2 Abami 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lya Ahazĩ oko Yũda

¹ Oko mwaka wʼerĩkũmĩ nʼeyirinda wa Peka mugala wa Remalĩa, Ahazĩ mugala wa Yotamũ omwami wa Yũda mwatsũka eribya mwami.

² Ahazĩ abya wʼemyaka makũmĩ abiri omugulu atsũka eribya mwami, mwatabala emyaka erĩkũmĩ nʼendatu eYerũsalema; nĩkwa mwatakola ekibuya omo meso wʼOmwami Mukulu Nyamuhanga wuwe, nga tata wuwe Dawĩdĩ.

³ Nĩkwa mwalendera omo mibere yʼabami ba Ĩsraelĩ, nibya mwalabya mugala wuwe omo muliro, ngʼesyonye syʼebihanda ebyo Mwami Mukulu ahiga embere syʼabana ba Ĩsraelĩ.

⁴ Kandi mwahonga obuhere nʼerĩhĩsĩrya obukwa oko hendata, nʼoko bitwa, nʼoko ndĩna yʼobuli muti mubisi.

Rezĩnĩ na Peka bakagotera Ahazĩ

⁵ Neryo Rezĩnĩ omwami wʼeSũrĩa na Peka mugala wa Remalĩa omwami wa Ĩsraelĩ mobahetukira eYerũsalema eriyalwa; mobagotera Ahazĩ, nĩkwa mobatatoka erĩmũkĩnda.

⁶ Oko mugulu oyo, Rezĩnĩ omwami wʼeAsũrĩa mwasũbũlya eElatĩ oko Sũrĩa, mobahiga Abayũda erĩlũa eElatĩ; neryo Abanya Sũrĩa mobahĩka eElatĩ, mobĩkalayo erĩhĩka mũnabwĩre.

Ahazĩ akasakana nʼAbaasũrĩa

⁷ Neryo Ahazĩ mwatuma abakwenda uku Tĩglatĩ-pĩleserĩ omwami wʼeAsũrĩa, ati, Ĩngye indi mugombe wawe nʼomugala wawe; Uhetuke ũnyĩlamaye omo byala byʼOmwami wʼeAsũrĩa nʼomo byala byʼOmwami wa Ĩsraelĩ, abakalwa nage.

⁸ Neryo Ahazĩ mwĩmya ebĩtsĩpa nʼesyamagetsi ebyabanika omo nyũmba yʼOmwami Mukulu, nʼomo syombĩso syʼenyũmba yʼOmwami, mwatumabyo mo luhembo oko mwami wʼeAsũrĩa.

⁹ Nʼomwami wʼeAsũrĩa mwamowa; kandi omwami wʼeAsũrĩa mwahetukira eDamasekĩ, mwahũngago, mwaheka bandu bako mo banyegwa erĩhĩka eKĩri, neryo mwĩta Rezĩnĩ.

¹⁰ Nʼomwami Ahazĩ mwaya eDamasekĩ erĩyahĩndana na Tĩglatĩ-pĩleserĩ omwami wʼeAsũrĩa, mwalangira ekiherero ekyabya eDamasekĩ; nʼomwami Ahazĩ mwatuma oko mũhererĩ Ũrĩya kʼolulengo lwʼomuhanda wʼekiherero, nʼolulengo lwakyo, ngʼomũbĩrĩ gosĩ wakyo kwʼabya.

¹¹ Nʼomũhererĩ Ũrĩya mwahĩmba ekiherero ngʼebyosĩ ebyo mwami Ahazĩ alebeka erĩlũa eDamasekĩ, neryo omũhererĩ Ũrĩya mwahĩmbakyo eririnda erĩhĩka lyʼOmwami Ahazĩ erĩlũa eDamasekĩ.

¹² Neryo omwami abere abĩlũa eDamasekĩ, omwami mwalangira ekiherero; nʼomwami mwasegera hakũhĩ nʼekiherero nʼerihonga obuhere kukyo.

¹³ Neryo mwahĩsĩrĩrya obuhere bwʼerĩokererya buwe nʼobuhere buwe bwʼeyĩsyano, kandi mũtũlĩrako obuhere buwe bwʼerĩpũlya, neryo mwatsatsanga omusasi wʼamahere wuwe wʼobuholo oko kiherero.

¹⁴ Nʼekiherero kyʼomulinga, ekyabya embere syʼOmwami Mukulu mwahũmyakyo erĩlũa embere wʼenyũmba, erilũaomo katĩkatĩ kʼekiherero kiwe nʼenyũmba yʼOmwami Mukulu, mwahĩrakyo elutambi lwʼendata lwʼekiherero kiwe.

¹⁵ Nʼomwami Ahazĩ mwahana omũhererĩ Ũrĩya ati, Oko kiherero kinene ũhĩsaye obuhere bwʼerĩokererya bʼomo ngyakya, nʼobuhere bwʼeyĩsyano bwʼerĩgolo-golo, nʼobuhere bwʼerĩokererya bʼomwami, nʼobuhere bwʼeyĩsyano buwe, haguma nʼobuhere bwʼerĩokererya obwʼabandu bosĩ bʼekihugo, nʼobuhere bwabo bwʼeyĩsyano, nʼamahere wabo wʼerĩpũlya; utsatsange kuho kʼomusasi gosĩ wʼobuhere bwʼerĩokererya, nʼomusasi gosĩ gʼobuhere. Nĩkwa ekiherero kyʼomulinga kyasyabya busana nage ahʼerĩbũlĩrya.

¹⁶ Neryo omũhererĩ Ũrĩya mwakola atya ngʼebyosĩ ebyo mwami Ahazĩ ahana.

Ahazĩ akahĩmbũla ahʼerinabira nʼengetsi nʼesyonde syʼemiringa

¹⁷ Neryo Ahazĩ mwatwa ebisayi byʼesyondĩna, mwalũsya ahʼerinabira ho kubyo, neryo mwakĩmya engetsi eyo erĩlũa oko syonde syʼomulinga esyabya eyĩkwa kusyo, mwahĩrayo oko kibuga kyʼamabwe.

¹⁸ Nʼenzira eyabya ĩswĩkĩre busana nʼeSabato eyo bahĩmba omo nyũmba, nʼahʼeriingira hʼOmwami eyĩhya, mwalũsyayo omo nyũmba yʼOmwami Mukulu, busana nʼomwami wʼeAsũrĩa.

¹⁹ Neryo eyindi mĩbĩrĩ ya Ahazĩ eyo akola, sĩyĩsakĩre omo kitabu kyʼemyatsi yʼemigulu yʼabami ba Yũda kwehĩ?

²⁰ Neryo Ahazĩ mweya abotata-kulu buwe, mwatabwa ahali abĩse wuwe omo mũyĩ wa Dawĩdĩ; na Hezekĩa mugala wuwe mwatabala omo mwanya wuwe.