2 Abami 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilwala nʼerilama lya Hezekĩa

¹ Oko biro ebyo, Hezekĩa mwalwala erĩhĩka hakũhĩ nʼerihola. Na Ĩsaya omũmĩnyererĩ mugala wa Amosĩ mwamũhĩkako, mwamubwira ati, Omwami Mukulu akabũga ati, Ũkokotaye emyatsi yʼomo kĩtũnga kyawe; kusangwa ukandihola siwendibyaho.

² Neryo Hezekĩa mwalolya obũsũ buwe oko lũhĩmbo mwasaba Omwami Mukulu, ati,

³ Uwe Mwami Mukulu ngakulakira nyiti Wibuke ngoko nalendera embere syawe omo kwenene nʼomutima ahĩkene, kandi nabirikola ebibuya omo meso wawe Na Hezekĩa mwalira kutsibu.

⁴ Neryo Ĩsaya ĩsĩalĩalũa omo kibuga kyʼomo katĩkatĩ, ekĩnywa kyʼOmwami Mukulu mokyamũhĩkako, kiti,

⁵ Usubule, Ubwire Hezekĩa omũsondolĩ wʼabandu bage, uti, Omwami Mukulu Nyamuhanga wa tata wawe Dawĩdĩ akabũga ati, Nabĩrĩowa erisaba lyawe, namalangira emĩsonĩa yawe; lebaya, ngandĩkũlamya; oko kiro kyʼebisatu wasyahetukira omo nyũmba yʼOmwami Mukulu.

⁶ Kandi nasyatomekera oko biro byawe emyaka erĩkũmĩ nʼeyĩtanu; kandi nasyakũlamya nʼomũyĩ oyũ erĩlũa omo byala byʼOmwami wʼeAsũrĩa; kandi nasyimira omũyĩ oyũ busana nage ĩngyowene, na busana na Dawĩdĩ omugombe wage.

⁷ Neryo Ĩsaya mwabũga ati, Wĩmaye ekitole kyʼomũtĩnĩ. Neryo mobĩmyakyo mobahĩrakyo oko kihute, neryo mwalama.

Erĩsũbya enyũma lyʼekyũtsũtsũ ebika ĩkũmĩ

⁸ Neryo Hezekĩa mwabwira Ĩsaya ati, Hasyabya ekiminyikalo kyahi eriminya ngoko Mwami Mukulu asyanyĩlamya, kandi ngoko nasyahetukira omo nyũmba yʼOmwami Mukulu oko kiro kyʼebisatu kwehĩ?

⁹ Neryo Ĩsaya mwabũga ati, Ekĩ kyasyabya kiminyikalo kĩkalũa oko Mwami Mukulu ekyo Mwami Mukulu asyakola ekyo abĩrĩbũga: ekyũtsũtsũ kyasyagenda embere yo bika ĩkũmĩ kutse kyasyasuba enyũma yo bika ĩkũmĩ kwehĩ?

¹⁰ Neryo Hezekĩa mwamũsũbĩrya, ati, Ni mwatsi muke ekyũtsũtũ kyamalaba embere ebika ĩkũmĩ; iyihi, nĩkwa ekyũtsũtsũ kisube enyũma ebika ĩkũmĩ.

¹¹ Na Ĩsaya omũmĩnyererĩ mwalakira Omwami Mukulu; naye mwasũbya ekyũtsũtsũ kyʼenyũma ebika ĩkũmĩ kwʼaho kyabya ikyabiriandagala oko bisambiro bya Ahazĩ.

Obũkĩrũ bwa Hezekĩa, erĩkangya abandu bʼeBabelĩ ebindu byʼenyũmba yiwe

¹² Oko mugulu oyo Berodakĩ-baladanĩ mugala wa Baladanĩ, omwami wʼeBabelĩ, mwatuma esyobarua nʼoluhembo uku Hezekĩa; kusangwa abya ĩnĩabĩrĩowa engulu yʼerilwala lya Hezekĩa.

¹³ Neryo Hezekĩa mwahulikirirabo, mwakangyabo enyũmba yosĩ yʼebindu biwe byʼobũgũlĩ bunene, ebĩtsĩpa, nʼesyamagetsi, nʼebikasiha ndeke omo manũkato, nʼamagũta wʼobũgũlĩ bunene, nʼenyũmba yʼebindu byʼamalwa biwe, nʼebyosĩ ebyabya omo syombĩso siwe; sihabya kindu omo nyũmba yiwe, kutse omo bwami buwe bosĩ ekyo atakangayabo.

¹⁴ Neryo omũmĩnyererĩ Ĩsaya mwasa oko mwami Hezekĩa, mwamubwira ati, Abandu abo mobabũgĩre batĩkĩ kwehĩ? Kandi bakũhĩkako ĩbakalũa hahi kwehĩ? Neryo Hezekĩa mwasũbĩrya ati, Balũa omo kihugo kyʼehali eBabelĩ.

¹⁵ Neryo Ĩsaya mwabũga ati, Mobakalangirakĩ omo nyũmba yawe kwehĩ? Na Hezekĩa mwasũbĩrya ati, Babirilangira ebyosĩ ebiri omo nyũmba yage; sihali kindu omo bindu byage ekyo ndetakangyabo.

¹⁶ Neryo Ĩsaya mwabwira Hezekĩa ati, Uhulikirire ekĩnywa kyʼOmwami Mukulu.

¹⁷ Lebaya, ebiro bikasa, neryo ebyosĩ ebiri omo nyũmba yawe, nʼebyo abotata wawe bayibikirira erĩhĩka mũnabwĩre, byasyahekwa eBabelĩ; Omwami Mukulu ati sĩhendĩsyasĩgala ekindu nʼekiguma.

¹⁸ Nʼabagala bawe abakasyalũa ukʼuwe abo wasyabuta, basyahekabo hali; basyabya bakonwe omo nyũmba yʼOmwami wʼeBabelĩ.

¹⁹ Neryo Hezekĩa mwabwira Ĩsaya ati, Ekĩnywa kyʼOmwami Mukulu ni kibuya ekyo wabĩrĩbũga. Kandi mwabũga ati, Sibiri bitya kwehĩ Obuholo nʼekwenene byamabya oko biro byage kwehĩ?

²⁰ Neryo eyindi mĩbĩrĩ ya Hezekĩa, nʼamaka wuwe gosĩ, kandi ngoko akwika ekitsinga, nʼomugende oyo, nʼerireta magetsi omo mũyĩ, sĩbĩsakĩre omo kitabu kyʼemyatsi yʼemigulu yʼabami bʼeYũda kwehĩ?

²¹ Neryo Hezekĩa mweya abotata-kulu buwe; na Manase mugala wuwe mwatabala omo mwanya wuwe.