2 Samwelĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akabikulirawa oluholo lwa Saũlo

¹ Neryo enyũma wʼoluholo lwa Saũlo, omugulu Dawĩdĩ asubula okwʼĩta Abamalekĩ, kandi Dawĩdĩ mwĩkala ebiro bibiri eZĩklagĩ.

² Oko kiro kyʼakasatu, lebaya, omundu mwalũa omo kilaliriro kya Saũlo, nʼesyongimba ĩsĩtũlangĩkĩre, nʼerĩtaka oko mutwe wuwe; neryo abere ahĩka eyiri Dawĩdĩ, mwawa ahisi, mwamũnamira.

³ Neryo Dawĩdĩ mwamũbũlya ati, Ũkalũahi kwehĩ? Naye mwamubwira ati, Ngabala omo kilaliriro kya Ĩsraelĩ.

⁴ Kandi Dawĩdĩ mwamũbũlya ati, Byabere biti kwehĩ? Ngakulemba umbwire. Naye mwasũbĩrya ati, Abandu babirisaga amalwa, kandi abandu bangi babiriwa nʼerihola; na Saũlo na Yonatana mugala wuwe babirihola nibya.

⁵ Neryo Dawĩdĩ mwabwira omũlwana oyo wamũtũlĩrago, ati, Wamĩnyĩre uti Saũlo na Yonatana mugala wuwe ko babirihola kwehĩ?

⁶ Nʼomũlwana oyo mwamũkanĩrya omwatsi ati, Omugulu nabũlĩkĩra ngahĩka oko kitwa kyʼeGĩlboa, lebaya Saũlo alũe inianegemere okwʼĩtũmo liwe. Neryo lebaya, esyogalĩ syʼamalwa, nʼabali oko syosabayĩrĩ ibakamukwama kutsibu.

⁷ Neryo omugulu akebera enyũma, mwandangira mwambirikira, nage monamũsũbĩrya nyiti, Ĩngye yono hano.

⁸ Naye mwambũlya ati, Ulindi kwehĩ? Nage monamũsũbĩrya nyiti, Ĩngye indi Mũamalekĩ.

⁹ Naye mwambwira ati, Ngakulemba nyiti, Uhangane hakũhĩ nage, ũnyĩte; kusangwa obwagalĩ bwabirimbamba, kusangwa engebe yage ikineho omwisi wage.

¹⁰ Neryo monahangene hakũhĩ naye, monamwĩtĩre, kusangwa nabya nyasĩ ndeke kwʼate angatoka eribyaho amabiwa. Neryo monĩmya embĩta eyabya oko mutwe wuwe, nʼomusege owabya oko kuboko kuwe, nabiriretabyo hano oko mukama wage.

Erĩkwa lyʼomũlwana Omũamalekĩ oyo

¹¹ Neryo Dawĩdĩ mwawata omo ngimba siwe, mwatulangasyo; nʼabalume bosĩ ababya haguma naye mobayira batya.

¹² Kandi mobasũsũmana, mobalira, mobatalya erĩhĩka omwʼĩgolo-golo busana na Saũlo, na busana na Yonatana, mugala wuwe, na busana nʼabandu bʼOmwami Mukulu, na busana nʼekĩtũnga kya Ĩsraelĩ; kusangwa bamabiwa omo mũyalĩ.

¹³ Kandi Dawĩdĩ mwabwira omũlwana oyo wamũtũlĩrago, ati, Uli wa hayi kwehĩ? Naye mwasũbĩrya ati, Ĩngye indi mugala wʼehandi Omũamalekĩ.

¹⁴ Neryo Dawĩdĩ mwamũbũlya ati, Mutetubaha erisumba ebyala byawe erĩĩta omwami oyo Mwami Mukulu ayisoga kwehĩ?

¹⁵ Neryo Dawĩdĩ mwabirikira omuguma gʼoko balwana buwe, mwamubwira ati, Umusegereko ũmwĩte. Naye mwamũswĩrya neryo mwahola.

¹⁶ Neryo Dawĩdĩ mwamubwira ati, Omusasi wawe abye oko mutwe wawe, kusangwa obuno bwawe bwabirikuhandikirira, buti, Nabĩrĩta oyo Mwami Mukulu ayisoga eribya mwami.

Eririra Saũlo na Yonatana

¹⁷ Neryo Dawĩdĩ mwasũsũmanira Saũlo nʼerĩsũsũmana lingi, na busana na Yonatana mugala wuwe,

¹⁸ Neryo mwabwirabo ati bĩgĩsaye abana ba Yũda bʼolwimbo lwʼobuta; lebaya lũsakĩre omo kitabu kya Yaserĩ.

¹⁹ Uwe Ĩsraelĩ eritendera lyawe lyabirikererwa endata oko hayĩsũmbĩre hawe!

²⁰ Sĩmũtũlego eGatĩ, Sĩmũgenda-gendayego omo syonzira syʼeAskelonĩ; Abali bʼAbafĩlĩstĩnĩ bakasyatsema, Abali bʼabatabwene bakasyatũsekererya.

²¹ Ĩnywe bitwa byʼeGĩlboa, Sihabye kimi kutse mbũla ũkwʼĩnywe, kutse nʼamalima wʼesyohongo. Kusangwa aho he ngabo yʼembangĩ yatsandĩrĩbawa, Engabo ya Saũlo ĩsĩyĩhakabĩbwe ko magũta.

²² Obuta bwa Yonatana mobutetasuba enyũma, Nʼomũyalĩ wa Saũlo mwatasubula busa, Oko musasi wʼabandu bĩtawa, nʼoko bĩsabũ byʼesyombangĩ.

²³ Saũlo na Yonatana, babya banzĩrwe nʼabʼerĩtsemesya omo mayingo wabo, Kandi mobatagabana omo luholo lwabo. Babya bangũhĩre kwilaba amasamba, Babya nʼamaka kwilaba esyondale.

²⁴ Ĩnywe bali ba Ĩsraelĩ, mulire Saũlo oyo, Oyo wabambalaya esyomunyama nʼebĩkatsemesaya, Oyo wasitikirira esyongimba syenyũ omo syamagetsi.

²⁵ Esyombangĩ syamawa siti omo katĩkatĩ kʼamalwa! Yonatana wamĩtĩrwa omo syosingi syawe.

²⁶ Namakũkwĩra bũlĩge, Yonatana mugala wetu. Wabya ũkanyĩtsemesya kutsibu. Olwanzo lwawe ũkwʼĩngye lwabya lwʼeriswekera, Lũlabĩre oko lwanzo lwʼabakalĩ.

²⁷ Kwʼesyombangĩ syamawa siti. Nʼebyuma byʼamalwa byamahera biti!