2 Abami 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami akasũbũlaya ebindu byʼomũkalĩ wʼeSũnemũ

¹ Neryo Elĩsa mwabũga nʼomũkalĩ oyo asũbaya kwʼengebe yʼomugala wuwe ati, Hangana ugende, uwe, nʼekĩtũnga kyawe, ubungire eyo wangabungira; kusangwa Omwami Mukulu abiribirikira enzala; nayo ikandisyabya omo kihugo emyaka irinda.

² Nʼomũkalĩ oyo mwahangana mwakola ngʼekĩnywa kyʼomundu wa Nyamuhanga; mwagenda nʼekĩtũnga kiwe, mwabungira omo kihugo kyʼAbafĩlĩstĩnĩ emyaka irinda.

³ Neryo emyaka irinda eyo yabere yabihwa, omũkalĩ oyo mwasubula akalũa omo kihugo kyʼAbafĩlĩstĩnĩ; neryo mwayalakira omwami busana nʼenyũmba yiwe nʼekitaka kiwe.

⁴ Neryo omwami abya ĩnĩanemũkanĩa na Gehazĩ omugombe wʼomundu wa Nyamuhanga, ati, Kĩsĩ-kĩsĩ umbwire emyatsi yosĩ mikulu mikulu eyo Elĩsa abirikola

⁵ Neryo Gehazĩ abere akabwira omwami ngoko asũbaya engebe yʼoko yũholĩre, neryo, omũkalĩ oyo Elĩsa asũbaya kwʼengebe yʼomugala wuwe, mwalakira omwami busana nʼenyũmba yiwe na busana nʼekitaka kiwe. Neryo Gehazĩ mwabũga ati, Mukama wage, uwe mwami, oyũ yo mũkalĩ oyo, nʼoyũ yo mugala wuwe oyo Elĩsa asũbaya.

⁶ Nʼomugulu omwami abũlaya omũkalĩ oyo, naye mwamũkanĩryabyo. Neryo omwami mwamuha omukulu muguma ati, Ũmũsũbũlĩraye ebyosĩ abya awite, nʼebyosĩ ebyalũa omwʼirima liwe erĩtsũka ekiro asĩga ekitaka nʼerĩhĩka na lino.

Erĩkwa lya Benĩ-Hadadĩ omwami wʼeSũrĩa

⁷ Kandi Elĩsa mwahĩka eDamaseke; na Benĩ-Hadadĩ omwami wʼeSũrĩa abya alwere; neryo mwabwirwa, ambu, Omundu wa Nyamuhanga abĩrĩhĩka eno.

⁸ Nʼomwami mwabwira Hazaelĩ ati, Heka oluhembo omo byala byawe, ũyahĩndane nʼomundu wa Nyamuhanga, abũlaye Omwami Mukulu, ati, Nga nanasyalama oko ndwala eyĩ.

⁹ Neryo Hazaelĩ mwayahĩndana naye, mwaheka olũsũnzo, olũsũnzo lwʼobuli kindu kyowene kyʼeDamaseke, emiheke eyangahekwa nʼesyongamia makũmĩ ani, neryo mwasa mwahangana embere siwe, mwabũga ati, Omugala wawe ye Benĩ-Hadadĩ omwami wʼeSũrĩa abirinyituma ukʼuwe ati, Nanasyalama oko ndwala eyĩ kwehĩ?

¹⁰ Na Elĩsa mwamubwira ati, Ugende, umubwire uti, Kwenene wasyalama; nĩkwa Omwami Mukulu abĩrĩnyĩkangya ngoko akandisyahola kwenene.

¹¹ Neryo mwamugasamira, erĩhĩka okwʼihemuka; nʼomundu wa Nyamuhanga mwalira.

¹² Neryo Hazaelĩ mwabũga ati, omukama wage akalira busana nakĩ kwehĩ? Naye mwamũsũbĩrya ati, Kusangwa nyĩnasĩ ekibi ekyo wasyakolera abana ba Ĩsraelĩ; wasyahĩsya ahakongotere habo omo muliro, kandi wasyĩta abalwana babo omo mũyalĩ, kandi wasyatsũtsanga abana babo balere, kandi wasyasatangya abakule babo.

¹³ Neryo Hazaelĩ mwabũga ati, Nĩkwa omugombe wawe nĩkĩ, oyuli mbwa buyira, uti angakola ekitsibu ekĩ kwehĩ? Elĩsa mwasũbĩrya ati, Omwami Mukulu abĩrĩnyĩkangya ngoko Wasyabya mwami wʼeSũrĩa.

¹⁴ Neryo mwalũa ahali Elĩsa mwahĩka ahali omukama wuwe; naye mwabũga naye ati, Elĩsa mwakubwira atĩkĩ kwehĩ? Naye mwamũsũbĩrya ati, Mwambwira ati, Kwenene wasyalama.

¹⁵ Neryo bwabere bwabya omo ngyakya Hazaelĩ mwĩmya olukimba olwʼengyingo mwatsapyalo omo magetsi, mwasanzalo oko bũsũ buwe, neryo Benĩ-Hadadĩ mwahola; na Hazaelĩ mwatabala omo mwanya wuwe.

Yoramũ akatabala oko Yũda

¹⁶ Oko mwaka wʼakatanu wa Yoramũ mugala wa Ahabũ omwami wʼeĨsraelĩ, Yehosafatĩ iniane mwami wʼeYũda, Yoramũ mugala wa Yehosafatĩ omwami wʼeYũda mwabya mwami.

¹⁷ Yoramũ abya wʼemyaka makũmĩ asatu nʼeyĩbĩrĩ omugulu abya mwami; neryo mwatabala emyaka munani eYerũsalema.

¹⁸ Neryo mwalendera omo nzira yʼabami ba Ĩsraelĩ, ngoko ekĩtũnga kya Ahabũ kyakola; kusangwa abya ĩnĩabĩrĩhĩkya mwali wa Ahabũ; kandi mwakola ekyabya kibi omo meso wʼOmwami Mukulu.

¹⁹ Nĩkwa Omwami Mukulu ĩsĩanzĩre erĩherya Abayũda, busana na Dawĩdĩ mugombe wuwe, kusangwa amulaga erimuha oyo Wasyabya mwami omo bana buwe ebiro byosĩ.

Edomũ nʼeLĩbũna bakayisamambula, na Yoramũ akahola

²⁰ Omo biro biwe, Edomũ mwayisamambula oko byala bya Yũda, neryo mobayĩhĩrĩra omwami.

²¹ Neryo Yoramũ mwasokera eZaĩrĩ nʼesyogalĩ siwe syosĩ haguma naye; neryo mwahangana omo kiro mwĩta Abanya Edomũ abamũtĩmbako, nʼabakulu bʼesyogalĩ; nĩkwa abasĩrĩkanĩ buwe mobatibita omo mahema wabo.

²² Edomũ mwayisamambula atya erĩlũa omo byala bya Yũda erĩhĩka na mũnabwĩre. Neryo Lĩbũna, nabo mobakola batya oko mugulu oyo.

²³ Nʼeyindi mĩbĩrĩ ya Yoramũ, nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami ba Yũda kwehĩ?

²⁴ Neryo Yoramũ mweya abotata-kulu buwe, mwatabwa haguma nʼabotata-kulu buwe omo mũyĩ wa Dawĩdĩ; na Ahazĩa mugala wuwe mwabya mwami omo mwanya wuwe.

Ahazĩa akatabala oko Yũda

²⁵ Omo mwaka wʼerĩkũmĩ nʼeyĩbĩrĩ wa Yoramũ mugala wa Ahabũ omwami wʼAbaĩsraelĩ, Ahazĩa mugala wa Yoramũ omwami wʼeYũda mwatsũka eritabala.

²⁶ Ahazĩa abya wʼemyaka makũmĩ abiri nʼeyĩbĩrĩ omugulu atsũka eribya mwami, neryo mwatabala eYerũsalema Omwaka muguma. Nʼerĩna lya koyo wuwe lyabya Atalia mwali wa Omrĩ omwami wʼeĨsraelĩ.

²⁷ Neryo mwalendera omo mibere yʼekĩtũnga kya Ahabũ, mwakola ekyabya kibi omo meso wʼOmwami Mukulu, ngoko ekĩtũnga kya Ahabũ kyakola; kusangwa abya mukwe wʼekĩtũnga kya Ahabũ.

²⁸ Neryo Ahazĩa mwagenda haguma na Yoramũ mugala wa Ahabũ erilwa na Hazaelĩ omwami wʼeSũrĩa eRamotĩ-gĩleadĩ; neryo Abasũrĩa mobahũtalya Yoramũ.

²⁹ Neryo omwami Yoramũ mwasubula erĩlamĩbwa eYezreelĩ busana nʼebironda ebyo Abasũrĩa bamũhũtalaya eRama, omugulu alwa na Hazaelĩ omwami wʼeSũrĩa. Na Ahazĩa mugala wa Yoramũ omwami wʼeYũda mwandagalira eYezreelĩ erilola uku Yoramũ mugala wa Ahabũ, kusangwa abya alwere.