2 Samwelĩ 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhalya lya Dawĩdĩ

¹ Neryo okwʼĩtsũka lyʼomwaka muhya-muhya, oko mugulu abami bakahongoka eriyalwa, Dawĩdĩ mwatuma Yoabũ, nʼabagombe buwe haguma naye, nʼAbaĩsraelĩ bosĩ; mobaherya bagala ba Amonĩ, mobatĩmbĩra nʼerigotera eRaba. Nĩkwa Dawĩdĩ mwasĩgala eYerũsalema.

² Neryo omwʼĩgolo-golo, Dawĩdĩ mwahangana akalũa omo ngyingo yiwe, neryo mwayĩgendya-gendya oko lutwe lwʼenyũmba yʼOmwami; nʼoko lutwe kwʼaho mwalangira omũkalĩ akayikosa; nʼomũkalĩ oyo abya mubuya kutsibu.

³ Neryo Dawĩdĩ mwatuma erĩbũlĩrĩrya omwatsi wʼomũkalĩ. Nʼomuguma mwabũga ati, Oyũ si Batĩseba mwali wa EHamũ, omũkalĩ wa Ũrĩa Omũhĩtĩ kwehĩ?

⁴ Neryo Dawĩdĩ mwatuma abakwenda erimwenda, neryo mwamwĩmya; nʼomugulu ahĩka omuwe, mwagotsera naye; neryo abere abĩyerya oko bũtũndĩrya buwe, Batĩseba mwasuba omo nyũmba yiwe.

⁵ Neryo omũkalĩ oyo mwaheka obukule; neryo mwatuma mwabwira Dawĩdĩ ati, Indi mukule.

⁶ Neryo Dawĩdĩ mwatumira Yoabũ, ati, Unyitumire Ũrĩa Omũhĩtĩ. Neryo Yoabũ mwatuma Ũrĩa eyiri Dawĩdĩ.

⁷ Nʼomugulu Ũrĩa amũhĩkako, Dawĩdĩ mwamũbũlya Yoabũ ngʼali ati, nʼabandu nga bali bati, nʼamalwa ngʼanemutokekana.

⁸ Neryo Dawĩdĩ mwabwira Ũrĩa ati, Wandagalire omwawe, weraye ebisando byawe uluhuke. Neryo Ũrĩa mwalũa omo nyũmba yʼOmwami, kandi omwami mwamutumira olũsũnzo.

⁹ Nĩkwa Ũrĩa mwagotsera oko lũkyo lwʼenyũmba yʼOmwami haguma nʼabagombe bosĩ bʼomukama wuwe, mwatandagalira omuwe.

¹⁰ Neryo omugulu babwira Dawĩdĩ, bati, Ũrĩa mwatetandagalira omuwe, Dawĩdĩ mwabũlya Ũrĩa ati, Sũkabĩlũa oko lugendo, neryo busana nakĩ sulitandagalira omwawe kwehĩ?

¹¹ Neryo Ũrĩa mwabwira Dawĩdĩ ati, Erĩsandũko lyʼerilagana, na Ĩsraelĩ, na Yũda, bĩkere omo bitalikirire; nʼomukama wage Yoabũ, nʼabagombe bʼomukama wage, batekĩre ekilaliriro omolĩ; nage inaya omo nyũmba yage, nyiyalye, nʼerĩpũlya, nʼerigotsera nʼomũkalĩ wage kwehĩ? Ngoko uliho, kandi ngoko mutima wawe aliho, sinangakola omwatsi oyũ.

¹² Neryo Dawĩdĩ mwabwira Ũrĩa, ati, Ulinde hano mũnabwĩre nibya, kandi omo ngyakya nasyakuha olugendo. Neryo Ũrĩa mwasiba eYerũsalema ekiro ekyo, nʼengyakya.

¹³ Neryo Dawĩdĩ mwamubirikira, neryo Ũrĩa mwalya, mwapũlĩrya embere siwe; kandi mwamũkũndĩsya; neryo omwʼĩgologolo mwayagotsera oko ngyingo yiwe haguma nʼabagombe bʼomukama wuwe, nĩkwa mwatandagalira omuwe.

¹⁴ Neryo bwabere bwakya Dawĩdĩ mwasakira Yoabũ yʼebarua, mwatumayo omo byala bya Ũrĩa.

¹⁵ Nĩkwa mwasaka omo barua mwʼatya, ũhĩre Ũrĩa yʼembere syʼamalwa awakalĩre kutsibu, neryo Ũlũe hakũhĩ naye, atsimitawe, ahole.

¹⁶ Neryo omugulu Yoabũ ayĩtegereraya omũyĩ, mwahĩra Ũrĩa aho abya asĩ ko hali esyombangĩ.

¹⁷ Nʼabandu bʼomũyĩ oyo mobahuluka, mobalwa na Yoabũ; mobĩta abandi bʼoko bagombe ba Dawĩdĩ mobawa; na Ũrĩa Omũhĩtĩ naye mwahola.

¹⁸ Neryo Yoabũ mwatuma eribwira Dawĩdĩ emyatsi yosĩ yʼamalwa.

¹⁹ Kandi mwahana omukwenda ati, Wamabibuga eribwira omwami yʼemyatsi yosĩ yʼamalwa,

²⁰ kyasyabya, omwami amahitana, akakũbũlya ati, Busana nakĩ momukaya hakũhĩ mutya oko mũyĩ erilwa kwehĩ? Ĩsĩmwasĩ ko bangatoka eribalasa ibane oko lũhĩmbo kwehĩ?

²¹ Nindi wĩta Abĩmelekĩ omugala wa Yerũbesetĩ kwehĩ? Omũkalĩ mwatamugusa kwʼengasĩrya iniane oko lũhĩmbo kwehĩ? Kyaleka iniaholera eTebesĩ. Ko mwaya hakũhĩ nʼolũhĩmbo busana nakĩ kwehĩ? Neryo wasyabũga uti, Omugombe wawe Ũrĩa Omũhĩtĩ naye abirihola.

²² Neryo omukwenda mwagenda, mwahĩka, mwakangya Dawĩdĩ ebyosĩ Yoabũ amutuma erĩtũlago.

²³ Nʼomukwenda mwabwira Dawĩdĩ ati, Abandu abo mobatũsĩnga, mobatuhulukira omolĩ, netu motwabya tũkakũnabo erĩhĩka okwʼingira omo lũkyo.

²⁴ Nʼabalasĩ mobalasa abagombe bawe ibane oko lũhĩmbo; nʼabandi bʼoko bagombe bʼomwami baholĩre, nʼomugombe wawe Ũrĩa Omũhĩtĩ naye mwaholĩre.

²⁵ Neryo Dawĩdĩ mwabwira omukwenda ati, Ubwire Yoabũ uti, Omwatsi, oyũ sĩakwagalaye, kusangwa omũyalĩ akalya omuguma ngoko akalya nʼogundi; ũkalaye amalwa ulwe nʼomũyĩ, ũkĩndego; kandi ũmũgongomeraye, ũmũsĩkaye omutima.

²⁶ Nʼomugulu omũkalĩ wa Ũrĩa owa ko Ũrĩa ĩba wuwe abirihola, mwalira ĩba.

²⁷ Nʼomugulu ekiriro kyahwa, Dawĩdĩ mwamutumirako, mwamutwala omo nyũmba yiwe, naye mwabya mũkalĩwe kandi mwamubutira omugala. Nĩkwa omwatsi Dawĩdĩ akola abya mubi omo meso wʼOmwami Mukulu.