2 Abami 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lya Manase oko Yũda

¹ Manase abya wʼemyaka erĩkũmĩ nʼeyĩbĩrĩ omugulu atsũka eribya mwami, neryo mwatabala eYerũsalema emyaka makũmĩ atanu ʼĩtanu; nʼerĩna lya koyo wuwe lyabya Hefũsĩba.

² Naye mwakola ekyabya kibi omo meso wʼOmwami Mukulu, ngʼebyʼesyonye syʼebihanda ebyo Mwami Mukulu ahiga embere wʼabana ba Ĩsraelĩ.

³ Kusangwa mwahĩmba ahendata aho tata wuwe Hezekĩa aheraya; kandi mwahanganĩa ekiherero busana na Baalĩ, mwakokotya esanamu ya Asera, ngoko Ahabũ omwami wʼeĨsraelĩ akola, kandi mwaramya emilondo yosĩ yʼelubula nʼerikolerayo.

⁴ Kandi mwahĩmba ebiherero omo nyũmba yʼOmwami Mukulu, aho Mwami Mukulu ahula ati, Oko Yerũsalema ko nasyahĩra erĩna lyage.

⁵ Kandi mwahĩmbaho ebiherero busana nʼemilondo yosĩ yʼelubula, omo bibuga bibiri byʼenyũmba yʼOmwami Mukulu.

⁶ Kandi mwalabya mugala wuwe omo muliro, kandi mwalagula, mwakwama obusaki, kandi mwakola haguma nʼabawite esyombĩnga, nʼabakũmũ; mwakola ebibi binene omo meso wʼOmwami Mukulu, nʼerĩmũhĩtanĩa.

⁷ Kandi mwahĩra esanamu eyĩbatsĩre ya Asera, eyo akokotaya, omo nyũmba eyo Mwami Mukulu abwira Dawĩdĩ na Solomono mugala wuwe ati, Nasyahĩra erĩna lyage kera na kera omo nyũmba eyĩ nʼomo Yerũsalema eyo nayisoga omo katĩkatĩ kʼebihanda byosĩ bya Ĩsraelĩ.

⁸ Neryo sindiendisyaleka ebisando bya Ĩsraelĩ eriganga-ganga kandi erĩlũa omo kihugo ekyo naha abotata wabo, bamateya erikola ebyosĩ ebyo nabirihanabo, kandi ngʼebihano byosĩ ebyo mugombe wage Musa ahanabo.

⁹ Nĩkwa mobatowa; na Manase mwatebabo bakole ebibi kwilaba ebyo ebihanda bakola ebyo Mwami Mukulu aheraya embere wʼabana ba Ĩsraelĩ.

Eritswera lyʼeYerũsalema busana na Manase

¹⁰ Neryo Omwami Mukulu mwabũga nʼabagombe buwe, abamĩnyererĩ ati,

¹¹ Kusangwa Manase omwami wʼAbayũda abirikola esyonye singaha, iniabirikola nabi kwilaba ebyo Abaamorĩ bakola, ababya embere siwe, kandi abĩrĩkosesya Yũda omo syosanamu siwe.

¹² Busana nʼekyo Omwami Mukulu Nyamuhanga wa Ĩsraelĩ akabũga ati, Lebaya, nasyaleta ekibi oko Yerũsalema nʼoko Yũda, neryo oyo wasyowa engulu yakyo amatwĩ wuwe abiri asyasesa.

¹³ Nage nasyasanza oko Yerũsalema kʼolukoba lwʼeSamarĩa, nʼolulengo lwʼekĩtũnga kya Ahabũ; kandi nasyasangula eYerũsalema ngoko mundu akasangula ekibindi, nʼerisangulakyo nʼerĩtũlĩkakyo.

¹⁴ Kandi nasyagusa abasĩgalira bʼomwandu wage, nʼerĩhĩrabo omo byala byʼesyonzĩgũ syabo; nabo basyabya banyegwa nʼabʼomũlĩkĩ oko syonzĩgũ syabo syosĩ;

¹⁵ kusangwa babirikola ebibi omo meso wage, kandi babĩrĩnyĩhĩtanĩa, erĩtsũka ekiro abotata-kulu wabo balũa eMĩsĩrĩ, nʼerĩhĩka oko kiro kya mũnabwĩre.

Oluholo lwa Manase

¹⁶ Kandi Manase mũta omusasi mungi owate ko musango, erĩhĩka aho amabyũsũlĩra eYerũsalema erĩtsũka oko luhande luguma nʼerĩhĩka oko lundi luhande; iniakatomeka okwʼĩlolo liwe eryo akosesayamo Yũda, nʼerikola ekyabya kibi omo meso wʼOmwami Mukulu.

¹⁷ Neryo eyindi mĩbĩrĩ ya Manase, nʼebyosĩ akola, nʼekibi ekyo akola, sĩbĩsakĩre omo kitabu kyʼemyatsi yʼemigulu yʼabami ba Yũda kwehĩ?

¹⁸ Na Manase mweya abotata-kulu buwe, mwatabwa omwʼirima lya Ũza; nʼomugala wuwe ye Amonĩ mwabya mwami omo mwanya wuwe.

Eritabala lya Amonĩ

¹⁹ Amonĩ abya wʼemyaka makũmĩ abiri nʼĩbĩrĩ omugulu atsũka eribya mwami; neryo mwatabala eYerũsalema emyaka ĩbĩrĩ; nʼerĩna lya koyo wuwe lyabya Mesũlemetĩ mwali wa Harũzĩ wʼeYotĩbatĩ.

²⁰ Naye mwakola ekyabya kibi omo meso wʼOmwami Mukulu, ngoko tata wuwe Manase akola.

²¹ Mwalendera omo syonzira syosĩ tata wuwe alenderamo, kandi mwakolera esyosanamu esyo tata wuwe akolera, nʼerĩramyasyo.

²² Kandi mwasĩganĩa Omwami Mukulu, Nyamuhanga wʼabotata-kulu buwe, mwatalendera omo nzira yʼOmwami Mukulu.

²³ Neryo abagombe ba Amonĩ mobamuhotera, mobĩtĩra omwami yʼomo nyũmba yiwe.

²⁴ Nĩkwa abandu bʼekihugo mobĩta abosĩ abahotera omwami Amonĩ; neryo abandu bʼekihugo ekyo mobayira Yosĩa mugala wuwe mo mwami omo mwanya wuwe.

²⁵ Neryo eyindi mĩbĩrĩ ya Amonĩ eyo akola, sĩyĩsakĩre omo kitabu kyʼemyatsi yʼemigulu yʼabami bʼeYũda kwehĩ?

²⁶ Neryo mwatabwa omwʼisinda yiwe omwʼirima lya Ũza; nʼomugala wuwe ye Yosĩa mwabya mwami omo mwanya wuwe.