2 Abami 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lya Azarĩa nʼoluholo luwe

¹ Oko mwaka wʼamakũmĩ abiri nʼeyirinda wa Yeroboamũ omwami wa Ĩsraelĩ, Azarĩa mugala wa Amazĩa omwami wa Yũda mwatsũka eribya mwami.

² Azaria abya wʼemyaka erĩkũmĩ nʼendatu omugulu atsũka eritabala; neryo mwatabala emyaka makũmĩ atanu nʼeyĩbĩrĩ eYerũsalema nʼerĩna lya koyo wuwe lyabya Yekolĩa wʼeYerũsalema.

³ Naye mwakola ekyabya kibuya omo meso wʼOmwami Mukulu ngʼebyosĩ ebyo tata wuwe Amazĩa akola.

⁴ Nĩkwa ahendata mohatalũsĩbwaho; abandu ibakinahonga nʼerĩhĩsya obukwa bʼoko hendata.

⁵ Neryo Omwami Mukulu mwaswĩrya omwami, kyaleka iniabya muhaga erĩhĩka oko kiro kyʼoluholo luwe. Neryo mwĩkala omo nyũmba eyabya aho wayo, omugulu Yotamũ mugala wʼOmwami abya mukulu wʼenyũmba, iniakatswera bandu bʼekihugo.

⁶ Nʼeyindi mĩbĩrĩ ya Azarĩa, nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami ba Yũda?

⁷ Neryo Azaria mweya abotata-kulu buwe; neryo mobamuta ahali abotata-kulu buwe omo mũyĩ wa Dawĩdĩ; na Yotamũ mugala wuwe mwabya mwami omo mwanya wuwe.

Zakarĩa akatabala oko Ĩsraelĩ

⁸ Oko mwaka wʼamakũmĩ asatu nʼomunani wa Azarĩa omwami wa Yũda, Zakarĩa mugala wa Yeroboamũ mwabya mwami oko Ĩsraelĩ mikera ndatu eSamarĩa.

⁹ Naye mwakola ekyabya kibi omo meso wʼOmwami Mukulu, ngoko abotata wuwe bakola; mwataleka ebibi bya Yeroboamũ mugala wa Nebatĩ ebyo akosesayamo Ĩsraelĩ.

¹⁰ Na Salumu mugala wa Yabesĩ mwamuhotera, neryo mwamũswĩrĩrya embere syʼabandu, mwamwĩta, neryo mwatabala omo mwanya wuwe.

¹¹ Nʼeyindi mĩbĩrĩ ya Zakarĩa, lebaya, ĩsakĩre omo kitabu kyʼemyatsi yʼemigulu yʼabami ba Ĩsraelĩ.

¹² Ekĩ kye kĩnywa Omwami Mukulu abwira Yehũ, ati, Abagala bawe basyĩkala oko kĩtũmbĩ kyʼobwami kya Ĩsraelĩ erĩhĩka oko lulengo lwʼakani, nʼekyo mokyabererera kitya.

Eritabala lya Salumu

¹³ Salumu mugala wa Yabesĩ mwabya mwami omo mwaka wʼamakũmĩ asatu nʼomwenda wa Ũzĩa omwami wa Yũda; neryo mwatabala oko mugulu wʼomukera muguma e: Samarĩa.

¹⁴ Na Menahemũ mugala wa Gadĩ mwahetuka akalũa eTĩrza, neryo mwahĩka eSamarĩa, neryo mwaswĩrya Salumu mugala wa Yabesĩ eSamarĩa, mwamwĩta, neryo mwabya mwami omo mwanya wuwe.

¹⁵ Neryo eyindi mĩbĩrĩ ya Salumu, nʼoluhota luwe olo ayira, lebaya bĩsakĩre omo kitabu kyʼemyatsi yʼemigulu yʼabami ba Ĩsraelĩ.

¹⁶ Neryo Menahemũ mwaswĩrya eTĩfũsa, nʼabosĩ ababyamo, nʼemitano yago, erĩtsũka eTĩrza; kusangwa mobatamukingulira, kyaleka ĩnĩaswĩryago; kandi mwasatya bakalĩ bakule bosĩ ababya mugo.

Eritabala lya Menahemũ

¹⁷ Nʼoko mwaka wʼamakũmĩ asatu nʼomwenda wa Azaria omwami wa Yũda, Menahemũ mugala wa Gadĩ mwatsũka eribya mwami oko Ĩsraelĩ, mwatabala emyaka ĩkũmĩ eSamarĩa.

¹⁸ Neryo mwakola ekibi omo meso wʼOmwami Mukulu. Oko biro biwe byosĩ mwataleka ebibi bya Yeroboamũ mugala wa Nebatĩ, ebyo akosesayamo Ĩsraelĩ.

¹⁹ Neryo Pũlĩ omwami wʼeAsũrĩa mwasa nʼerilwa nʼekihugo ekyo; na Menahemũ mwaha Pũlĩ yʼesyotalanta syʼekĩtsĩpa elfu nguma (1,000), amũwatĩkaye erĩsĩkya obwami omo byala biwe.

²⁰ Neryo Menahemũ mwakwesa esyofranka oko Ĩsraelĩ, oko bakulu bosĩ abʼebindu, obuli mundu esyosekelĩ makũmĩ atanu syʼekĩtsĩpa, ahesyo oko mwami wʼeAsũrĩa. Neryo omwami wʼeAsũrĩa mwasubula mwatĩkala omo kihugo.

²¹ Neryo eyindi mĩbĩrĩ ya Menahemũ, nʼebyosĩ akola, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

²² Menahemũ mweya abotata-kulu buwe; na Pekahĩa mugala wuwe mwabya mwami omo mwanya wuwe.

Pekahĩa akatabala oko Ĩsraelĩ

²³ Omo mwaka wʼamakũmĩ atanu wa Azarĩa omwami wa Yũda, Pekahĩa mugala wa Menahemũ mwatsũka eribya mwami oko Ĩsraelĩ eSamarĩa, mwatabala emyaka ĩbĩrĩ.

²⁴ Neryo mwakola ekibi omo meso wʼOmwami Mukulu; mwataleka ebibi bya Yeroboamũ mugala wa Nebatĩ, ebyo akosesayamo Ĩsraelĩ.

²⁵ Na Peka mugala wa Remalĩa, omukulu wuwe wʼemilondo mwaya embĩta erimuhotera, mwamwĩtĩra eSamarĩa, omo kikali kyʼenyũmba yʼOmwami, haguma na Argobĩ na Arĩe; nʼabandu bʼeGĩleadĩ makũmĩ atanu ababya haguma naye; neryo mwamwĩta, mwabya mwami omo mwanya wuwe.

²⁶ Neryo eyindi mĩbĩrĩ ya Pekahĩa, nʼebyosĩ akola, lebaya, bĩsakĩre omo kitabu kyʼemyatsi yʼemigulu yʼabami ba Ĩsraelĩ.

Eritabala lya Peka

²⁷ Omo mwaka wʼamakũmĩ atanu nʼeyĩbĩrĩ wa Azaria omwami wa Yũda, Peka mugala wa Remalĩa mwatsũka eribya mwami oko Ĩsraelĩ eSamarĩa, mwatabala emyaka makũmĩ abiri.

²⁸ Neryo mwakola ekibi omo meso wʼOmwami Mukulu; mwataleka ebibi bya Yeroboamũ mugala wa Nebatĩ ebyo akosesayamo Ĩsraelĩ.

Omwami wʼeAsũrĩa akahũnga emĩyĩ ya Ĩsraelĩ

²⁹ Omo biro bya Peka omwami wa Ĩsraelĩ, Tĩglatĩ-pĩleserĩ omwami wʼeAsũrĩa mwasa, mwahũnga eĨyonĩ, nʼeAbelĩbetĩ-maka, nʼeYonoa, nʼeKedesĩ, nʼeHazorĩ, nʼeGĩleadĩ, nʼeGalĩlaya, ekihugo kyosĩ kya Nafũtalĩ, mwatwalabo mo banyegwa eAsũrĩa.

³⁰ Na Hosea mugala wa Ela mwayisamambula uku Peka mugala wa Remalĩa, mwamũswĩrya mwamwĩta, mwabya mwami omo mwanya wuwe, oko mwaka wʼamakũmĩ abiri wa Yotamũ mugala wa Ũzĩa.

³¹ Nĩkwa eyindi mĩbĩrĩ ya Peka, nʼebyosĩ akola, lebaya, bĩsakĩre omo kitabu kyʼemyatsi yʼemigulu yʼabami ba Ĩsraelĩ.

Eritabala lya Yotamũ oko Yũda

³² Omo mwaka wʼakabiri wa Peka mugala wa Remalĩa omwami wa Ĩsraelĩ, Yotamũ mugala wa Ũzĩa omwami wa Yũda mwatsũka eribya mwami.

³³ Abya wʼemyaka makũmĩ abiri nʼeyĩtanu omugulu atsũka eribya mwami; neryo mwatabala emyaka erĩkũmĩ nʼendatu eYerũsalema; nʼerĩna lya koyo wuwe lyabya Yerũsa mwali wa Zadokĩ.

³⁴ Naye mwakola ebibuya omo meso wʼOmwami Mukulu; mwakola ngʼebyosĩ tata wuwe Ũzĩa akola.

³⁵ Nĩkwa ahendata mohatalũsĩbwaho; abandu ibakinahonga nʼerĩhĩsya obukwa oko hendata. Yotamũ mwahĩmba olũkyo lwʼendata lwʼenyũmba yʼOmwami Mukulu.

³⁶ Neryo eyindi mĩbĩrĩ ya Yotamũ, nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami ba Yũda kwehĩ?

³⁷ Omo biro ebyo, Omwami Mukulu mwatsũka erituma Rezĩnĩ omwami wʼeSũrĩa, na Peka mugala wa Remalĩa erilwa na Yũda.

³⁸ Neryo Yotamũ mweya abotata-kulu buwe, mwatabwa ahali abotata wuwe omo mũyĩ wa tata wuwe Dawĩdĩ; na Ahazĩ mugala wuwe mwabya mwami omo mwanya wuwe.