2 Abami 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩsa akasabula embasa yʼabalwana

¹ Neryo abagala bʼabamĩnyererĩ mobabwira Elĩsa bati, Lebaya, aho twĩkere embere syawe ni hake kwĩtwe.

² Tũkakũbũlaya tuti, Tugende eYorodanĩ, nʼobuli mundu aheke omuti muguma, tũyĩhĩmbĩre eyo ahʼerĩĩkala. Naye mwasũbĩrya, ati, Mugende.

³ Nʼomuguma mwabũga ati, Kĩsĩ-kĩsĩ Ũlĩge erigenda haguma nʼabagombe bawe. Naye mwasũbĩrya ati, Ngandigenda.

⁴ Neryo mwagenda nabo; neryo omugulu bahĩka eYorodanĩ, mobakonda emiti.

⁵ Nĩkwa omuguma omugulu anemukonda omuti, ekigembe kyʼembasa mokyatogera omo magetsi; neryo mwalaka ati, Ĩyo-o! Mukama wage! Kusangwa kyayibwekawa.

⁶ Nʼomundu wa Nyamuhanga mwabũga ati, Kiryatogera hahi kwehĩ? Nʼomugulu amũkangayaho, neryo mwatwa akati, neryo mwagusa koho, kyaleka ekyuma ikyalereta.

⁷ Neryo Elĩsa mwabũga ati, ũyĩmĩrayekyo. Neryo mwasumba ebyala biwe, mwĩmyakyo.

Elĩsa akaminyerera erĩhĩka lyʼemilondo yʼeSũrĩa

⁸ Neryo omwami wʼeSũrĩa abya akalwa nʼAbaĩsraelĩ; neryo mwahanana haguma nʼabagombe buwe, ati, Halebe ho hasyabya ekilaliriro kyage.

⁹ Nʼomundu wa Nyamuhanga mwatuma oko mwami wʼeĨsraelĩ, ati, Ũtegaye sulabe aho; kusangwa Abasũrĩa bamandagaliraho.

¹⁰ Nʼomwami wʼAbaĩsraelĩ mwatuma oko kibuti ekyo mundu wa Nyamuhanga amubwira, nʼerimuhabula; naye mwayĩlamyaho butsira ngendo nguma kutse kabiri.

¹¹ Neryo omutima wʼOmwami wʼeSũrĩa mwasweka kutsibu busana nʼomwatsi oyũ; neryo mwabirikira abagombe buwe, mwabwirabo ati, Sĩmwanganyĩkangya nga nindi omo katĩkatĩ ketu oyuli oko luhande lʼOmwami wʼAbaĩsraelĩ kwehĩ?

¹² Nʼomuguma gʼoko bagombe buwe, mwabũga ati, Iyihi, mukama wage, uwe mwami; nĩkwa omũmĩnyererĩ Elĩsa oyuli eĨsraelĩ akabwira omwami wʼAbaĩsraelĩ ebĩnywa ebyo ũkabũga omo kisenge kyawe kyʼerigotseramo.

¹³ Naye mwabũga ati, Mugende, mũlebaye eyo ali, inatoka erituma nʼerimwenda. Neryo mobamubwira bati, Lebaya, ali eDotanĩ.

Elĩsa akalĩba ameso wʼomulondo wʼeSũrĩa

¹⁴ Neryo mwatumayo esyosabayĩrĩ, nʼesyogalĩ, nʼomulondo munene; mobasa omo kiro, mobatĩmba oko mũyĩ oyo.

¹⁵ Nʼomugulu omugombe wʼomundu wa Nyamuhanga abuka omo ngyakyangyakya, nʼeriya eyĩhya, lebaya, omulondo, nʼesyosabayĩrĩ, nʼesyogalĩ, syabya sĩtĩmbĩre oko mũyĩ oyo. Nʼomugombe wuwe mwamubwira ati, Ĩyo-o! Mukama wage! Tukolekĩ kwehĩ?

¹⁶ Naye mwamũsũbĩrya ati, Sigubahe; kusangwa abali haguma netu ni bangi kwilaba abali haguma nabo.

¹⁷ Neryo Elĩsa mwasaba ati, Uwe Mwami Mukulu, ũlĩbũle ameso wuwe, atoke erilangira. Neryo Omwami Mukulu mwalĩbũla ameso wʼomũlwana oyo; naye mwalangira; neryo lebaya, ekitwa ekyo ĩkyoswĩre kwʼesyosabayĩrĩ nʼesyogalĩ syʼomuliro esĩtĩmbĩre uku Elĩsa.

¹⁸ Nʼomugulu bamwandagalirako, Elĩsa mwasaba Omwami Mukulu ati, Ngakusaba, uyire abandu aba mo ndĩmatĩme. Neryo mwayirabo mo ndĩmatĩme ngʼekĩnywa kya Elĩsa.

¹⁹ Neryo Elĩsa mwabwirabo ati, Eyĩ si nzira, kutse oyũ sĩ mũyĩ oyo; munyikwame nage ngandĩbakolya oko mundu oyo mũkasonda-sondaya. Neryo mwaletabo eSamarĩa.

²⁰ Neryo omugulu bahĩka eSamarĩa, Elĩsa mwabũga ati, Mwami Mukulu, ũlĩbũle ameso wʼabandu aba, batoke erilangira. Neryo Omwami Mukulu mwalĩbũla ameso wabo, mobalangira; neryo, kwesĩ ibali omo katĩkatĩ kʼeSamarĩa.

²¹ Neryo omugulu omwami wʼeĨsraelĩ alangirabo, mwabwira Elĩsa ati, Tata wage, nyĩtebo kwehĩ? Nyĩtebo kwehĩ?

²² Neryo Elĩsa mwamũsũbĩrya ati, Ĩsĩwĩtabo; wanzĩre erĩĩta abo wanyega omo mũyalĩ wawe nʼobuta bwawe kwehĩ? Ũhĩre akalyo nʼamagetsi embere syabo balye nʼerĩpũlya, bagende oko mukama wabo.

²³ Neryo mwakokoteryabo erirya ĩnene; babere babirya nʼerĩpũlya, mwatumabo, nabo mobagenda oko mukama wabo. Nʼemilondo yʼeSũrĩa moyĩtaswahĩka omo kihugo kyʼeĨsraelĩ kandi.

ESamarĩa ikabya nʼenzala busana nʼerigoterwa na Benĩ-hadadĩ

²⁴ Neryo enyũma kwʼaho Benĩ-hadadĩ omwami wʼeSũrĩa mwahĩndanĩa emilondo yiwe yosĩ, neryo mwahetuka eriyagotera eSamarĩa.

²⁵ Neryo enzala nene moyabya eSamarĩa; neryo, mobagoterago erĩhĩka aho mutwe wʼepunda agũlĩrĩbawa oko syosekelĩ syʼekĩtsĩpa makũmĩ munani, nʼekihande kyʼakani kyʼolulengo lwʼemitoto yʼakalĩkũkũ ĩkyagũlĩbwa busana nʼesyosekelĩ ĩtanu syʼekĩtsĩpa.

²⁶ Neryo omwami wʼeĨsraelĩ abere akalaba endata oko lũhĩmbo, omũkalĩ mwamulakira ati, Mukama wage, uwe mwami, ũnyĩwatĩkaye.

²⁷ Nʼomwami mwabũga ati, Omwami Mukulu amatendĩkũwatĩkya, nasyakũwatĩkya nyiti kwehĩ? Ebyʼekĩhũmbĩro kutse ebyʼekikamiro kwehĩ?

²⁸ Neryo omwami mwamubwira ati, Ũkwĩrekĩ kwehĩ? Naye mwamũsũbĩrya ati, Omũkalĩ oyũ mwambwira ati, Utuhe mugala wawe tumulye mũnabwĩre, nʼomugala wage twasyamulya omo ngyakya.

²⁹ Neryo motũkahũka mugala wage, nʼerimulya; kandi omo ngyakya kwʼaho, monamubwira nyiti, Utuhe mugala wawe, tumulye; naye abĩrĩbĩsa mugala wuwe.

³⁰ Neryo omugulu omwami owa ebĩnywa byʼomũkalĩ, mwayitulangirako esyongimba siwe, nĩkwa abya iniakalaba endata oko lũhĩmbo; neryo abandu mobasamalira, neryo lebaya, iniabiriambala emisarandwe omwisi oko mubiri wuwe.

³¹ Neryo mwabũga ati, Nyamuhanga sĩanzĩge, omutwe wa Elĩsa mugala wa Safatĩ amamũsĩgalako mũnabwĩre.

³² Nĩkwa Elĩsa abya ĩnĩanĩkere omo nyũmba yiwe, nʼabakulu babya ĩbanĩkere haguma naye. Neryo omwami mwatuma omundu akalũa embere siwe nĩkwa omukwenda oyo ate amũhĩkako, Elĩsa mwabwira abakulu ati, Mũnemũlebya ngoko mugala oyũ wʼomwĩtĩ abirituma erĩnyĩlũsya kʼomutwe wage kwehĩ? Mũlebaye, omugulu omukwenda akahĩka mukinge Olũyĩ, mũmũkakĩraye oko lũyĩ. Omulenge wʼesyongyĩndo syʼebisando byʼomukama wuwe sisiri enyũma kwiye kwehĩ?

³³ Neryo abere akabũga nabo, lebaya, omukwenda mwamwandagalirako; neryo mwabũga ati, Lebaya, ekibi ekĩ kĩkalũa oko Mwami Mukulu; nangaswalindirira Omwami Mukulu busana nakĩ kwehĩ?