2 Petero 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye Sĩmonĩ Petero, omugombe nʼomukwenda wa Yesu Kristo, ngasakira abo babiribana erĩkĩrĩrya ngʼeryo tuwite busana nʼeritunganene lya Nyamuhanga wetu nʼomũlamya Yesu Kristo.

² Olukogo nʼobuholo bunene bibye nenyũ, kusangwa mwabiriminya Nyamuhanga nʼOmukama wetu Yesu.

Nyamuhanga akayisoga twe nʼeritubirikira

³ Obũtokĩ bwa Nyamuhanga bwabirituha emyatsi yosĩ eyitutolere, busana nʼeribyaho omo ngebe ya Nyamuhanga, nʼerikenga Nyamuhanga. Abirituha emyatsi eyĩ kusangwa twabiriminya kwenene oyo watubirikira erisangira olukengerwa luwe nʼobubuya buwe.

⁴ Kandi abirituha esyondagane siwe nene, syʼesyonzwere nene, itwatoka erisangira omo bu Nyamuhanga buwe, imwamabibala eritsanda lyʼesyongumbu sya muna-kihugo.

⁵ Busana nʼomwatsi oyũ, muyitsinge, mutomeke obubuya okwʼĩkĩrĩrya lyenyũ, kandi oko bubuya bwenyũ mutomeke eriminya;

⁶ nʼokwʼiminya lyenyũ, mutomeke erĩyĩteya; nʼokwʼĩyĩteya lyenyũ mutomeke erĩyĩyĩnĩa;

⁷ nʼokwʼĩyĩyĩnĩa lyenyũ mutomeke erikenga Nyamuhanga; nʼokwʼikenga Nyamuhanga mutomeke Obugenge, nʼoko bugenge bwenyũ mutomeke olwanzo.

⁸ Mwamakola mutya nʼerikwamirirabyo, mwasyatoka, kandi mwasyakanyirira Omwʼiminya ndeke lyʼomukama wetu Yesu Kristo.

⁹ Nĩkwa oyutekola emyatsi eyĩ nĩ ndĩma-tĩme, kandi akabula ameso, iniabiribirirwa kwʼabĩrĩerĩbwa kwʼebibi biwe bya kera.

¹⁰ Neryo balĩkyetu, mubye nʼomũhwa wʼerĩhanganĩa ndeke eribirikirwa lyenyũ, nʼeriyisogwa lyenyũ, kusangwa mwamakwama mutya, simwendisyatoga na kera.

¹¹ Nĩkwa mwasyabana ehamũlĩ yosĩ yʼeriingira omo Bwami bwʼerikota bwʼo­mukama nʼomũlamya wetu Yesu Kristo.

¹² Neryo nasyabya ĩnyĩnasĩkĩre ebiro byosĩ erĩbĩbũkya emyatsi eyĩ, nomo mwangabya ĩmũnasĩyo nʼerihangana ndeke omo mwatsi wʼekwenene ogo munawite.

¹³ Kusangwa ngaganza nyiti, litolere omugulu nyikine omo mubiri wage, erĩbĩbũkyago.

¹⁴ Kusangwa nyasĩ ngoko nyĩkĩsĩya ĩnalũa omo mubiri oyũ. Kandi Omukama wetu Yesu Kristo, abĩrĩnyĩmĩnyĩsya omwatsi oyũ.

¹⁵ Neryo nasyakola nʼomũhwa, imwatoka eryibuka ebiro byosĩ emyatsi eyĩ enyũma wʼerigenda lyage.

Tuli balangĩrĩ bʼolukengerwa lwa Kristo

¹⁶ Kusangwa motutakwama amalagu wʼamenge omugulu twabowĩsaya obũtokĩ nʼeriasa lyʼomukama wetu Yesu Kristo, nĩkwa motwalangira obukulu buwe omo meso wetu.

¹⁷ Twabyaho omugulu Nyamuhanga Tata amuha erĩsĩkya nʼolukengerwa, omugulu omulenge alũa omo Lukengerwa Lũkangĩre ati, Oyũ ni Mugala wage mwanze, oyo wabĩrĩnyĩtsemesya ndeke.

¹⁸ Ĩtwe netu, motowa omulenge oyũ akalũa elubula, omugulu twabya haguma naye oko kitwa kĩbũyĩrĩre.

¹⁹ Busana nʼomwatsi oyũ, tukayiketera ekĩnywa ekyabũgawa nʼabamĩnyererĩ. Nenyũ mutolere imwatsomanakyo ngʼetala eyĩkakoleraya ahali omwĩrĩmya, erĩhĩka okwʼikya lyʼeKiro ekyo, nʼerĩhĩka aho mugulu engũnũnũ yʼengyakya-ngyakya yasyakolerya omo mitima yenyũ.

²⁰ Nĩkwa mũtsũke eriminya omwatsi oyũ: Sihali mundu oyo wangakũmbũla eriminyerera lyʼamasako ĩyowene-wene.

²¹ Kusangwa sihali eriminyerera eryahĩka na kera omwʼisonda lyʼomundu, nĩkwa abandu mobabũga ebĩnywa ebyo Nyamuhanga ahabo, ĩbakasondolĩbawa nʼOmũlĩmũ Abũyĩrĩre.