2 Abami 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Yoyakĩmũ akakolera Babelĩ. Oluholo luwe

¹ Oko biro biwe, Nebũkadeneza omwami wʼeBabelĩ mwahetukirayo, na Yoyakĩmũ mwabya mugombe wuwe oko myaka ĩsatu; neryo mwayisamambula ukwʼiye.

² Neryo Omwami Mukulu mwatuma emilondo yʼAbakaldea, nʼemilondo yʼAbasũrĩa, nʼemilondo yʼAbamoabũ, nʼemilondo yʼabana ba Amonĩ, erilwa naye. Neryo mwatumayo atya erilwa na Yũda nʼerĩheryabo ngʼekĩnywa kyʼOmwami Mukulu ekyo abũga nʼabagombe buwe abamĩnyererĩ.

³ Kwenene omwʼihana lyʼOmwami Mukulu ebĩ mobyahĩka uku Yũda, busana nʼerĩlũsyabo omo meso wuwe, busana nʼebibi bya Manase, ngʼebyosĩ ebyo akola.

⁴ Kandi busana nʼomusasi ate nʼomusango ogo ũta; kusangwa mosũlya eYerũsalema mʼomusasi owate nʼomusango; nʼOmwami Mukulu mwatalĩga eribuyira.

⁵ Neryo eyindi mĩbĩrĩ ya Yoyakĩmũ nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami bʼAbayũda kwehĩ?

⁶ Neryo Yoyakĩmũ mweya abotata-kulu buwe; nʼomugala wuwe Yoyakĩnũ mwabya mwami omo mwanya wuwe.

⁷ Nʼomwami wʼeMĩsĩrĩ mwataswasa kandi erĩlũa omo kihugo kiwe; kusangwa omwami wʼeBabelĩ ĩnĩamabĩhũnga ekihugo kyosĩ ekyabya kyʼOmwami wʼeMĩsĩrĩ erĩtsũka oko kũsĩ kʼeMĩsĩrĩ erĩhĩka oko lũsĩ Efũratĩ.

Eritabala lya Yoyakĩnũ

⁸ Yoyakĩnũ abya wʼemyaka erĩkũmĩ nʼomunani omugulu atsũka eribya mwami; neryo mwatabala eYerũsalema emikera ĩsatu; nʼerĩna lya koyo wuwe lyabya Nehũsĩta mwali wa Elnatanĩ wʼeYerũsalema.

⁹ Naye mwakola ekyabya kibi omo meso wʼOmwami Mukulu, ngʼebyosĩ ebyo tata wuwe akola.

Nebũkadeneza akahũnga eYerũsalema nʼerĩhĩra Zedekĩa mo mwami wʼeYerũsalema

¹⁰ Oko mugulu oyo, abagombe ba Nebũkadeneza omwami wʼeBabelĩ mobahetukira eYerũsalema, neryo mobagotera omũyĩ.

¹¹ Neryo Nebũkadeneza omwami wʼeBabelĩ mwahĩka oko mũyĩ oyo, omugulu abagombe buwe babya bakagoterago.

¹² Neryo Yoyakĩnũ omwami wʼeYũda mwahulukira omwami wʼeBabelĩ, iye na nyĩnya wuwe, nʼabagombe buwe, nʼabasondolĩ buwe, nʼabakulu buwe; nʼomwami wʼeBabelĩ mwamunyega oko mwaka wʼomunani wʼeritabala liwe.

¹³ Kandi mwatwala ebindu byosĩ byʼenyũmba yʼOmwami Mukulu, nʼebindu byʼenyũmba yʼOmwami, kandi mwatsũtsanga esyosahanĩ syosĩ syʼesyamagetsi, esyo Solomono omwami wʼeĨsraelĩ akokotaya omo Hekalũ yʼOmwami Mukulu, ngoko Mwami Mukulu abũga.

¹⁴ Neryo mwaheka Abanya Yerũsalema bosĩ, nʼabasondolĩ bosĩ, nʼesyombangĩ syosĩ, abanyegwa elfu ĩkũmĩ (10,000) nʼabʼamenge bosĩ nʼabahesĩ; mohatasĩgala mundu, ba nʼabera batya-batya bʼabandu bʼekihugo.

¹⁵ Kandi mwatwala Yoyakĩnũ yʼeBabelĩ na nyĩnya wʼOmwami, nʼabakalĩ bʼomwami, nʼabakulu buwe, nʼabakulu bʼekihugo, mwatwalabo mo banyegwa erĩlũa eYerũsalema erĩhĩka eBabelĩ.

¹⁶ Nʼesyombangĩ syosĩ elfu irinda (7,000), nʼabandu banyima bʼomũbĩrĩ nʼabahesĩ elfu nguma (1,000), abosĩ bʼamaka abasĩ erilwa, omwami wʼeBabelĩ mwahekabo mo banyegwa eritwalabo eBabelĩ.

¹⁷ Nʼomwami wʼeBabelĩ mwahĩra Matanĩa, ĩsemulere wa Yoyakĩnũ mo mwami omo mwanya wuwe, kandi mwabindula erĩna liwe mo Zedekĩa.

¹⁸ Zedekĩa abya wʼemyaka makũmĩ abiri nʼomuguma omugulu atsũka eribya mwami; neryo mwatabala emyaka erĩkũmĩ nʼomuguma eYerũsalema; nʼerĩna lya koyo wuwe lyabya Hamĩtalĩ mwali wa Yeremĩa wʼeLĩbũna.

¹⁹ Naye mwakola ekyabya kibi omo meso wʼOmwami Mukulu, ngʼebyosĩ ebyo Yoyakĩnũ akola.

²⁰ Kusangwa busana nʼerihitana lyʼOmwami Mukulu omwatsi oyũ mwahĩka oko Yerũsalema nʼeYũda, erĩhĩka aho agusira abosĩ erĩlũa embere siwe. Na Zedekĩa mwayisamambula oko mwami wʼeBabelĩ.