2 AbanyaKorinto 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekĩbo busana nʼAbakristo balĩkyetu

¹ Kusangwa sinangasyakusakira omwatsi wʼerĩwatĩkya abandu ba Nyamuhanga abali eYũdea.

² Kusangwa nyĩnasĩ omũhwa wenyũ wʼerĩwatĩkya, kandi nabiribahalambira oko bandu bʼeMakedonĩa. Nyiti, abandu abali omo kihugo kyʼAbagĩrĩkĩ, babya basĩkĩre oko mwaka owalaba. Kandi omũhwa wenyũ abirireka abangi ba kubo nabo ibanza erĩhĩra omo kĩbo ekyo.

³ Neryo lino ngatuma abalĩkyetu aba, neryo eriyihalamba lyetu busana nenyũ siribye buyira omo mwatsi oyũ. Neryo ngoko nabya ngabũga, imwabya ĩmũnasĩkĩre.

⁴ Neryo abandi abʼeMakedonĩa bamasa haguma nage, bakasyabeya ĩsĩmũsĩkĩre, itwamahemuka, nenyũ nibya, busana nʼomwatsi wʼeriyihalamba lyetu busana nenyũ.

⁵ Kyaleka ĩnaganĩrya nyiti, litolere itwalembalemba abalĩkyetu ĩbatsũka erigenda ewenyũ erĩmbere, nʼerĩtegekanĩa olũsũnzo lubuya olo mwalaga erĩmbere, litya olũsũnzo olo ilwabya lũsũnzo lwʼekwenene butsira olũsũnzo lwʼerihatikanwa.

⁶ Uminye ekĩ, oyukabiba bike asyagesa bike; nʼoyukabiba bingi asyagesa bingi.

⁷ Obuli mundu ahĩre omo kĩbo ngoko abiriyisoga omo mutima wuwe; siahe nʼobuhemu, kutse erĩkũnwa; kusangwa Nyamuhanga anzĩre omundu oyukaha nʼerĩyĩsyandira.

⁸ Kandi Nyamuhanga akatoka eribaha ebĩlabĩre obwaga bwenyũ, imwabya nʼebyosĩ ebibatolere, nʼebikabwaga busana nʼobuli mũbĩrĩ owene.

⁹ Ngoko kĩsakĩre kiti, Akahĩtaya ndeke busana nʼabera, Obwenge buwe ni bwʼerikota.

¹⁰ Neryo Nyamuhanga oyukaha embuto okwʼoyukabiba, nʼobundu bwʼerirya asyabaha embuto, nʼerĩlasyayo ndeke, nʼerireka imwagesa binene busana nʼekibuya kyenyũ.

¹¹ Asyabatekesya omo byosĩ imwatoka erĩhĩtya ndeke, neryo abandu bangi basyaha Nyamuhanga yʼewasĩngya busana nʼolũsũnzo olo mukatuma omo byala byetu.

¹² Kusangwa erikola omũbĩrĩ oyũ siendisyabuga obwaga bwʼabandu ba Nyamuhanga busa, nĩkwa kwilaba aho asyaleka abandu ibaha Nyamuhanga yʼewasĩngya nene.

¹³ Kandi busana nʼekĩmĩnyĩsyo kyʼomũbĩrĩ wenyũ oyũ, abangi basyaha Nyamuhanga olukengerwa ĩbakalebaya ngoko mukakenga Engulu Yowene ya Kristo, eyo mukakwama. Kandi ĩbakalebaya ngoko mukakola ebibuya erisangira ebindu byenyũ haguma nabo nʼabandi bandu.

¹⁴ Neryo basyabasabira omo lwanzo lunene busana nʼolukogo lunene olo Nyamuhanga abĩrĩbakangya.

¹⁵ Tuhe Nyamuhanga yʼewasĩngya busana nʼolũsũnzo luwe olute lwangatoka erĩkanĩbwa.