2 Abami 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Abaĩsraelĩ bakalwa na Mesa omwami wʼeMoabũ

¹ Neryo Yoramũ mugala wa Ahabũ mwabya mwami oko Baĩsraelĩ eSamarĩa oko mwaka wʼerĩkũmĩ nʼomunani wa Yehosafatĩ omwami wʼeYũda, neryo mwatabala emyaka erĩkũmĩ nʼeyĩbĩrĩ.

² Neryo mwakola ekibi omo meso wʼOmwami Mukulu, nĩkwa butsira nga tata wuwe, na koyo wuwe; kusangwa mwalũsya endũyĩ ya Baalĩ eyo tata wuwe abatsa.

³ Nĩkwa mwamakirira ebibi bya Yeroboamũ omugala wa Nebatĩ ebyo akosesayamo Abaĩsraelĩ; mwatalekabyo.

⁴ Neryo Mesa omwami wʼeMoabũ abya mũtũngĩ wʼesyombũlĩ; neryo abya akahaka omwami wʼeĨsraelĩ yʼobweya bwʼebyana byʼesyombũlĩ elfu erĩgana (100,000), nʼobwʼesyombangale elfu erĩgana (100,000).

⁵ Nĩkwa Ahabũ abere abihola, omwami wʼeMoabũ mwahona oko mwami wʼeĨsraelĩ.

⁶ Neryo omwami Yoramũ mwalũa eSamarĩa oko mugulu oyo, neryo mwahĩndanĩa Abaĩsraelĩ bosĩ.

⁷ Neryo mwatumira uku Yehosafatĩ omwami wʼeYũda, ati, Omwami wʼeMoabũ abirihona kwĩngye; Wanganagenda haguma nage erilwa na Moabũ kwehĩ? Neryo Yehosafatĩ mwabũga ati, Ngandihetukirayo; ĩngye indi nga we, abandu bage bali ngʼabandu bawe, nʼesyosabayĩrĩ syage ngʼesyosabayĩrĩ syawe.

⁸ Neryo Yehosafatĩ mwabũga ati, Tukandisyalaba omo nzira yahi kwehĩ? Neryo Yoramũ mwamũsũbĩrya ati, Omo nzira yʼembwarara yʼeEdomũ.

⁹ Nʼomwami wʼeĨsraelĩ mwahongoka atya, nʼomwami wʼeYũda nʼomwami wʼeEdomũ; mobatĩmba omo lugendo lwʼebiro birinda; neryo sihabya magetsi busana nʼemilondo, kutse busana nʼesyonyama esyakwamabo.

¹⁰ Neryo omwami wʼeĨsraelĩ mwabũga ati, Ĩyoo! kusangwa Omwami Mukulu abiribirikira abami basatu aba haguma erĩhĩrabo omo byala bya Moabu.

¹¹ Nikwa Yehosafatĩ mwabũga ati, Hano sihali mũmĩnyererĩ wʼOmwami Mukulu oyo wangatũbũlĩrya Omwami Mukulu kwehĩ? Nʼomuguma gʼoko bagombe bʼomwami wʼeĨsraelĩ mwamũsũbĩrya ati, Elĩsa mugala wa Safatĩ ane hano, oyo gũtũlĩra amagetsi oko byala bya Elĩya.

¹² Neryo Yehosafatĩ mwabũga ati, Ekĩnywa kyʼOmwami Mukulu kiri haguma naye. Neryo omwami wʼeĨsraelĩ na Yehosafatĩ nʼomwami wʼeEdomũ mobamwandagalirako.

Elĩsa akaminyerera erĩkwa lyʼeMoabũ

¹³ Neryo Elĩsa mwabwira omwami wʼeĨsraelĩ ati, Ko ngwite mwatsi wahi nawe kwehĩ? Ugende oko bamĩnyererĩ ba tata wawe, nʼoko bamĩnyererĩ ba koyo wawe. Nʼomwami wʼeĨsraelĩ mwamubwira ati, Iyihi; kusangwa Omwami Mukulu abĩrĩhĩndanĩa abami basatu aba haguma erĩhĩrabo omo byala bya Moabũ.

¹⁴ Neryo Elĩsa mwabũga ati, Ngoko Mwami Mukulu wʼemilondo aliho, oyo nyihangene embere siwe, kumbe Sinditakenga embere sya Yehosafatĩ omwami wʼeYũda; sinangakusamalira kutse erikulolako.

¹⁵ Nĩkwa lino munyiretere omũwatĩ wʼenanga. Neryo omugulu omũwatĩ wʼenanga awatayo, ebyala byʼOmwami Mukulu mobyamũhĩkako.

¹⁶ Neryo mwabũga ati, Omwami Mukulu akabũga ati, Mũtsũnganaye omusya oyũ wʼemigende.

¹⁷ Kusangwa Omwami Mukulu ati, Simwendisyalola okwʼihunga kutse simwendisyalola oko mbũla; nĩkwa omusya oyo asyũsũla mwʼamagetsi, nenyũ mwasyapũlya, ĩnywe nʼesyonde syenyũ nʼesyonyama syenyũ.

¹⁸ Nʼoyũ ni mwatsi muke omo meso wʼOmwami Mukulu; kandi akandĩhĩra Abanya Moabũ bʼomo byala byenyũ nibya.

¹⁹ Nenyũ mwasyĩta obuli mũyĩ owakongotere, nʼobuli mũyĩ ogowene, kandi mwasyakonda obuli muti owene, kandi mwasyalĩba esyongũnũnũko syosĩ syʼamagetsi, nʼerĩtsandya obuli kitaka kyowene omo mabwe.

²⁰ Neryo omo ngyakya-ngyakya oko mugulu wʼerihonga obuhere bwʼeyĩsyano, neryo lebaya, amagetsi mwalũa omo nzira yʼeEdomũ, nʼekihugo mokyũsũla mwʼamagetsi.

²¹ Neryo Abamoabũ bosĩ mobowa ngoko abami babirihetuka erilwa nabo. Neryo abosĩ abatoka eriambala ebindu byʼamalwa nʼabandu bakulu kwʼaho mobabirikirwa, mobimana oko mutano.

²² Neryo mobabuka omo ngyakyangyakya, nʼeryuba molyakolerya oko magetsi, nʼAbanya Moabũ mobalangira amagetsi ayo awabya emuliro syabo ĩnĩahenĩrye ngʼomusasi.

²³ Mobabũga bati, Oyũ ni musasi; abami babirilwana kwenene, babĩrĩta obuli mundu mũlĩkyabo. Neryo lino, uwe Moabũ, mũyahũnge!

²⁴ Neryo omugulu bahĩka oko kilaliriro kya Ĩsraelĩ, Abaĩsraelĩ mobahangana mobĩta Abamoabũ, kyaleka Abamoabũ ibatibita embere syabo; neryo mobingira omo kihugo erĩĩta Moabũ.

²⁵ Litya mobaherya emĩyĩ; nʼobuli mundu mwagusa erĩbwe oko buli bitaka byowene, obuli mundu erĩbwe riwe, mobũsũlyakyo; kandi mobalĩba esyongũnũnũko syosĩ syʼamagetsi, kandi mobakonda emiti yosĩ yowene, erĩhĩka eKĩra-hasetĩ, nĩkwa mobatatoka olũhĩmbo lwako; nĩkwa abagũsĩ mobatĩmba kugo nʼerĩĩtago.

²⁶ Nʼomugulu omwami wʼeMoabũ alangira amalwa kwʼamamukalako, mwatwala abalume amagana alinda abakakula emĩyalĩ ati akahĩka oko mwami wʼeEdomũ; nĩkwa mobataluka.

²⁷ Neryo mwĩmya akambere kuwe oyo wangatabala omo mwanya wuwe; mwamuhera mo buhere bwʼerĩokererya oko lũhĩmbo. Neryo mohabya erihitana lĩnene oko Baĩsraelĩ: mobamuleka, mobasuba omo kihugo kyabo.