2 Abami 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Hezekĩa akatabala oko Yũda

¹ Neryo oko mwaka wʼakasatu wa Hosea mugala wa Ela omwami wa Ĩsraelĩ, Hezekĩa mugala wa Ahazĩ omwami wa Yũda mwatsũka eribya mwami.

² Abya wʼemyaka makũmĩ abiri nʼeyĩtanu omugulu atsũka eribya mwami, neryo mwatabala emyaka makũmĩ abiri nʼomwenda eYerũsalema; nʼerĩna lya koyo wuwe lyabya Abĩ mwali wa Zakarĩa.

³ Naye mwakola ekyabya kibuya omo meso wʼOmwami Mukulu ngʼebyosĩ ebyo tata wuwe akola.

⁴ Mwalũsya ahendata, mwasambula esyondũyĩ, mwakenza esyosanamu sya Asera; mwatsũtsanga mo bitswe-bitswe enzoka eyo yʼomulinga eyakolawa na Musa; kusangwa oko biro ebyo, abana ba Ĩsraelĩ babya ĩbanemũhĩsya obukwa bo kuyo; naye mwahulayo mo Nehũsĩtanĩ.

⁵ Hezekĩa mwayiketera Omwami Mukulu Nyamuhanga wa Ĩsraelĩ; neryo enyũma kwiye sihabya oyuli nga ye omo katĩkatĩ kʼabami bosĩ ba Yũda, kutse omo katĩkatĩ kʼababya embere siwe.

⁶ Kusangwa mwamakirira oko Mwami Mukulu; mwataleka erimukwama, nĩkwa mwateya ebihano biwe, ebyo Mwami Mukulu ahana Musa.

⁷ NʼOmwami Mukulu mwabya haguma naye; ehosĩ aya mwabya nʼomũyĩsa; kandi mwahona oko mwami wʼeAsũrĩa, mwatamukolera.

⁸ Hezekĩa mwakĩnda Abafĩlĩstĩnĩ erĩhĩka eGaza nʼoko mitano yayo, erĩlũa oko nyũmba eyĩsũngũlĩkĩre yʼabateya nʼerĩhĩka oko mũyĩ owakongotere.

Asũrĩa akahũnga eSamarĩa

⁹ Neryo oko mwaka wʼakani wʼOmwami Hezekĩa, Omwaka oyo abya wʼakalinda wa Hosea mugala wa Ela omwami wa Ĩsraelĩ, Salmaneserĩ omwami wʼeAsũrĩa mwahetuka erilwa nʼeSamarĩa, neryo mwagoterago.

¹⁰ Neryo enyũma wʼemyaka ĩsatu mwanyegago; oko mwaka wʼomwenda wa Hezekĩa, owabya mwaka wʼomwenda wa Hosea omwami wa Ĩsraelĩ, eSamarĩa moyanyegwa.

¹¹ Nʼomwami wʼeAsũrĩa mwaheka Abaĩsraelĩ mo banyegwa eAsũrĩa, kandi mwahĩrabo eHala, nʼahakũhĩ nʼolũsĩ lwʼeHaborĩ, omo kihugo kyʼeGosanĩ, nʼomo mĩyĩ yʼAbamedĩ,

¹² kusangwa mobatakenga omulenge wʼOmwami Mukulu Nyamuhanga wabo, nĩkwa mobahalya oko ndagano yiwe, nʼebyosĩ ebyo Musa omugombe wʼOmwami Mukulu ahana, kandi mobatalĩga erĩowabyo, kutse erikolabyo.

Hezekĩa akaha omwami wʼeAsũrĩa ebĩtsĩpa nʼesyamagetsi

¹³ Neryo oko mwaka wʼerĩkũmĩ nʼeyĩnĩ wʼOmwami Hezekĩa, Senakarĩbũ omwami wʼeAsũrĩa mwayalwa nʼemĩyĩ yosĩ ya Yũda eyikongotere, neryo mwahũngayo.

¹⁴ Na Hezekĩa omwami wa Yũda mwatuma oko mwami wʼeAsũrĩa eLakĩsĩ, ati, Namakola nabi. Unyireke, Usubule; ebyosĩ ebyo wasyanyitswa nasyakolabyo. Nʼomwami wʼeAsũrĩa mwatswera Hezekĩa omwami wa Yũda esyotalanta syʼekĩtsĩpa magana asatu nʼesyotalanta syʼesyamagetsi makũmĩ asatu.

¹⁵ Neryo Hezekĩa mwamuha ebĩtsĩpa byosĩ ebyabanika omo nyũmba yʼOmwami Mukulu nʼomo syombĩso syʼenyũmba yʼOmwami.

¹⁶ Oko mugulu oyo, Hezekĩa mwatwa esyamagetsi esyabya oko syonyũyĩ syʼeHekalũ yʼOmwami Mukulu, nʼesyabya oko syondũyĩ esyo Hezekĩa omwami wa Yũda ahĩrako, neryo mwahasyo omwami wʼeAsũrĩa.

¹⁷ Neryo omwami wʼeAsũrĩa mwatuma Tartanĩ, na Rabsarĩ na Rabsake erĩlũa eLakĩsĩ oko mwami Hezekĩa eYerũsalema nʼemilondo minene. Neryo mobayahĩka eYerũsalema. Nʼomugulu bahĩkayo mobasa nʼerihangana hakũhĩ nʼomugende wʼekitsinga kyʼendata ekiri omo nzira nene yʼekibuga kyʼoyukaluka esyongimba.

¹⁸ Nʼomugulu babirikira oko mwami, Elĩakĩmũ mugala wa Hĩlkĩa mwahulukirabo, oyo wabya mwĩmanĩrĩ wʼenyũmba, nʼomũhandĩkĩ ye Sebũna, na Yoa mugala wa Asafũ omũhandĩkĩ wʼebiro.

¹⁹ Neryo Rabsake mwabwirabo ati, Mubwire Hezekĩa muti, Omwami munene, yo mwami wʼeAsũrĩa, akabũga ati, Eriyiketera lyawe eryo ukayiketera ni ryahi kwehĩ?

²⁰ Ũkabũga (nĩkwa nĩ bĩnywa buyira) uti, Ngwite erihana nʼamaka busana nʼamalwa. Nĩkwa lino ukayiketerandi, uti ukayisamambula kwĩngye kwehĩ?

²¹ Neryo lebaya, ukayiketera omũtso oyũ owʼoluseke lũbũnangĩkĩre, olo nĩ Mĩsĩrĩ; neryo omundu amayegemerya kulo, lwasyingira omo byala biwe nʼeritobolabyo. Farao omwami wʼeMĩsĩrĩ kwʼane atya oko bosĩ abakayiketeraye.

²² Nĩkwa mwamambwira muti, Tukayiketera Omwami Mukulu Nyamuhanga wetu, si yʼoyo Hezekĩa alũsaya ahendata nʼebiherero biwe kwehĩ? Kandi iniabiribwira Yũda nʼeYerũsalema ati, Mwasyaramya embere wʼekiherero ekĩ eYerũsalema?

²³ Neryo lino ngakubwira nyiti, uhe omukama wage omwami wʼeAsũrĩa yʼomuwato, nage ngandikuha esyosabayĩrĩ elfu ĩbĩrĩ, wamabya ukatoka erĩhĩra kusyo kwʼabakagenda kusyo.

²⁴ Neryo wangatoka uti erĩkĩnda omũsondolĩ muguma wʼabagombe bake-bake bʼomukama wage, nʼeriyiketera eMĩsĩrĩ busana nʼesyogalĩ nʼabakagenda oko syosabayĩrĩ kwehĩ?

²⁵ Na lino nabĩrĩhĩka erilwa na hano nʼerĩheryaho isingwite erĩsĩmwa lyʼOmwami Mukulu kwehĩ? Omwami Mukulu mwambwira ati, Uyalwe nʼekihugo ekĩ ũherayekyo.

²⁶ Neryo Elĩakĩmũ mugala wa Hĩlkĩa, na Sebũna, na Yoa mobabwira Rabsake bati, Ngakũbũlaya, nyiti, ũkanaye nʼabagombe bawe omo mũbũge wʼAbasũrĩa; kusangwa go tũkowa; kandi sũbũge netu omo mũbũge wʼAbayũda, omo matwĩ wʼabandu abĩkere oko lũhĩmbo.

²⁷ Nĩkwa omukulu wʼabasĩrĩkanĩ ye Rabsake mwabwirabo ati, Omwami wage abirinyituma oko mukama wawe, nʼukʼuwe, erĩbũga ebĩnywa ebĩ kwehĩ? Mwatanyituma oko bandu abĩkere oko lũhĩmbo, abakandisyasala balya amabĩ wabo, nʼerĩpũlya amasu wabo haguma nenyũ kwehĩ?

²⁸ Neryo Rabsake mwahangana, mwabirikira nʼomulenge munene omo mũbũge wʼAbayũda ati, Mowe ekĩnywa kyʼOmwami munene, omwami wʼeAsũrĩa.

²⁹ Omwami akabũga ati, Simuleke Hezekĩa eribateba; kusangwa siendisyatoka erĩbalamya omo byala byage.

³⁰ Kutse simuleke Hezekĩa eribabwira muyiketere Omwami Mukulu, ati, Omwami Mukulu asyatũlamya kwenene, kandi ati omũyĩ oyũ sĩendĩsyahĩrwa omo byala byʼOmwami wʼeAsũrĩa.

³¹ Simuhulikirire Hezekĩa; kusangwa omwami wʼeAsũrĩa akabũga ati, Mukole Obuholo haguma nage, muyirete kwĩngye; neryo mulye obuli mundu oko muti wuwe wʼomũtĩnĩ, mũpũlaye obuli mundu oko magetsi wʼekitehero kiwe;

³² erĩhĩka aho nasyasira nʼeribatwala oko kihugo ekiri ngʼekihugo kyenyũ, ekihugo kyʼengano nʼekyʼebĩnyũ bihya-bihya, ekihugo kyʼobundu nʼamalima wʼebĩnyũ, ekihugo kyʼemiti yʼemĩzeĩtũnĩ nʼekyʼobuki, imwatoka eribyaho, nʼeritendihola. Nĩkwa simuhulikirire Hezekĩa, omugulu akabatalaya, ati, Omwami Mukulu asyatũlamya.

³³ Hali nyamuhanga muguma wʼebihanda oyo Wabĩrĩlamya ekihugo kiwe omo byala byʼOmwami wʼeAsũrĩa kwehĩ?

³⁴ Esyonyamuhanga syʼeHamatĩ siri hayi, nʼesyʼeArpadĩ kwehĩ? Esyonyamuhanga syʼeSefarĩvaĩmũ, nʼesyʼeHena, nʼesyʼeĨva kwehĩ? Syabĩrĩlamya eSamarĩa omo byala byage kwehĩ?

³⁵ Esyonyamuhanga syosĩ syʼekihugo ni syahi esyabĩrĩlamya ekihugo kyasyo omo byala byage, muti Omwami Mukulu asyalamya eYerũsalema erĩlũa omo byala byage kwehĩ?

³⁶ Nĩkwa abandu mobabya bũkũtũ, mobatamũsũbĩrya nʼekĩnywa nʼekiguma; kusangwa erihana lyʼOmwami lyabũga liti, Sĩmũmũsũbĩraye.

³⁷ Neryo Elĩakĩmũ mugala wa Hĩlkĩa, oyo wabya mukulu wʼenyũmba, na Sebũna omũhandĩkĩ, na Yoa mugala wa Asafũ omũhandĩkĩ wʼebiro, mobahĩka uku Hezekĩa nʼesyongimba syʼemisangi, mobamubwira ebĩnywa bya Rabsake.