka eyiri omwami, nʼerimubwira; omwami mwabirikira Abũsaloma. Naye mwahĩka eyiri omwami, mwawa ahisi akasĩkya omwami; neryo omwami mwalyatsirira Abũsaloma.