2 AbanyaTesalonika 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩtwe Paũlo na Sĩlvano na Tĩmoteo, tukasaka ebarua eyĩ oko bandu abʼekanĩsa eyiri eTesalonĩka, abandu ba Nyamuhanga Tata wetu, nʼOmukama Yesu Kristo.

² Nyamuhanga Tata, nʼOmukama Yesu Kristo babahe olukogo nʼobuholo.

Eritswera okwʼĩhĩka lya Kristo

³ Balĩkyetu, litutolere eriha Nyamuhanga ewasĩngya busana nenyũ oko migulu yosĩ! Kandi lyowene itwakola tutya, kusangwa erĩkĩrĩrya lyenyũ linemukula kutsibu, kandi olwanzo lwʼobuli mundu omo katĩkatĩ kenyũ lunemukanyirira busana nʼabandi balĩkyetu bosĩ.

⁴ Ekyo kikaleka itwayihalamba busana nenyũ omo katĩkatĩ kʼamakanĩsa wa Nyamuhanga. Tukayihalamba busana nʼerĩyĩyĩnĩa lyenyũ nʼerĩkĩrĩrya lyenyũ omwʼendererĩbwa lyenyũ lyosĩ, nʼamalĩge wenyũ, ebyo mukagalawamo.

⁵ Ebĩ nĩ bĩmĩnyĩsyo byʼeritswera litunganene lya Nyamuhanga, imwatoka eriganzwa ngʼabatolere obwami bwa Nyamuhanga. Nenyũ mukagalawa kwenene busana nʼobwami obo.

⁶ Nĩkwa Nyamuhanga atunganene; asyagalya abakabagana.

⁷ Nʼĩnywe mukagalawa asyabaha eriluhuka, haguma netu, omugulu Omukama Yesu asyabutuka omo muliro owakaka erĩlũa elubula haguma nʼabamalaĩka buwe bʼamaka.

⁸ Kandi asyasuyira abatasĩ Nyamuhanga, nʼabatekenga Engulu Yowene yʼomukama wetu Yesu.

⁹ Basyasuyirwa omwʼihera lya kera na kera, nʼerisololwa embere syʼOmwami Mukulu, nʼoko lukengerwa lwʼobũtokĩ buwe,

¹⁰ ekiro ekyo asyasa nʼeripipwa nʼabandu buwe bosĩ, nʼerĩsĩkĩbwa nʼabosĩ abakĩkĩrĩraya. Nenyũ mwasyabya haguma nabo kusangwa mwĩkĩrĩraya omwatsi twabatũlĩra.

¹¹ Ekĩ kyalekĩre itwabasabira emigulu yosĩ. Tuti Nyamuhanga wetu abayire mo bandu abatolere eribirikirwa lya Nyamuhanga. Kandi tuti omo maka wuwe aberereraye erisonda lyenyũ lyʼerikola ekibuya, nʼerĩhĩkanĩa obuli mũbĩrĩ mukakola omwʼĩkĩrĩrya.

¹² Litya mwasyapipa erĩna lyʼomukama Yesu, naye asyabapipa. Ebĩ ni busana nʼolukogo lwa Nyamuhanga wetu nʼOmukama Yesu Kristo.