2 Abami 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lya Hezekĩa. Nyamuhanga akalamaya eYerũsalema

¹ Neryo omugulu Hezekĩa owabyo, mwasatangya esyongimba siwe, mwambala emisarandwe, mwingira omo nyũmba yʼOmwami Mukulu.

² Neryo mwatuma Elĩakĩmũ, oyo wabya mũhanganĩrĩ wʼenyũmba yiwe, na Sebũna omũhandĩkĩ nʼabakulu bʼabahererĩ, ibanambite emisarandwe, ahali Ĩsaya mugala wa Amosĩ.

³ Mobamubwira bati, Hezekĩa amabũga ati, Mũnabwĩre ni kiro kyʼobũlĩge, nʼekyʼerihayirwa, nʼekyʼeriponwa; kusangwa abana bakasonda eributwa isihali kagala kʼeriswabutabo.

⁴ Kwamũhwa Omwami Mukulu Nyamuhanga wawe akandĩowa ebĩnywa byosĩ bya Rabsake oyo mukama wuwe omwami wʼeAsũrĩa abirituma eritsuma Nyamuhanga oyuliho, kandi akandikunga ebĩnywa ebyo Mwami Mukulu Nyamuhanga wawe abĩrĩowa; busana nʼekyo, Usumbe erisaba lyawe busana nʼenzĩgalya eyabĩrĩsĩgala.

⁵ Neryo abagombe bʼomwami Hezekĩa mobahĩka uku Ĩsaya.

⁶ Na Ĩsaya mwabwirabo ati, Mubwire omukama wenyũ muti, Omwami Mukulu amabũga ati, Sigubahe ebĩnywa ebyo ũkabĩowa, ebyo abagombe bʼomwami wʼeAsũrĩa balianyitsuma.

⁷ Lebaya, ngandĩhĩra ekĩrĩmũ omwisi wuwe, akandĩowa esyongulu iniasuba omo kihugo kiwe. Kandi nasyaleka iniawa omo mũyalĩ omo kihugo kiwe.

⁸ Neryo Rabsake oyo mwasubula mweya omwami wʼeAsũrĩa inianemulwa nʼeLĩbũna; kusangwa ĩnĩabĩrĩowa ko mwami abĩrĩlũa eLakĩsĩ.

⁹ Kandi omugulu owa engulu ya Tĩraka omwami wʼeEtĩopĩa ambu, Lebaya, abirihuluka nʼerilwa nawe, neryo mwaswatuma abakwenda uku Hezekĩa ati,

¹⁰ Mubwire Hezekĩa omwami wʼeYũda muti, Suleke Nyamuhanga wawe oyo ukayiketera akakuteba, ati eYerũsalema sĩyendĩsyahĩrwa omo byala byʼOmwami wʼeAsũrĩa.

¹¹ Lebaya, wabĩrĩowa ebyo abami bʼeAsũrĩa babirikolera ebihugo byosĩ, erĩheryabyo kutsibu. Nawe wasyalamĩbwa kwehĩ?

¹² Kwʼesyonyamuhanga syʼebihanda ebyo abotata wage baheraya, mosyalamyabo kwehĩ? nga Gosanĩ, na Haranĩ, na Resefĩ, nʼabana bʼeEdenĩ ababya eTelasarĩ kwehĩ?

¹³ Omwami wʼeHamatĩ ali hahi, nʼomwami wʼeAarapadĩ, nʼomwami wʼomũyĩ wʼeSefarĩvaĩmũ, nʼowʼeHena, nʼowʼeĨva kwehĩ?

Hezekĩa akatwala ebarua ya Senakarĩbũ wʼeAsũrĩa omo nyũmba ya Nyamuhanga

¹⁴ Neryo Hezekĩa mwangirira ebarua omo byala byʼabakwenda, mwasomayo; neryo Hezekĩa mwahetukira omo nyũmba yʼOmwami Mukulu, mwasanzayo embere syʼOmwami Mukulu.

¹⁵ Neryo Hezekĩa mwasaba embere syʼOmwami Mukulu, mwabũga ati, Uwe Mwami Mukulu, Nyamuhanga wa Ĩsraelĩ, uwe wĩkere endata oko makerũbĩ, uwe uli Nyamuhanga, uwe ĩgowene, oko mami gosĩ wʼekihugo; wabirihangika olubula nʼekihugo.

¹⁶ Uwe Mwami Mukulu, utege okũtũ kwawe, wowe; uwe Mwami Mukulu, Usumbe ameso wawe, ulangire, wowe ebĩnywa bya Senakarĩbũ, ebyo abirituma ati atsume Nyamuhanga oyuliho.

¹⁷ Kwenene Mwami Mukulu, abami bʼeAsũrĩa babiriyira ebihanda nʼebihugo byabo mo bĩma,

¹⁸ kandi babirigusa esyonyamuhanga syabo syʼomo muliro; kusangwa sisyabya esyonyamuhanga, nĩkwa nĩ mĩbĩrĩ yʼebyala byʼabandu, emiti nʼamabwe. Neryo busana nʼekyo mobaheryasyo.

¹⁹ Neryo lino, uwe Mwami Mukulu Nyamuhanga wetu, ngakulakira, nyiti ũtũlamaye omo byala biwe, amami gosĩ wʼekihugo aminye uwe Mwami Mukulu kʼuli Nyamuhanga ĩgowene.

²⁰ Neryo Ĩsaya mugala wa Amosĩ mwatuma uku Hezekĩa, ati, Omwami Mukulu, Nyamuhanga wʼeĨsraelĩ amabũga ati, Kusangwa wabirinyisaba busana na Senakarĩbũ omwami wʼeAsũrĩa, nabĩrĩkowa.

²¹ Ekĩnywa ekyo Mwami Mukulu abĩrĩbũga busana naye kyekĩ: omumbesa mwali wʼeSĩonĩ abirikupona nʼerĩkũsekererya kutsibu; mwali wʼeYerũsalema abĩrĩtsĩnga-tsĩngya omutwe wuwe enyũma kuwe.

²² Nindi oyo wabiritakira nʼerimutsuma kwehĩ? Kandi busana nandi wabĩrĩhamĩrya omulenge wawe nʼerisumba ameso wawe endata erilwa nʼoyũbũyĩrĩre wa Ĩsraelĩ kwehĩ?

²³ Omo bakwenda bawe wabiritsuma Omukama, kandi wabĩrĩbũga uti, Busana nʼobungi bwʼesyogalĩ syage nabirihetukira endata wʼebitwa, erĩhĩka omo ndĩna yʼeLebanonĩ; kandi monakonda emiti miri-miri yʼemĩerezĩ yako, nʼebĩlagũ ebyowene kandi monahĩka oko ndũlĩ yʼomũsĩtũ owakalĩre ndeke.

²⁴ Nabiritakula nʼerĩpũlya amagetsi wʼehandi, nʼomo bulyatiro bwʼebisando byage nabĩrĩũmya esyonyũsĩ syosĩ syʼeMĩsĩrĩ.

²⁵ Sũlĩtowa kwehĩ? Nakolakyo kera; monayĩsũnzakyo oko biro bya kera, na lino nabĩrĩberereryakyo, iwatoka eribindula emĩyĩ eyikongotere mo bĩma eribya bilundo byʼerihera.

²⁶ Neryo esyondũlanĩ syako mosyabya nʼamaka make, mobasweka nʼerihemulwa; babya ngʼebiti byʼomolĩ, ngʼebiti bibisi, ngʼobunyatsi obuli endata oko manyũmba, obukuma omo mwisi bute bwakula.

²⁷ Nĩkwa nyĩnasĩ erĩĩkala lyawe, nʼerihuluka lyawe nʼeriingira lyawe; nʼerihitikirana lyawe busana nage.

²⁸ Busana nʼerihitikirana lyawe busana nage, kandi busana nʼerĩyĩhamya lyawe lĩkahĩka omo matwĩ wage, busana nage. Busana nʼerihitikirana omo nĩndo yawe, nʼekyuma kyʼesabayĩrĩ kyʼeribindulayo omo mĩnywa yawe, nage nasyakũsũbya enyũma omo nzira eyo wasiramo.

²⁹ Nʼekĩ kyasyabya kiminyikalo ukʼuwe; oko mwaka oyũ wasyalya ebikayilasira, nʼoko mwaka wʼakabiri emĩlasĩrya; nʼoko mwaka wʼakasatu mubibe mugese, muhere amalima wʼebĩnyũ, mulye embuto yabyo.

³⁰ Nʼababala omo kĩtũnga kya Yũda basyaswahanda emĩrĩhĩ omwisi, nʼeributa ebĩgũma erĩlolyabyo endata.

³¹ Kusangwa erĩlũa omo Yerũsalema hasyahuluka abasaka, nʼerĩlũa oko kitwa kyʼeSĩonĩ ababala. Omũhwa wʼOmwami Mukulu asyakola ekĩ.

³² Neryo Omwami Mukulu akabũga busana nʼomwami wʼeAsũrĩa ati, Siendisyingira omo mũyĩ oyũ, kutse erilasa omusoha aho, kutse sĩendĩsyahĩka embere syago nʼengabo, kutse sĩendĩsyahanganĩa ekilundo kyʼekitaka kugo.

³³ Omo nzira eyo asiramo asyasuba omo nzira eyo, kandi sĩendĩsyahĩka oko mũyĩ oyũ, Omwami Mukulu akabũga.

³⁴ Kusangwa nasyimira omũyĩ oyũ erĩlamyago busana nage, na busana nʼomugombe wage Dawĩdĩ.

³⁵ Neryo oko kiro ekyo, omũlaĩka wʼOmwami Mukulu mwahuluka, mwĩtĩra omo kilaliriro kyʼAbaasũrĩa abandu elfu erĩgana nʼamakũmĩ munani nʼĩtanu (185,000); neryo omugulu abandu babuka omo tũtũtũ, lebaya, abosĩ ibabiribya bĩnda.

³⁶ Neryo Senakarĩbũ omwami wʼeAsũrĩa mwagenda, mwasubula, nʼerĩĩkala eNĩnawe.

³⁷ Neryo oko mugulu abya akaramya omo nyũmba ya Nĩsĩrokĩ nyamuhanga wuwe, Adramalekĩ na Sarezerĩ mobamwĩta omo mũyalĩ; neryo mobatibita omo kihugo kyʼeAraratĩ. Na Esaradonĩ mugala wuwe mwabya mwami omo mwanya wuwe.