2 Petero 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Abakangĩrĩrya bʼamabehĩ

¹ Nĩkwa mohahuluka abamĩnyererĩ bʼamabehĩ omo katĩkatĩ kʼabandu, kandi litya abakangĩrĩrya bʼamabehĩ basyahuluka omo katĩkatĩ kenyũ. Nabo basyĩngĩrya erĩkangĩrĩrya lyʼamabehĩ, erĩkaheraya. Abo basyagana Omukama oyo wagulabo, ibakayilretera erihera lyo lũba.

² Kandi abandu bangi basyakwama emyatsi yabo eyĩtĩsĩrĩre, kandi busana nabo, abandu basyahula enzira yʼekwenene mo nabi.

³ Neryo omo muhuguru wabo abakangĩrĩrya bʼamabehĩ aba, basyababana kwʼendũndĩ omo malagu wabo abakangĩrĩrya bʼamabehĩ aba, bakera, kandi erihera lyabo likalindirirabo.

⁴ Kusangwa Nyamuhanga mwatabalya abamalaĩka abakola ebibi, nĩkwa mwagusabo omo lĩfero eyo bakabikawa omo mahulula nʼomo mwĩrĩmya, eririndirira ekiro kyʼeritswera.

⁵ Kandi Nyamuhanga mwatabalya ekihugo kya kera, nĩkwa mwateya Noa omũtũlĩ wʼeritunganene haguma nʼabandi balinda, mwabalyabo ekiro aleta erigunga lyʼamagetsi oko kihugo kyʼabandu abatakenga Nyamuhanga.

⁶ Kandi Nyamuhanga mwahĩra omusango oko mĩyĩ yʼeSodomo na Gomora, mwasindulayo, nʼeriyirayo mo kĩmĩnyĩsyo busana nʼabandu abatendisyakenga Nyamuhanga.

⁷ Kandi Nyamuhanga mwalamya Lotĩ, omundu oyutunganene. Lotĩ abya akagalwa busana nʼemikolere eyĩtĩsĩrĩre yʼabandu bʼomwaga.

⁸ Kusangwa omundu oyutunganene abya ĩkere omo katĩkatĩ kabo. Nĩkwa ebiro byosĩ Lotĩ mwalangira, kandi mowa emĩbĩrĩ yabo yʼerĩhalya, nʼomutima wuwe owatunganene mwagalwa kutsibu busana nʼemĩbĩrĩ mibi yabo.

⁹ Neryo Omukama anasĩ erĩlamya abakamukenga okwʼirengwako. Nĩkwa akabika ababi erisuyirabo erĩhĩka oko kiro kyʼeritswera.

¹⁰ Kwilaba aho, akabikabo busana nʼerisuyirabo ekiro kyʼeritswera abakakwama esyongumbu syabo esĩtĩsĩrĩre syʼomubiri, isibetsomana ehamũlĩ ya Nyamuhanga. Abakangĩrĩrya aba bakalĩre, kandi bakayipipa, nʼerikola erisonda lyabo. Sibekenga abʼolukengerwa bʼendata, nĩkwa bakatsumabo.

¹¹ Nĩkwa abamalaĩka abalengĩrebo omo maka nʼobũtokĩ sibetsongerabo nʼeritsumabo embere syʼOmukama.

¹² Nĩkwa abandu aba balingene ngʼesyonyama esitawite menge, esĩterengekanaya, esikabutawa busana nʼerihambwa nʼerikerwa. Bakatsuma ebyo batasĩ, kandi basyaherĩbwa haguma nʼesyonyama esyo.

¹³ Kandi basyahembwa eriagalwa busana nʼerikolera abandi bo nabi. Bakatsemera erĩkũnda omwʼitungi, nʼeritsanga omo syongumbu syabo. Bakaleta esĩsonĩ nʼobũlĩge omugulu bakalya haguma nenyũ, kusangwa bakateba.

¹⁴ Ameso wabo oswĩre mʼoluteto nʼerikwama emyatsi yosĩ yʼebibi, bakasondola abandu batasĩkĩre, nʼemitima yabo yoswĩre nʼomururu; ni bana Nyamuhanga abiritakira.

¹⁵ Babirikita omo nzira nʼeritala, ibamabikwama enzira ya Balama, omugala wa Beorĩ, oyo wanza oluhembo lwʼerikola ebitatunganene.

¹⁶ Nĩkwa mwahayirwa busana nʼerĩhalya liwe. Kusangwa epunda itawite menge moyabũga omo mulenge wʼomundu, nʼerĩkakĩrya erĩsĩre lyʼomũmĩnyererĩ.

¹⁷ Abandu aba balingene ngʼesĩsoko esitawite amagetsi, kandi bali ngʼebĩtũ ebikahekawa nʼekihunga. Nyamuhanga abiribikirabo ahali omũhĩndanĩa.

¹⁸ Kusangwa bakabũga ebĩnywa ebyʼobusa byʼeriyipipa, ibakabirikira abandu nʼeritebabo omo mwatsi wʼesyongumbu syʼomubiri nʼesyʼerĩsĩngĩra. Abandu aba babya bakateba, babya bandu abakasonda erĩlũa ukwʼabo bĩkere omo luhabo.

¹⁹ Abatebya abo mobalagabo obwĩranda, nĩkwa kwesĩ nabo ni bakobe bʼemibere yʼesyonye; kusangwa ekĩkakĩnda omundu kikabya omukama wuwe.

²⁰ Kusangwa bamabibala ebĩtĩsĩrĩre byʼekihugo busana nʼeriminya Omukama nʼomũlamya wetu Yesu Kristo, bamaswayĩgobya mubyo nʼerĩkĩndwa mubyo, abandu ngʼabo babiritsanda kwilaba erĩmbere.

²¹ Kusangwa kumbe lĩlwe lyowene busana nabo eritindaminya nʼahake enzira yʼeritunganene kwilaba eriminyayo, nʼeritswa erĩlũa oko kihano kĩbũyĩrĩre ekyo bahabawa.

²² Omwatsi abĩrĩhĩka kubo ngʼomũsyo wʼekwenene owakabũga ati, Embwa ikasuba oko bisalo byayo, kandi ati, Engulube eyĩryanabĩbawa ĩkaswayĩgala-galaya omo londo.