2 Abami 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Hosea na Ĩsraelĩ bakabohawa na Asũrĩa

¹ Omo mwaka wʼerĩkũmĩ nʼeyĩbĩrĩ wa Ahazĩ omwami wa Yũda, Hosea, mugala wa Ela mwatsũka eribya mwami oko Ĩsraelĩ eSamarĩa, neryo mwatabala emyaka mwenda.

² Neryo mwakola ekyabya kibi omo meso wʼOmwami Mukulu, nĩkwa butsira ngʼabami ba Ĩsraelĩ ababya embere siwe.

³ Neryo Salmaneserĩ omwami wʼeAsũrĩa mwayalwa naye; neryo Hosea mwabya mukobe wuwe, mwamuha engemu.

⁴ Neryo omwami wʼeAsũrĩa mwaminya Hosea kwʼabirimupona; kusangwa iniabirituma abakwenda uku So omwami wʼeMĩsĩrĩ, kandi isialitaleta engemu oko mwami wʼeAsũrĩa, ngoko abya akakola oko yindi myaka; kyaleka omwami wʼeAsũrĩa iniamuboha nʼerĩmũhĩra omo mũlĩkĩ.

⁵ Neryo omwami wʼeAsũrĩa mwalaba omo kihugo kyosĩ, nʼeriya eSamarĩa, mwagoterago emyaka ĩsatu.

⁶ Oko mwaka wʼomwenda wa Hosea, omwami wʼeAsũrĩa mwahũnga eSamarĩa, neryo mwatwala Abaĩsraelĩ mo basayĩ eAsũrĩa, kandi mwahĩrabo eHala, nʼeHaborĩ oko lũsĩ lwʼeGosanĩ, nʼomo mĩyĩ yʼAbamedĩ.

Ekyaleka ĩbahũngwa

⁷ Neryo mokyabya kitya kusangwa bana ba Ĩsraelĩ ĩbamabĩhalya oko Mwami Mukulu Nyamuhanga wabo, oyo walũsayabo omo kihugo kyʼeMĩsĩrĩ erĩlũa omo byala bya Farao omwami wʼeMĩsĩrĩ, kandi babya bakubaha esindi nyamuhanga,

⁸ ibamabilendera omo migambo yʼebihanda ebyo Mwami Mukulu ahiga embere syʼabana ba Ĩsraelĩ, nʼomo mibere yʼabami ba Ĩsraelĩ eyo bayiretera.

⁹ Kandi abana ba Ĩsraelĩ mobakola omwʼĩbĩsa emyatsi eyo eyitabya itunganene oko Mwami Mukulu Nyamuhanga wabo; kandi mobayĩhĩmbĩra ahendata omo mĩyĩ yabo yosĩ, erĩtsũka oko nyũmba eyĩsũngũlĩkĩre yʼabateya nʼerĩhĩka oko mũyĩ akongotere;

¹⁰ kandi mobayisingikira esyondũyĩ nʼesyosanamu sya Asera oko buli kitwa kiri, nʼomo ndĩna yʼobuli muti mubisi;

¹¹ nʼeyo mobahĩsĩrĩrya obukwa oko hendata hosĩ ngoko ebihanda byakola ebyo Mwami Mukulu ahiga embere syabo; kandi mobakola emyatsi mibi erĩhĩtanĩa Omwami Mukulu.

¹² Kandi mobakolera esyosanamu esyo Mwami Mukulu ahula ati, Simusyekola omwatsi oyo.

¹³ Nĩkwa Omwami Mukulu mwakunga Ĩsraelĩ na Yũda, omo buno bwʼobuli mũmĩnyererĩ, nʼobuli mũlangĩrĩ ati, Mubinduke oko syonzira syenyũ nyibi, mũtegaye ebihano byage nʼemigambo yage, ngʼemigambo yosĩ eyo nahana abotata wenyũ nʼebyo nabatumirako omo buno bwʼabamĩnyererĩ, abagombe bage.

¹⁴ Nĩkwa, mobagana erĩowa, mobakalya ebĩkya byabo, ngʼebĩkya byʼabotata wabo, abatĩkĩrĩraya Omwami Mukulu Nyamuhanga wabo.

¹⁵ Mobagana emigambo yiwe, nʼendagano yiwe eyo alagana nʼabotata wabo, nʼerikunga liwe eryo akungabo; mobakwama ebitya-bitya, mobabya batya-batya, mobakwama ebihanda ebyabya bĩtĩmbĩre kubo, abo Mwami Mukulu alayirabo ati, Sibakole ngabo.

¹⁶ Mobaleka ebihano byosĩ byʼOmwami Mukulu Nyamuhanga wabo, mobayĩkokoterya esyosanamu syʼerĩnũnĩa, bye byana byʼesyonde bibiri, kandi mobakola esanamu ya Asera, kandi mobaramya omulondo gosĩ wʼelubula, kandi mobakolera Baalĩ.

¹⁷ Kandi mobalabya abagala babo nʼabali babo bʼomo muliro, kandi mobalagula mobakola nʼebyʼobũloyĩ, kandi mobayĩgũlya erikola ebyabya bibi omo meso wʼOmwami Mukulu erĩmũhĩtanĩa.

¹⁸ Neryo busana nʼebĩ, Omwami Mukulu mwahitana uku Ĩsraelĩ, mwalũsyabo omo meso wuwe; neryo mohatabya nʼomuguma oyo wasĩgala, kye nʼekihanda kya Yũda ĩkyokyene.

¹⁹ Yũda nibya mwatateya ebihano byʼOmwami Mukulu Nyamuhanga wabo, nĩkwa mobalendera omo mibere ya Ĩsraelĩ eyo bayĩkokoteraya.

²⁰ Neryo Omwami Mukulu mwagana bana bosĩ ba Ĩsraelĩ, kandi mwagalyabo, mwahabo omo byala byʼabanyeyĩ, erĩhĩka aho ahigirabo erĩlũa omo meso wuwe.

²¹ Omugulu agaba Ĩsraelĩ erĩlũa oko kĩtũnga kya Dawĩdĩ; nabo mobahĩra Yeroboamũ mugala wa Nebatĩ eribya mwami; na Yeroboamũ mwalũsya Ĩsraelĩ oko Mwami Mukulu, mwakolesyabo erĩlolo lĩnene.

²² Neryo abana ba Ĩsraelĩ mobalendera omo bibi bya Yeroboamũ ebyo akola; mobatalekabyo;

²³ erĩhĩka aho Mwami Mukulu ahigira Ĩsraelĩ erĩlũa omo meso wuwe, ngoko abũga nʼabagombe buwe abamĩnyererĩ bosĩ. Neryo Ĩsraelĩ mobahekwa erĩlũa omo kihugo kyabo eritwalwa mo basayĩ eAsũrĩa erĩhĩka na mũnabwĩre.

Omwami wʼeAsũrĩa akaleta abʼehandi nʼerĩhĩrabo eSamarĩa nʼomo yindi mĩyĩ

²⁴ Nʼomwami wʼeAsũrĩa mwaleta abandu erĩlũa eBabelĩ, nʼeKũta, nʼeAva, nʼerĩlũa eHamatĩ, nʼeSefaraĩmũ, mwahĩrabo omo mĩyĩ yʼeSamarĩa omo mwanya wʼabana ba Ĩsraelĩ; nabo mobĩmya eSamarĩa, kandi mobĩkala omo mĩyĩ yako.

²⁵ Neryo mokyabya kitya, okwʼĩtsũka lyʼerĩĩkala lyabo eyo, mobatakenga Omwami Mukulu; kyaleka Omwami Mukulu iniatuma esyondale omo katĩkatĩ kabo, nasyo mosyĩta abandi ba kubo.

²⁶ Busana nʼekyo, mobabwira omwami wʼeAsũrĩa bati, Ebihanda ebyo wabiritwala nʼerĩhĩrabyo omo mĩyĩ yʼeSamarĩa, sibetaminya omugambo wa nyamuhanga wʼekihugo ekyo; kikaleka iniatuma esyondale omo katĩkatĩ kabo, neryo, lebaya, sĩkĩtabo, kusangwa sĩbasĩ emibere ya nyamuhanga wʼekihugo.

²⁷ Neryo omwami wʼeAsũrĩa mwahana ati, Mutwale eyo yʼomũhererĩ muguma oyo mwalũsaya eyo; neryo agende nʼerĩĩkalayo nʼerĩkangĩrĩryabo emibere ya nyamuhanga wʼekihugo.

²⁸ Neryo omuguma wʼabamĩnyererĩ oyo walũsĩbawa eSamarĩa mwasa mwĩkala eBetelĩ, mwakangĩrĩryabo ngoko bangubaha Omwami Mukulu.

²⁹ Nĩkwa obuli kihanda mokyayĩkokoterya esyonyamuhanga syakyo, mobahĩrasyo omo manyũmba awʼahendata aho Abasamarĩa bayira, obuli kihanda omo mĩyĩ aho babya bĩkere.

³⁰ Nʼabandu bʼeBabelĩ mobahĩra Sũkotĩbenotĩ, nʼabandu bʼeKũtĩ mobakola Nerĩgalĩ, nʼabandu bʼeHamatĩ mobahĩmba Asĩma,

³¹ nʼAbanya Avĩte mobahĩmba Nĩbũhazĩ na Tartakĩ; nʼAbasefarĩvĩ mobahĩsya abana babo uku Adramalekĩ na Anamelekĩ, esyonyamuhanga sya Sefarĩvaĩmũ.

³² Neryo mobubaha Omwami Mukulu nibya, mobayĩhĩrĩra omo katĩkatĩ kabo abahererĩ bʼahendata, abahongerabo amahere omo manyũmba wʼahendata.

³³ Mobubaha Omwami Mukulu nʼerikolera esyonyamuhanga syabo ngʼomũsĩndo wʼebihanda byʼeyo balũsĩbawa.

³⁴ Erĩhĩka mũnabwĩre bakinakola ngʼemibere yʼerĩmbere; sibetubaha Omwami Mukulu, kutse sibekola ngʼemigambo kutse ngʼebilayiro byabo, kutse ngʼemigambo kutse ngʼebihano ebyo Mwami Mukulu ahana bana ba Yakobo, oyo aluka erĩna lya Ĩsraelĩ;

³⁵ abo Mwami Mukulu alagana nabo, nʼerihanabo ati, Simusyubaha esindi nyamuhanga kutse erĩyũnama embere syasyo, kutse erikolerasyo, kutse erihongerasyo amahere.

³⁶ Nĩkwa yo nʼOmwami Mukulu, oyo wabalũsaya omo kihugo kyʼeMĩsĩrĩ omo bũtokĩ bunene nʼomo kuboko okũyĩsũmbĩre, ni ye yo mwasyubaha, oyo yo mwasyũnamira embere siwe, yo mwasyahongera amahere.

³⁷ Nʼemigambo, nʼebilayiro, nʼemigambo, nʼebihano ebyo abasakira, mwasyateya erikolabyo kera na kera; isimwasyubaha esindi nyamuhanga.

³⁸ Nʼendagano eyo nalagana nenyũ simusyibirirawayo; kutse simusyubaha esindi nyamuhanga.

³⁹ Nĩkwa mwasyubaha Omwami Mukulu, Nyamuhanga wenyũ, naye asyabalamya omo byala byʼesyonzĩgũ syenyũ syosĩ.

⁴⁰ Nĩkwa, mobatowa, nĩkwa mobakola ngʼemibere yabo yʼerĩmbere.

⁴¹ Neryo ebihanda ebĩ mobyubaha Omwami Mukulu, kandi mobakolera esyosanamu syabo esyabatsawa; nʼabana babo batya, nʼabitsikulu babo batya, ngoko abotata wabo bakola, ko bakakola batya na mũnabwĩre.