2 Abami 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩsa akalamaya omuhaga ye Namanĩ

¹ Neryo Namanĩ, omukulu wʼemilondo yʼOmwami wʼeSũrĩa, abya mundu mukulu embere wʼomukama wuwe, nʼowʼerĩsĩkĩbwa, kusangwa busana naye Omwami Mukulu mwaha eSũrĩa erĩkĩnda; kandi abya mbangĩ owʼamaka nĩkwa abya muhaga.

² Neryo Abasũrĩa babya ibabirigenda mo tulondo tulondo ibamabinyega akana-kato kalere erĩlũa omo kihugo kya Ĩsraelĩ; nako mokakolera omũkalĩ wa Namanĩ.

³ Neryo mwabwira omũkalĩ gʼomukama wuwe ati, Kumbe omukama wage ali embere wʼomũmĩnyererĩ oyuli eSamarĩa! Neryo ĩnĩamũlamya kwʼebihaga biwe.

⁴ Neryo Namanĩ mwayabwira omukama wuwe ati, Akana-kato ako kʼekihugo kya Ĩsraelĩ kamabũga katya na katya.

⁵ Neryo omwami wʼeSũrĩa mwabũga ati, Ugende, nage ngandituma ebarua oko mwami wʼeĨsraelĩ. Neryo Namanĩ mwahongoka, mwatwala esyotalanta ĩkũmĩ syʼekĩtsĩpa, nʼebihindi byʼesyamagetsi elfu ndatu (6,000), nʼesyongimba ĩkũmĩ.

⁶ Neryo mwaletera omwami wʼeĨsraelĩ yʼebarua, iti, Omugulu ebarua eyĩ ĩkakũhĩkako, lebaya, nabirituma omugombe wage Namanĩ ukʼuwe, iwatoka erĩmũlamya kwʼebihaga biwe.

⁷ Neryo omwami wʼeĨsraelĩ abere abisoma ebarua, mwasatangya esyongimba siwe, ati, Ĩngye indi Nyamuhanga kwehĩ erĩĩta nʼerĩsũbya engebe, kyaleka omundu oyũ inianyitumira omundu erĩmũlamya kwʼebihaga biwe kwehĩ? Nĩkwa ngababwira, muminye, mulangire ngoko akanyisonda kʼomwaga.

⁸ Neryo, omugulu Elĩsa omundu wa Nyamuhanga owa ngoko mwami wʼeĨsraelĩ amabĩsatangya esyongimba siwe, mwatuma oko mwami ati, Busana nakĩ wabĩrĩsatangya esyongimba syawe kwehĩ? Lino ase kwĩngye naye asyaminya ko hali mũmĩnyererĩ omo Ĩsraelĩ.

⁹ Neryo Namanĩ mwasa nʼesyosabayĩrĩ siwe nʼesyogalĩ siwe, mwahangana oko lũkyo lwʼenyũmba ya Elĩsa.

¹⁰ Neryo Elĩsa mwamutumako omukwenda, ati, Ugende, uyikosere omo Yorodanĩ ngendo sirinda, nʼomubiri wawe asyakusubako, kandi wasyera.

¹¹ Nĩkwa Namanĩ mwahitana, mwalũaho, mwabũga ati, Lebaya, naganĩraya nyiti, akandinyihulukira, nʼerihangana, nʼeribirikira oko lĩna lyʼOmwami Mukulu, Nyamuhanga wuwe, nʼerĩhũnga-hũngya ebyala biwe endata kwʼaho, nʼerĩlamya ebihaga.

¹² Ko Abana na Farĩtarĩ, esyonyũsĩ syʼeDamaseke, sĩsyowene kwilaba magetsi gosĩ wʼeĨsraelĩ kwehĩ? Sinangayikosere musyo, nʼeriera kwehĩ? Neryo mwabũnũkala mwalũaho omwʼihitana lĩnene.

¹³ Neryo abagombe buwe mobahĩka hakũhĩ, nʼerĩbũga naye bati, Tata wage, kumbe omũmĩnyererĩ akubwira erikola mwatsi munene, sĩwangakolĩrego kwehĩ? Neryo kwilaba aho amakubwira ati, Uyikose were, kwehĩ?

¹⁴ Neryo omwami mwandagala mwayĩtoberya omo Yorodanĩ mo ngendo sirinda, ngoko mundu wa Nyamuhanga abũga; nʼomubiri wuwe mwasuba, mwabya ngʼomubiri wʼomwana mulere, neryo mwera.

¹⁵ Neryo omugulu Namanĩ asuba ahali omundu wa Nyamuhanga, iye nʼendeko yiwe yosĩ, mobahangana embere siwe; neryo mwabũga ati, Lebaya lino, nyĩnasĩ ngoko hate Nyamuhanga omo kihugo kyosĩ, mo nʼomo Ĩsraelĩ. Na lino kĩsĩ-kĩsĩ, wĩmaye olũsũnzo oko mugombe wawe.

¹⁶ Nĩkwa Elĩsa mwabũga ati, Ngoko Mwami Mukulu aneho, oyo ngahangana embere siwe, sĩndĩendĩmya kindu. Neryo Namanĩ mwamuhatikana erĩĩmyalo; nĩkwa mwagana.

¹⁷ Neryo Namanĩ mwabũga ati, Kite kitya, nĩkwa, kĩsĩ-kĩsĩ, omugombe wawe ahabawe omuheke wʼekitaka owangahekwa nʼesyonyumbu ĩbĩrĩ; kusangwa omugombe wawe siendisyaswahera obuhere bwʼerĩokererya kutse ehongo oko Sindi nyamuhanga, nĩkwa oko Mwami Mukulu ĩyowene.

¹⁸ Omwami Mukulu abuyire omugombe wawe omwatsi oyũ: omugulu omukama wage akaya omo nyũmba ya Rĩmonĩ erĩyaramĩrya muyo, akayegemeraya oko byala byage, nage nasyũnamira omo nyũmba ya Rĩmonĩ, omugulu namayũnamira omo nyũmba ya Rĩmonĩ, Omwami Mukulu abuyire omugombe wawe omwatsi oyo.

¹⁹ Neryo Elĩsa mwamubwira ati, Ugende buholo. Neryo mwalũa aho ali ho hake.

Gehazĩ akakwa ebihaga busana nʼerirumwa oko bindu bya Namanĩ

²⁰ Nĩkwa Gehazĩ omugombe wa Elĩsa omundu wa Nyamuhanga, mwaganĩrya, ati, Lebaya, omukama wage abĩrĩbalya Namanĩ Omũsũrĩa oyũ, sĩalĩtĩmya omo byala biwe ebyo aleta. Ngoko Mwami Mukulu aliho, ngandimukwama, nʼerĩmwĩmya kwʼekindu.

²¹ Neryo Gehazĩ mwakwama Namanĩ. Neryo omugulu alangira omundu akasa akatibita enyũma siwe, Namanĩ mwakĩma oko galĩ erĩhĩndana naye, neryo mwabũga ati, Ni buholo kwehĩ?

²² Na Gehazĩ mwabũga ati, Ni buholo. Omukama wage abirinyituma ati, Lebaya, abalwana babiri oko bagala bʼabamĩnyererĩ bakabĩnyĩhĩkako lino bakalũa omo kihugo kyʼebitwa kyʼeEfũraĩmũ; kĩsĩ-kĩsĩ, uhebo etalanta yʼekĩtsĩpa nʼesyongimba ĩbĩrĩ.

²³ Na Namanĩ mwabũga ati, Ũlĩge eriheka esyotalanta ĩbĩrĩ. Neryo mwamuhatikana, mwaboha esyotalanta ĩbĩrĩ syʼebĩtsĩpa omo ngunza ĩbĩrĩ, haguma nʼesyongimba ĩbĩrĩ, mwahekyasyo abagombe buwe babiri; nabo mobahekasyo embere siwe.

²⁴ Nʼomugulu ahĩka oko kitwa, mwĩmyabyo omo byala byabo, mwahĩrasyo omo nyũmba; mwahongokya abandu abo, mobagenda.

²⁵ Nĩkwa ye Gehazĩ mwingira mwahangana embere syʼOmukama wuwe. Na Elĩsa mwamũbũlya ati, Gehazĩ ũkalũa hahi kwehĩ? Naye mwabũga ati, Omugombe wawe sialitaya hahi.

²⁶ Neryo mwamubwira ati, Omutima wage mwatagenda haguma nawe, omugulu omundu oyo akeba oko galĩ yiwe nʼerĩhĩndana nawe kwehĩ? Oyũ go mugulu wʼeriangirira ebĩtsĩpa, nʼeriangirira esyongimba, nʼamalima wʼemĩzeĩtũnĩ nʼamalima wʼebĩnyũ, nʼesyombũlĩ, nʼesyonume syʼende, nʼabagombe bʼobulume, nʼabagombe bʼobũkalĩ kwehĩ?

²⁷ Busana nʼekyo ebihaga bya Namanĩ byasyakwamakirira, nʼoko bana bawe erĩhĩka kera na kera. Neryo Gehazĩ mwalũa embere siwe iniamabibya muhaga ĩnĩahenĩrye ngʼenzururu.