2 Abami 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lya Yosĩa oko Yũda

¹ Yosĩa abya wʼemyaka munani omugulu atsũka eribya mwami, neryo mwatabala eYerũsalema emyaka makũmĩ asatu nʼomuguma nʼerĩna lya koyo wuwe lyabya Yedĩda mwali wa Adaya wʼeBozĩkatĩ,

² Neryo mwakola ebibuya omo meso wʼOmwami Mukulu, mwalendera omo nzira yosĩ, ya tata wuwe Dawĩdĩ, mwatalendera ehandi oko luhande lwʼamali kutse lwʼamalembe.

Yosĩa akasũbaya eHekalũ

³ Neryo oko mwaka wʼerĩkũmĩ nʼomunani ogʼomwami Yosĩa, omwami mwatuma Safanĩ, mugala wa Azalĩa, mugala wa Mesũlamĩ, omũhandĩkĩ, oko nyũmba yʼOmwami Mukulu, ati,

⁴ Uye eyiri Hĩlkĩa omũhererĩ mukulu, atoke eriganza esyofranka syosĩ esyaletawa omo nyũmba yʼOmwami Mukulu esyo abateya bʼolũkyo bĩmaya oko bandu.

⁵ Bahesyo omo byala byʼabakolĩ bʼomũbĩrĩ abakahanganira enyũmba yʼOmwami Mukulu; nabo bahesyo oko bakolĩ bʼomũbĩrĩ abali omo nyũmba yʼOmwami Mukulu, basũbaye ahasambukere oko nyũmba,

⁶ oko babatsĩ, nʼabahĩmbĩ, nʼabahĩmbĩ bʼamabwe, na busana nʼerigula ebisayi nʼamabwe awabatsĩre busana nʼerĩsũbya enyũmba.

⁷ Nĩkwa sĩmũbũlayebo busana nʼesyofranka esĩkahĩrawa omo byala byabo, kusangwa bakakola butalegula.

⁸ Nʼomũhererĩ mukulu Hĩlkĩa mwabwira Safanĩ omũhandĩkĩ, ati, Ĩngye nabiribana ekitabu kyʼemigambo omo nyũmba yʼOmwami Mukulu. Na Hĩlkĩa mwaha ekitabu ekyo kyo Safanĩ, naye mwasomakyo.

⁹ Neryo Safanĩ omũhandĩkĩ mwasa oko mwami, mwamuletera engulu eyo ati, Abagombe bawe babiriheka ebĩtsĩpa ebyabanika omo nyũmba, babirihabyo oko bakolĩ bʼomũbĩrĩ abakahanganira enyũmba yʼOmwami Mukulu.

¹⁰ Neryo Safanĩ omũhandĩkĩ mwabwira omwami ati, Omũhererĩ Hĩlkĩa mwakamba ekitabu. Neryo Safanĩ mwasomakyo embere syʼOmwami.

¹¹ Neryo omwami abere abĩowa ebĩnywa byʼekitabu ekyo kyʼemigambo, mwasatangya esyongimba siwe.

¹² Nʼomwami mwahana Hĩlkĩa omũhererĩ, na Ahĩkamũ mugala wa Safanĩ, na Akĩborĩ mugala wa Mĩkaya, nʼomũhandĩkĩ Safanĩ, na Asaya omugombe wʼOmwami, ati,

¹³ Mugende, mũbũlaye Omwami Mukulu busana nage, na busana nʼabandu, na busana nʼAbayũda bosĩ, busana nʼebĩnywa byʼekitabu ekĩ ekyabiribanika; kusangwa erihitana lyʼOmwami Mukulu nĩ ʼnene, eryo lyabiritugulumirirako, kusangwa abotata wetu mobatahulikirira ebĩnywa byʼekitabu ekĩ nʼerikola ngʼebyosĩ ebĩsakĩre mukyo busana netu.

¹⁴ Neryo Hĩlkĩa omũmĩnyererĩ, na Ahĩkamũ, na Akĩborĩ, na Safanĩ, na Asaya, mobaya uku Hũlda omũmĩnyererĩ wʼobũkalĩ, omũkalĩ wa Salumu, mugala wa Tĩkva, mugala wa Harhasĩ, omũteya wʼesyongimba, naye abya ĩkere eYerũsalema omo lundi luhande lwʼakabiri; neryo mobamũkanĩrya.

¹⁵ Naye mwabwirabo ati, Omwami Mukulu Nyamuhanga wa Ĩsraelĩ akabũga ati, Mubwire omundu oyo oyuliabatuma kwĩngye muti,

¹⁶ Omwami Mukulu amabũga ati, Lebaya, ngandisyaleta ekibi kyo hano, nʼoko syondũlanĩ syaho, bye bĩnywa byosĩ byʼekitabu ekyo mwami wʼeYũda aliasoma.

¹⁷ Kusangwa babĩrĩnyĩsĩganĩa, kandi babĩrĩhĩsya obukwa oko Sindi nyamuhanga, batoke erĩnyagalĩranĩa omo mĩbĩrĩ yosĩ yʼebyala byabo, busana nʼekyo erihitana lyage lyasyagulumira busana na hano, sĩryendĩsyalĩmĩbwa.

¹⁸ Nĩkwa omwami wʼeYũda oyo wabatuma erĩsyabũlya Omwami Mukulu, mwasyamubwira muti, Omwami Mukulu Nyamuhanga wa Ĩsraelĩ amabũga ati, Busana nʼebĩnywa ebyo gowa,

¹⁹ kusangwa omutima wawe abya molo, kandi mowayĩkehĩrye embere syʼOmwami Mukulu omugulu gowa ebyo nabũga busana na hano, na busana nʼesyondũlanĩ syaho, ngoko hasyabya kĩma, nʼeritakira, kandi wabĩrĩsatangya esyongimba syawe, nʼeririra embere syage; Omwami Mukulu ati, Namakowa.

²⁰ Busana nʼekyo, lebaya, nasyakũhĩndanĩa haguma nʼabotata-kulu bawe, nawe wasyahĩrwa omwʼisinda yawe nʼobuholo, kandi ameso wawe siendisyalangira ebibi byosĩ nasyaletera hano. Neryo mobaletera engulu eyĩ yʼOmwami kandi.