2 AbanyaKorinto 2 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Kandi monayisoha omo mutima wage, nyiti sindiendĩsyaswahĩka ewenyũ eribaletera obũlĩge.

² Kusangwa namabĩta obũlĩge, nindi wasyanyĩtsangamũkya kwehĩ? Ba nʼabo nĩta obũlĩge.

³ Ekyo kyo kyanaleka inabasakira ebarua, kusangwa sinabya nyanzĩre erĩbahĩkako nʼerĩĩtwa obũlĩge nʼabandu abo abatolere erĩnyĩtsangamũkya. Kusangwa nyasĩ omugulu ngatsema, nʼĩnywe bosĩ mukabana obutseme.

⁴ Kandi monabasakira ebarua inabiribya omo bũlĩge bunene nʼeriagalwa lyʼomutima, haguma nʼemĩsonĩa mingi. Sinabya nyanzĩre erĩbĩta obũlĩge, nĩkwa mutoke eriminya olwanzo lunene olo nabya nalo busana nenyũ.

Eribuyira oyukakola nabi

⁵ Nĩkwa omundu amabya abĩrĩta ogundi yʼobũlĩge, Ĩsĩ ĩngye akĩtabo, nĩkwa abĩrĩbĩta obũlĩge, mbino hake-hake, ĩnywe bosĩ.

⁶ Omundu oyo abirisuyirwa bingaho nʼerisuyirwa lyʼabangi omo katĩkatĩ kenyũ.

⁷ Nĩkwa lino mutolere erimubuyira nʼerĩmũkĩranĩa, akasyakĩndwa nʼobũlĩge bunene.

⁸ Neryo ngabalemba-lemba, mũkangaye ndeke olwanzo lwenyũ busana naye.

⁹ Kandi busana nʼomwatsi ono nabasakira ebarua eyo, nyiti nyibalenge nʼeriminya nga mũkanyowa omo myatsi yosĩ.

¹⁰ Omugulu mukabuyira omundu busana nʼekyo akola, nage ngamubuyira nibya. Kandi namabuyira omundu omwatsi, hamabya hali omwatsi wʼeribuyira, nakola nyitya embere sya Kristo busana nenyũ.

¹¹ Neryo Satanĩ sĩyĩtũsĩnge omo mwatsi, kusangwa tũnasĩ esyombĩta syayo.

Erĩhanga-hangya lya Paũlo eTroa

¹² Omugulu nahĩka eTroa erĩtũla Engulu Yowene ya Kristo, neryo monaminya Omukama kwʼabirikingula enzira busana nage erikola omũbĩrĩ wuwe.

¹³ Nĩkwa mondĩkala buholo omo mutima wage, kusangwa mondeyaho mũlĩkyetu Tĩto. Neryo monalagabo Obuholo, monaya eMakedonĩa.

Kristo akatuha erĩsĩngana

¹⁴ Nĩkwa ewasĩngya uku Nyamuhanga, kusangwa tumatikene na Kristo, naye akatusondola emigulu yosĩ ehosĩ omwʼĩsĩngana liwe. Kandi akaleka ĩtwakangya ehosĩ ekikumbo kyowene kyʼeriminya Kristo.

¹⁵ Kusangwa tuli ngʼobukwa bwa Kristo embere sya Nyamuhanga obukakumba ndeke busana nʼabakalamĩbawa, kandi busana nʼabakahera.

¹⁶ Ukwʼabo bakatogota ni kikumbo kyʼoluholo, nĩkwa oko bakalamĩbawa ni kikumbo kyowene kyʼengebe. Ko nindi yukatoka omũbĩrĩ oyũ kwehĩ?

¹⁷ Kusangwa Situli ngʼabandi bangi abakatũndaya ekĩnywa kya Nyamuhanga. Nĩkwa omo kwenene, tũkabũga embere sya Nyamuhanga ebĩnywa bĩkalũa uku Nyamuhanga; kandi, tũkabũga ngʼabagombe ba Kristo.