2 Abami 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩsa akaminyerera endũlĩ yʼenzala

¹ Neryo Elĩsa mwabũga ati, Mowe ekĩnywa kyʼOmwami Mukulu. Omwami Mukulu ati, Omo ngyakya hakũhĩ nʼendambĩ eyĩ akalengĩ kʼeyĩsyano yʼenzelele kasyagũlĩbwa oko sekelĩ nguma, nʼotũlengĩ tubiri twʼekisusu oko sekelĩ nguma omo lũkyo lwʼeSamarĩa.

² Neryo omukulu oyo omwami abya egemereko oko byala biwe mwasũbĩrya omundu wa Nyamuhanga ati, Lebaya, Omwami Mukulu amayira amadĩrĩsa wʼelubula, omwatsi oyũ anganatokekana kwehĩ? Neryo Elĩsa mwabũga ati, Lebaya, wasyasamalirakyo omo meso wawe, nĩkwa Siwendisyalya kubyo.

Abasũrĩa bakasaga erihuha nʼesyongyĩndo

³ Neryo habya abahaga bani oko lũkyo lʼomũyĩ nabo mobabwirana bati, Busana nakĩ twĩkere hano erĩhĩka aho tukandisyaholera kwehĩ?

⁴ Twamabũga tuti, Tukandingira omo mũyĩ, neryo enzala iri omo mũyĩ, netu tukandiholera mugo; kandi twamĩkala hano, tukandihola nibya. Neryo lino mwase, tuyawe omo mulondo wʼAbanya Sũrĩa; bamatũbalya, twasyabyaho; kandi bamatwĩta, twasyahola tutya.

⁵ Neryo mobahangana bukaranda-randa, eriya oko kilaliriro kyʼAbanya Sũrĩa; nʼomugulu bahĩka ahatwĩrĩrye ekilaliriro kyʼAbanya Sũrĩa; lebaya, isihali mundu eyo.

⁶ Kusangwa Omwami Mukulu ĩnĩabĩrĩowĩsya omulondo wʼAbasũrĩa erihuha lyʼesyogalĩ, nʼesyongyĩndo syʼesyosabayĩrĩ, ngʼesyongyĩndo syʼomulondo munene; kandi mobabwirana bati, Lebaya, omwami wʼAbaĩsraelĩ abiriyagulirira abami bʼAbahĩtĩ, nʼabami bʼeMĩsĩrĩ base balwe netu.

⁷ Busana nʼekyo Abanya Sũrĩa mobahangana mobatibita bukasonda eriranda-randa, mobasĩganĩa amahema wabo, nʼesyosabayĩrĩ syabo, nʼesyopunda syabo, nʼekilaliriro kyo batya, mobasaga busana nʼengebe yabo.

⁸ Nʼomugulu abahaga aba bahĩka ahatwĩrĩrye ekilaliriro mobingira omo hema nguma, mobalya mobapũlya, mobaheka ebĩtsĩpa, nʼesyamagetsi, nʼesyongimba, mobayabĩsabyo; kandi mobaswasa, mobingira omo yindi hema, mobaheka ebindu ebirimo nibya, mobayabĩsabyo.

Omwami Mukulu akakĩnda Abasũrĩa

⁹ Neryo abahaga mobabwirana bati, Sitwekola ndeke. Mũnabwĩre ni kiro kyʼengulu yowene, netu tukabya bũkũtũ; twamalindirira erĩhĩka omo mwĩtsange erisuyira lĩkandĩtũhĩkako. Lino mwase, tukayabwira abʼomo nyũmba yʼOmwami.

¹⁰ Neryo mobayabirikira abateya bʼesyongyo syʼomũyĩ; mobabwirabo bati, Motũkahĩka oko kilaliriro kyʼAbasũrĩa, neryo, lebaya, isihali mundu eyo, kutse omulenge wʼomundu, nĩkwa esyosabayĩrĩ ĩsĩnahangĩre, nʼesyopunda ĩsĩnahangĩre, nʼesyohema isine buyira.

¹¹ Neryo abateya mobabirikira; mobatũlago oko bʼenyũmba yʼOmwami.

¹² Neryo omwami mwahangana omo kiro, mwabwira abagombe buwe ati, Ngandĩbakangya lino ebyo Abasũrĩa babiritukola. Banasĩ ngoko tũkwĩre enzala; kikaleka ĩbalũa omo kilaliriro ĩbayĩbĩsa omo kisuki, bati, Omugulu bakalũa omo mũyĩ, tukandihambabo ibaneho, netu itwingira omo mũyĩ.

¹³ Nʼomuguma gʼoko bagombe buwe mwamũsũbĩrya ati, Kĩsĩ-kĩsĩ, nyiti, abandi bandu bĩmaye esyosabayĩrĩ esĩtanu esĩsĩgere, esikiriho omo mũyĩ, lebaya, siri ngʼendeko yosĩ yʼAbaĩsraelĩ eyĩsĩgere mugo; lebaya, siri ngʼendeko yosĩ yʼAbaĩsraelĩ eyabĩrĩkwa; kandi tutumebo balebaye.

¹⁴ Neryo mobĩmya esyogalĩ ĩbĩrĩ haguma nʼesyosabayĩrĩ; nʼomwami mwatumabo erikwama omulondo wʼAbasũrĩa ati, Mugende, mũlebaye.

¹⁵ Neryo mobakwamabo erĩhĩka eYorodanĩ; neryo, lebaya, enzira yosĩ iyabiritsungana esyongimba nʼebindu, ebyo Abasũrĩa bagusa bakatibita. Neryo abakwenda mobasubula, mobabwira omwami.

Oluholo lwʼomundu oyo wategaya Olũyĩ

¹⁶ Neryo abandu mobahuluka, mobayahũnga ekilaliriro kyʼAbanya Sũrĩa. Neryo akalengĩ kʼeyĩsyano yiswere mokagulwa oko sekelĩ, nʼotũlengĩ tubiri twʼekisusu oko sekelĩ, ngʼekĩnywa kyʼOmwami Mukulu.

¹⁷ Nʼomwami mwahĩra omukulu oyukegemera oko byala biwe ategaye olũkyo; nʼabandu mobamulyatangirira omo lũkyo, naye mwahola ngoko mundu wa Nyamuhanga abũga, oyo wabũga omugulu omwami amwandagalirako.

¹⁸ Neryo, ngoko mundu wa Nyamuhanga abwira omwami ati, Otũlengĩ tubiri twʼekisusu busana nʼesekelĩ, nʼakalengĩ kʼeyĩsyano yʼenzelele busana nʼesekelĩ, byasyabya bitya omo ngyakya oko ndambĩ ngʼeyĩ omo lũkyo lwʼeSamarĩa.

¹⁹ Nʼomukulu oyo mwasũbĩrya omundu wa Nyamuhanga, ati, Lino, lebaya, Omwami Mukulu amayira amadĩrĩsa omo lubula omwatsi ali ngʼoyũ anganatokekana eribya kwehĩ? Elĩsa naye mwabũga ati, Lebaya, wasyalangirakyo omo meso wawe, nĩkwa Siwendisyalya kubyo.

²⁰ Neryo mokyamũhĩkako kitya; kusangwa abandu mobamulyatangirira omo lũkyo, mwahola.