2 Abami 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lya Yoasĩ

¹ Oko mwaka wʼakalinda wa Yehũ, Yoasĩ mwatsũka eribya mwami, neryo mwatabala emyaka makũmĩ ani eYerũsalema; nʼerĩna lya koyo wuwe lyabya Sĩbĩa wʼeBerĩ-seba.

² Na Yoasĩ mwakola ekyabya kibuya omo meso wʼOmwami Mukulu ebiro byosĩ biwe ebyo Yehoyada amũkangĩrĩraya.

³ Nĩkwa ahendata mohatalũsĩbwaho; abandu mobahonga nʼerĩhĩsya obukwa oko hendata.

⁴ Na Yoasĩ mwabwira abahererĩ ati, Esyofranka syosĩ syʼebindu bĩbũyĩrĩre esikaletawa omo nyũmba yʼOmwami Mukulu, esyofranka esikakola, esyofranka syʼabandu abahĩkĩre olulengo, nʼesyofranka syosĩ esyo mundu akaleta busana nʼerisonda lyʼomutima wuwe eriretasyo omo nyũmba yʼOmwami Mukulu,

⁵ abahererĩ bĩmayesyo, obuli mundu oko yo asĩ; neryo basyasũbya ahasambukere hʼenyũmba, ahakabanika ihanasambukere.

⁶ Nĩkwa oko mwaka wʼamakũmĩ abiri nʼeyĩsatu wʼOmwami Yoasĩ, abahererĩ ĩsĩbetasũbya ahasambukere hʼenyũmba.

⁷ Neryo omwami Yoasĩ mwabirikira omũhererĩ Yehoyada, nʼabandi bahererĩ, mwabũlyabo ati, Busana nakĩ sĩmwesũbaya ahasambukere hʼenyũmba kwehĩ? Neryo lino sĩmwĩmaye esindi franka oko abo mwasĩ, nĩkwa mulihesyo busana nʼahasambukere hʼenyũmba.

⁸ Neryo abahererĩ mobalĩga bati sĩbendĩswĩmya esyofranka oko bandu kutse erĩsũbya ahasambukere hʼenyũmba.

Yoasĩ akasũbaya eHekalũ

⁹ Nĩkwa Yehoyada omũmĩnyererĩ mwĩmya erĩsandũko, mwatobola ekyũna omo kĩkũnĩngo kyalyo, mwahĩralyo hakũhĩ nʼekiherero oko luhande lwʼamali ahʼeriingirira hʼomo nyũmba yʼOmwami Mukulu. Neryo abahererĩ abategaya obũsekũ mobahĩramo esyofranka syosĩ esyaletawa omo nyũmba yʼOmwami Mukulu.

¹⁰ Neryo, omugulu balangira ko hamabibya franka nyingi omwʼĩsandũko, omũsakĩ wʼOmwami nʼomũhererĩ mukulu mobahetuka mobahĩrabyo omo syongunza, nʼeriganza esyofranka esyabanika omo nyũmba yʼOmwami Mukulu.

¹¹ Neryo mobaha esyofranka esyo esyalengawa omo byala byʼabakola omũbĩrĩ, abasondolĩ bʼenyũmba yʼOmwami Mukulu nabo mobaliha ababatsĩ nʼabahĩmbĩ, abakola omũbĩrĩ oko nyũmba yʼOmwami Mukulu,

¹² nʼoko bahĩmbĩ bʼamabwe nʼababatsĩ bʼamabwe, na busana nʼerigula ebisayi nʼamabwe awabatsĩre erĩsũbya ahasambukere hʼenyũmba yʼOmwami Mukulu, na busana nʼebyosĩ bayĩsũnza erĩsũbya enyũmba eyo.

¹³ Nĩkwa mohatakokotĩbwa busana nʼenyũmba yʼOmwami Mukulu esyondehĩ syʼebĩtsĩpa, nʼesyoluhugo, nʼebibindi, nʼesyongubi, kutse ebindu byʼesyamagetsi, kutse ebindu byʼebĩtsĩpa, oko syofranka esyaletawa omo nyũmba yʼOmwami Mukulu;

¹⁴ kusangwa mobahayo oko bakolĩ bʼomũbĩrĩ, nabo mobasũbya musyo mwʼenyũmba yʼOmwami Mukulu.

¹⁵ Kandi mobataganzira abandu abo baha esyofranka erihasyo abakola omũbĩrĩ; kusangwa mobakola nʼeritindalegula.

¹⁶ Esyofranka busana nʼamahere wʼerĩhalya, nʼesyofranka busana nʼamahere wʼebibi, mositaletwa omo nyũmba yʼOmwami Mukulu; syabya syʼabahererĩ.

¹⁷ Neryo Hazaelĩ omwami wʼeSũrĩa mwahetuka eriyalwa nʼeGatĩ, mwanyegago; kandi Hazaelĩ mwalolya obũsũ buwe erihetukira eYerũsalema.

¹⁸ Na Yoasĩ omwami wʼeYũda mwĩmya ebindu byosĩ bĩbũyĩrĩre ebyo Yehosafatĩ na Yoramũ na Ahazĩa, abotata wuwe, abami bʼeYũda ebyo bahigula, nʼebindu biwe bĩbũyĩrĩre, nʼesyamagetsi syosĩ esyabanika omo mbĩso syʼenyũmba yʼOmwami Mukulu, nʼebyʼomo nyũmba yʼOmwami, mwatumabyo uku Hazaelĩ omwami wʼeSũrĩa. Neryo Hazaelĩ mwaleka eYerũsalema.

¹⁹ Nʼeyindi mĩbĩrĩ ya Yoasĩ, nʼebyosĩ akola, sĩbĩsakĩre omo kitabu kyʼemyatsi yʼemigulu yʼabami ba Yũda kwehĩ?

²⁰ Nʼabagombe buwe mobahangana, mobaya embĩta, mobĩtĩra Yoasĩ yʼomo nyũmba eMĩlo, omugulu andagalira eSĩla.

²¹ Kusangwa Yozakarĩ mugala wa Sĩmatĩ, na Yehozabadĩ mugala wa Somerĩ, abagombe buwe mobamwĩta, naye mwahola; neryo mobamuta haguma nʼabotata-kulu buwe omo mũyĩ wa Dawĩdĩ; na Amazĩa mugala wuwe mwabya mwami omo mwanya wuwe.