2 Abami 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Yosĩa akasoma emigambo nʼerĩswahanganĩa endagano ya Nyamuhanga

¹ Neryo omwami mwatuma erĩyamũhĩndanĩrya abakulu bosĩ bʼeYũda nʼabʼeYerũsalema.

² Neryo omwami mwahetukira omo nyũmba yʼOmwami Mukulu, nʼabalume bosĩ ba Yũda, nʼesyondũlanĩ syʼeYerũsalema haguma naye, nʼabahererĩ, nʼabamĩnyererĩ, nʼabandu bosĩ, abake-bake nʼabakulu bakulu; neryo mwasomera omo matwĩ wabo mwʼebĩnywa byosĩ byʼekitabu kyʼendagano ekyabanika omo nyũmba yʼOmwami Mukulu.

³ Neryo omwami mwahangana hakũhĩ nʼendũyĩ, neryo mwayira endagano embere syʼOmwami Mukulu, erikwama Omwami Mukulu, nʼerĩteya ebihano biwe, nʼerĩtũlago liwe, nʼemigambo yiwe, nʼomutima wuwe gosĩ, nʼekĩrĩmũ kiwe kyosĩ, erĩsĩkya ebĩnywa byʼendagano eyĩ ebyasakawa omo kitabu ekĩ; nʼabandu bosĩ mobimanira oko ndagano eyo.

⁴ Neryo omwami mwahana Hĩlkĩa omũhererĩ mukulu, nʼabahererĩ bʼolulengo lwʼakabiri, nʼabateya bʼolũkyo, erĩhũlũkĩrya eyĩhya ebindu byosĩ ebyabya omo Hekalũ yʼOmwami Mukulu, ebyakolawa busana na Baalĩ, na busana na Asera, na busana nʼemilondo yosĩ yʼekyanya; neryo mwahĩsĩryabyo eyĩhya oko Yerũsalema, omo malima wʼeKĩdũronĩ, neryo mwaheka erĩbũ lyabyo eBetelĩ.

⁵ Kandi mwalũsya abahererĩ bʼesyosanamu, abo abami bʼAbayũda bahĩra busana nʼerĩhĩsĩrya obukwa bwʼahendata omo mĩyĩ yʼeYũda, nʼehandi hosĩ ahatĩmbĩre eYerũsalema; nabo nibya bahĩsaya obukwa oko Baalĩ, nʼoko lyuba, nʼoko mukera, nʼoko syongũnũnũ nene-nene, nʼoko milondo yosĩ yʼekyanya.

⁶ Kandi mwalũsya esanamu ya Asera omo nyũmba yʼOmwami Mukulu mwatwalayo eyĩhya wʼeYerũsalema oko kũsĩ kʼeKĩdũronĩ, mwahĩsyayo oko kũsĩ kʼeKĩdũronĩ, mwatũndũlayo eribya lũtũtũ, neryo mwagusa olũtũtũ olo oko sisinda syʼabandu.

⁷ Kandi mwaterya ebyumba byʼabamalaya bʼeHekalũ, ebyabya omo nyũmba yʼOmwami Mukulu, aho abakalĩ babya bakalukira esyongimba busana na Asera.

⁸ Kandi mwalũsya abahererĩ bosĩ omo mĩyĩ yʼeYũda, kandi mwatsandya ahendata aho abahererĩ abo bahĩsĩraya obukwa, erĩtsũka eGeba erĩhĩka eBerĩ-seba; kandi mwaterya ahendata hʼesyongyo, ahabya ahʼeriingirira hʼoko lũkyo lwa Yosũa omukulu wʼomũyĩ, ahabya oko byala byʼamalembe oko lũkyo lwʼomũyĩ.

⁹ Nĩkwa abahererĩ bʼahendata mobatahĩka oko kiherero kyʼOmwami Mukulu eYerũsalema, nĩkwa mobalya obundu obute mwʼekĩhamya omo katĩkatĩ kʼabagala babo.

¹⁰ Kandi mwatsandya eTofetĩ, eyiri omo musya wʼabana ba Hĩnomũ, omundu siatoke erĩlabya mugala wuwe omo muliro kutse mwali wuwe busana na Molekĩ.

¹¹ Kandi mwalũsya esyosabayĩrĩ esyo abami bʼAbayũda baha oko lyuba, esyabya ahʼeriingirira hʼenyũmba yʼOmwami Mukulu, hakũhĩ nʼekyumba kya Natana-melekĩ omũteya waho, ekyabya kĩhererenĩe nʼeHekalũ; kandi mwahĩsya esyogalĩ syʼeryuba omo muliro.

¹² Nʼebiherero ebyabya oko lutwe lwʼekyumba kyʼendata kya Ahazĩ, ebyo abami bʼeYũda bahĩmba, nʼekiherero aho Manase ahĩmba omo bibuga bibiri byʼenyũmba yʼOmwami Mukulu, omwami mwateryakyo, mwatũndũlakyo mwagusa olũtũtũ lwakyo omo kũsĩ kʼeKĩdũronĩ.

¹³ Nʼahendata ahabya embere wʼeYerũsalema, ahabya oko luhande lwʼamali lwʼekitwa kyʼerĩherĩbwa aho Solomono omwami wʼeĨsraelĩ ahĩmba busana na Asterotĩ esyonye syʼAbanya Sĩdonĩ, na busana na Kemosĩ esyonye sya Moabũ, na busana na Mĩlkomĩ esyonye syʼabana ba Amonĩ, omwami mwatsandyabyo.

¹⁴ Kandi mwatsũtsanga esyondũyĩ, mwakonda esanamu ya Asera, mũsũlya emyanya yaho omo makũha wʼabandu.

¹⁵ Kandi mwaterya ekiherero ekyabya eBetelĩ, nʼahendata aho Yeroboamũ mugala wa Nebatĩ ahĩmba, oyo wakolesaya Ĩsraelĩ yʼebibi, ekiherero ekyo nʼahendata aho mwateryabyo. Neryo mwatũndũla amabwe waho, neryo mwaswabyo eribya lũtũtũ, kandi mwahĩsya esanamu ya Asera.

¹⁶ Neryo omugulu Yosĩa abũnũkala, mwalangira esisinda esyabya omo kitwa; neryo mwatuma ati balete amakũha awabya omo sisinda, mwahĩsyago endata oko kiherero, mwatsandyakyo, ngʼekĩnywa kyʼOmwami Mukulu ekyabũgawa nʼomundu wa Nyamuhanga, oyo wabũga emyatsi eyĩ.

¹⁷ Neryo mwabũga ati, Amahero ago ngalangira ni wandi kwehĩ? Nʼabandu bʼomũyĩ oyo mobamubwira bati, Ni sinda yʼomundu wa Nyamuhanga, oyo walũa eYũda oyo wabũga emyatsi eyo wabirikola oko kiherero kyʼeBetelĩ.

¹⁸ Neryo mwabũga ati, Mumuleke aho; Sihabye mundu ũkalũsaya amakũha wuwe. Neryo mobaleka amakũha wuwe, haguma nʼamakũha wʼomũmĩnyererĩ oyo walũa eSamarĩa.

¹⁹ Nʼamanyũmba gosĩ nibya wʼahendata awabya omo mĩyĩ yʼeSamarĩa, ago abami bʼAbaĩsraelĩ bahĩmba erĩhĩtanĩa Omwami Mukulu, Yosĩa mwalũsya goho, mwakola kugo emĩbĩrĩ yosĩ kwʼakola eBetelĩ.

²⁰ Kandi mwĩta abahererĩ bosĩ bʼahendata ababyayo, oko biherero, kandi mwahĩsya amakũha wʼabandu wʼendata kubyo; neryo mwasuba eYerũsalema.

Yosĩa akibuka Erikiruka

²¹ Neryo omwami mwahana abandu bosĩ ati, Mũtegaye Erikiruka oko Mwami Mukulu Nyamuhanga wenyũ, ngoko lĩsakĩre omo kitabu kyʼerilagana.

²² Kwenene sihabya Erikiruka eriri ngalyo erĩtsũka oko biro byʼabatswerĩ abatswera Ĩsraelĩ, kutse omo biro byosĩ byʼabami ba Ĩsraelĩ, kutse oko bami ba Yũda.

²³ Nĩkwa oko mwaka wʼerĩkũmĩ nʼomunani wʼOmwami Yosĩa, Erikiruka erĩ molyayirwa busana nʼOmwami Mukulu eYerũsalema.

²⁴ Kandi Yosĩa mwahiga abʼesyombĩnga, nʼabalagũlĩ, nʼesisumba, nʼesyosanamu, nʼesyonye syosĩ esyalolawako omo kihugo kya Yũda nʼeYerũsalema, iniatoka erĩberererya ebĩnywa byʼemigambo ebyasakawa omo kitabu ekyo Hĩlkĩa abugula omo nyũmba yʼOmwami Mukulu.

²⁵ Kandi mohatabya mwami nga ye embere siwe, oyo wabindukira Omwami Mukulu nʼomutima wuwe gosĩ, nʼekĩrĩmũ kiwe kyosĩ, nʼoko maka wuwe gosĩ, ngʼemigambo yosĩ ya Musa; kutse mohatahangana ogundi nga ye enyũma kwiye.

²⁶ Nĩkwa Omwami Mukulu mwatabinduka oko bukali bwʼerihitana lĩnene liwe eryaleka erihitana liwe iryagulumira oko Yũda, busana nʼerĩsohya lyosĩ eryo Manase amũsoha-sohaya mubyo.

²⁷ Neryo Omwami Mukulu mwabũga ati, Nasyahũmĩrya Yũda yo hali oko meso wage ngoko nabĩrĩhũmya Ĩsraelĩ, kandi nasyagusa omũyĩ ogo nayisoga, owʼeYerũsalema, nʼenyũmba eyo nahula nyiti, Erĩna lyage lyasyabyamo.

Oluholo lwa Yosĩa

²⁸ Neryo eyindi mĩbĩrĩ, eya Yosĩa, nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami ba Yũda kwehĩ?

²⁹ Oko biro biwe, Farao-neko omwami wʼeMĩsĩrĩ mwaya oko mwami wʼeAsũrĩa erĩhĩka oko lũsĩ Fũratĩ. Neryo omwami Yosĩa mwayahĩndana naye; na Farao-neko omugulu amulolako mwamwĩtĩra eMĩgĩdo.

³⁰ Nʼabagombe buwe mobamuheka omo galĩ iniabirihola erĩlũa eMĩgĩdo, mobamuleta eYerũsalema, mobamuta omwʼisinda yiwe. Nʼabandu bʼekihugo mobĩmanĩa Yoahazĩ mugala wa Yosĩa, mobamũhakabya amagũta, mobamuyira mo mwami omo mwanya wa tata wuwe.

Eritabala lya Yoahazĩ oko Yũda

³¹ Yoahazĩ abya wʼemyaka makũmĩ abiri nʼeyĩsatu omugulu atsũka eribya mwami; neryo mwatabala eYerũsalema emikera ĩsatu; nʼerĩna lya koyo wuwe lyabya Hamũtalĩ mwali wa Yeremĩa wʼeLĩbũna.

³² Naye mwakola ekyabya kibi omo meso wʼOmwami Mukulu, ngoko abotata-kulu buwe bakola.

³³ Neryo Farao-neko mwamũhĩra omo mũlĩkĩ eRĩbla omo kihugo kyʼeHamatĩ, siabye akatabala eYerũsalema; kandi mwalĩhĩsya ekihugo ekyo omuhako wʼesyotalanta syʼekĩtsĩpa erĩgana, nʼetalanta nguma yʼesyamagetsi.

³⁴ Kandi Farao-neko mwayira Elĩakĩmũ mugala wa Yosĩa mo mwami omo mwanya wa Yosĩa tata wuwe, mwabindula erĩna liwe mo Yoyakĩmũ; nĩkwa mwatwala Yoahazĩ, mwamuleta eMĩsĩrĩ, neryo mwaholerayo.

³⁵ Na Yoyakĩmũ mwaha Farao yʼebĩtsĩpa nʼesyamagetsi; nĩkwa mwalĩhĩsya omusolo omo kihugo ngʼerihana lya Farao. Mwalĩhĩsya abandu bʼekihugo bʼebĩtsĩpa nʼesyamagetsi obuli mundu ngʼebindu biwe ko byabya, erihabyo Farao-neko.

Eritabala lya Yoyakĩmũ

³⁶ Yoyakĩmũ abya wʼemyaka makũmĩ abiri nʼeyĩtanu omugulu atsũka eribya mwami; neryo mwatabala eYerũsalema emyaka ĩkũmĩ nʼomuguma; nʼerĩna lya koyo wuwe lyabya Zebĩda mwali wa Pedaya wʼeRũma.

³⁷ Naye mwakola ebyabya bibi omo meso wʼOmwami Mukulu, ngʼebyosĩ abotata-kulu buwe bakola.