2 Abami 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhũngwa lyʼeYerũsalema nʼeHekalũ

¹ Neryo oko mwaka wʼomwenda wʼeritabala liwe, oko mukera wʼerĩkumĩ, nʼoko kiro kyʼerĩkũmĩ kyʼomukera oyo, Nebũkadeneza omwami wʼeBabelĩ mwasa iye nʼomulondo wuwe gosĩ, erilwa nʼeYerũsalema, neryo mwagoterago; kandi mwahĩra esyongonye oko mbande syosĩ.

² Nʼomũyĩ oyo mwagoterwa erĩhĩka oko mwaka wʼerĩkũmĩ nʼomuguma wʼOmwami Zedekĩa.

³ Nʼoko kiro kyʼomwenda kyʼomukera wʼakani enzala moyakanya omo mũyĩ, isihali kalyo busana nʼabandu bʼekihugo.

⁴ Neryo mobatobongola olũhĩmbo lwʼomũyĩ, nʼabandu bosĩ bʼamalwa mobatibita omo kiro omo nzira yʼoko lũkyo omo katĩkatĩ kʼesyombĩmbo ĩbĩrĩ, esyabya hakũhĩ nʼeririma lyʼOmwami. Nĩkwa Abakaldea babya ibabirilamba omũyĩ oko mbande syosĩ. Neryo mobagenda omo nzira yʼeAraba.

⁵ Nĩkwa emilondo yʼAbakaldea mobakwama omwami, mobamweya omo bwerere bwʼeYerĩko; nʼomulondo wuwe abya iniabiripanzikana erĩmũsĩganĩa.

⁶ Neryo mobahamba omwami, mobamutwala oko mwami wʼeBabelĩ eRĩbla; neryo mwamutswera.

⁷ Kandi mobĩtĩra abagala ba Zedekĩa embere wʼameso wuwe, mobarobongora ameso wa Zedekĩa, mobamuboha omo mahulula wʼemiringa, mobamutwala eBabelĩ.

Nebũzaradanĩ akahĩsaya eYerũsalema

⁸ Neryo oko mukera wʼakatanu, oko kiro kyʼebirinda kyʼomukera oyo, owabya mwaka wʼerĩkũmĩ nʼomwenda wʼOmwami Nebũkadeneza, omwami wʼeBabelĩ, Nebũzaradanĩ omukulu wʼabateya, omugombe wʼOmwami wʼeBabelĩ, mwahĩka eYerũsalema.

⁹ Naye mwahĩsya enyũmba yʼOmwami Mukulu, nʼenyũmba yʼOmwami; nʼamanyũmba gosĩ wʼeYerũsalema, mwahĩsya obuli nyũmba nene, mwahĩsyago omo muliro.

¹⁰ Nʼomulondo gosĩ wʼAbakaldea, ababya haguma nʼomukulu wʼabateya, mobahĩmbũla esyombĩmbo syʼeYerũsalema oko mbande syosĩ.

¹¹ Nʼabasaka oko bandu abasĩgawa omo mũyĩ, nʼabatswa abayitwala oko mwami wʼeBabelĩ, nʼabasĩgala bʼendeko, Nebũzaradanĩ omukulu wʼabateya mwatwalabo mo banyegwa.

¹² Nĩkwa omukulu wʼabateya mwasĩganĩa abera kutsibu bʼekihugo mo bakolerĩ bʼemiti yʼebĩnyũ nʼabalĩmĩ.

Abakaldea bakatulanga ebindu byosĩ byʼeHekalũ

¹³ Kandi Abanya Kaldea mobatulanga esyondũyĩ syʼomulinga esyabya omo nyũmba yʼOmwami Mukulu, nʼesyondĩna nʼengetsi yʼomulinga ebyabya omo nyũmba yʼOmwami Mukulu, mobaheka emiringa eritwalayo eBabelĩ.

¹⁴ Nʼesyonyungu, nʼemyũko, nʼebĩrĩmĩryo, nʼebibindi, nʼebindu byosĩ byʼemiringa ebyo babya bakakoleramo, mobahekabyo.

¹⁵ Nʼesyopano, nʼebibindi, ebyabya byʼesyamagetsi ebĩtũkwĩre, nʼebyabya byʼekĩtsĩpa omo kĩtsĩpa kĩtũkwĩre omukulu wʼabateya mwatwalabyo.

¹⁶ Nʼesyondũyĩ ĩbĩrĩ, nʼengetsi nguma, nʼesyondĩna, ebyo Solomono akokotaya busana nʼenyũmba yʼOmwami Mukulu, emiringa yʼebindu byosĩ ebĩ yabya isiyerengawa mo kĩlo.

¹⁷ Obuli bwʼendata bwʼendũyĩ nguma bwabya metere munani, nʼomutwe wayo wʼomulinga abya kuyo; nʼobuli bwʼendata bwʼomutwe oyo bwabya metere nguma na nusu, haguma nʼomũbĩrĩ wʼeriluka nʼamakomamanga oko mutwe oyo oko mbande syosĩ, ebyosĩ byʼomulinga; nʼendũyĩ yʼakabiri ko yabya itya haguma nʼomũbĩrĩ wʼeriluka.

¹⁸ Nʼomukulu wʼabateya mwahamba Seraya omũhererĩ mukulu, na Zefania omũhererĩ wʼakabiri, nʼabateya basatu bʼolũkyo.

¹⁹ Nʼoko mũyĩ mwahamba omukulu oyo wabya mukulu wʼabandu bʼamalwa; nʼabandu batanu ababya bahanĩ bʼomwami, ababanika omo mũyĩ; nʼomũhandĩkĩ wʼomukulu wʼomulondo, oyo wabya akabirikira bandu bʼekihugo; nʼabandu makũmĩ ndatu abʼekihugo, ababanika omo mũyĩ.

²⁰ Kandi Nebũzaradanĩ omukulu wʼabateya mwahambabo, mwaletabo oko mwami wʼeBabelĩ eRĩbla.

²¹ Neryo omwami wʼeBabelĩ mwĩtabo, mwaholeryabo eRĩbla omo kihugo kyʼeHamatĩ. Litya Yũda mwatwalwa mo banyegwa erĩlũa omo kihugo kyabo.

²² Nĩkwa abandu abasĩgalira omo kihugo kya Yũda, abo Nebũkadeneza omwami wʼeBabelĩ asĩganaya, mwahĩra ye Gedalĩa mugala wa Ahakĩmũ, mugala wa Safanĩ mo mukulu.

²³ Neryo omugulu abakulu bosĩ bʼemilondo, ibo nʼabandu babo, bowa ngoko mwami wʼeBabelĩ abĩrĩhĩra Gedalĩa mo mũtabalĩ; mobahĩka uku Gedalĩa eMĩsĩpa, ye Ĩsmaelĩ mugala wa Netanĩa, na Yehonanĩ, mugala wa Karea, na Seraya mugala wa Tahũmetĩ Omũnetofatĩ, na Yazanĩa mugala wa Makatĩtĩ, ibo nʼabandu babo.

²⁴ Na Gedalĩa mwalahĩrya kubo nʼoko bandu babo, mwabwirabo ati, Simubahe busana nʼabagombe bʼAbakaldea. Mwĩkale omo kihugo, mukolere omwami wʼeBabelĩ, neryo mwasyabana Obuholo.

²⁵ Nĩkwa oko mukera wʼeyirinda, Ĩsmaelĩ mugala wa Netanĩa, mugala wa Elĩsama wʼekihanda kyʼOmwami, mwasa, nʼabalume ĩkũmĩ, mobĩta Gedalĩa, naye mwahola, nʼAbayũda nʼAbakaldea ababya haguma naye eMĩsĩpa.

²⁶ Nʼabandu bosĩ abakebake nʼabakulu, nʼabakulu bʼemilondo, mobahangana, mobaya eMĩsĩrĩ; kusangwa mobubaha Abanya Kaldea.

²⁷ Neryo oko mwaka wʼamakũmĩ asatu nʼeyirinda owʼerĩhũngwa lya Yoyakĩnũ omwami wa Yũda, nʼoko mukera wʼerĩkũmĩ nʼeyĩbĩrĩ, oko kiro kyʼamakũmĩ abiri nʼebirinda kyʼomukera, Evĩlĩmerodakĩ omwami wʼeBabelĩ, oko mwaka ogo atsũka eribya mwami, mwabohola Yoyakĩnũ omwami wʼeYũda erĩmũlũsya omo mũlĩkĩ.

²⁸ Neryo mwabũga ndeke naye, mwahĩra ekĩtũmbĩ kiwe kyʼobwami endata oko bĩtũmbĩ byʼabami ababya haguma naye eBabelĩ.

²⁹ Neryo Yoyakĩnũ mwabindula esyongimba siwe syʼomũlĩkĩ. Neryo Yoyakĩnũ mwalya akalyo embere syʼOmwami butsira erĩũmbya ebiro byosĩ byʼeribyaho liwe.

³⁰ Nʼomwami mwamuha esĩkamũlĩsaya ebiro byosĩ, ekiro nʼekiro, ebiro byosĩ byʼeribyaho liwe.