2 Abami 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Atalia, nya-Ahazĩa akatabala eYũda

¹ Neryo Atalia nya-Ahazĩa abere abilangira ngoko mugala wuwe amabihola, mwahangana mwaherya abana bosĩ bʼobwami.

² Nĩkwa Yehoseba, mwali wʼOmwami Yoramũ, mwali wabo Ahazĩa, mwĩmya Yoasĩ mugala wa Ahazĩa, mwamwĩba omo katĩkatĩ kʼabagala bʼomwami abĩtawa, iye, nʼomũlemberĩ wuwe, mwahĩrabo omo kyumba kyʼerigotseramo; mobamũbĩsa uku Atalia, kyaleka ĩnĩatakwa.

³ Neryo mwabya haguma naye ĩnĩabĩsĩrwe emyaka ndatu omo nyũmba yʼOmwami Mukulu, omugulu Atalia atabala oko kihugo.

Abateya ba Yoasĩ

⁴ Nʼoko mwaka wʼakalinda Yehoyada mwatumira oko bakulu bʼamagana bʼAbakarĩtĩ nʼoko bateya, eriendabo, neryo mwaletabo kwiye omo nyũmba yʼOmwami Mukulu. Kandi mwayira ndagano nabo, kandi mwalahĩrĩryabo omo nyũmba yʼOmwami Mukulu, mwakangyabo omugala wʼOmwami.

⁵ Neryo mwahanabo ati, Omwatsi mwasyakola goyũ; ekihande kiguma kyʼomo bisatu kyenyũ mwasyasa omo Sabato, mwasyabya bateya bʼobũteya bwʼenyũmba yʼOmwami;

⁶ nʼekihande kiguma kyʼomo bisatu kyasyabya oko lũkyo lwʼeSũrĩ; nʼekihande kiguma kyʼomo bisatu kyasyabya oko lũkyo enyũma wʼabateya, ko mwasyateya mutya obũteya bwʼenyũmba, eribya mũkangĩ.

⁷ Nʼemilondo ĩbĩrĩ yʼũkwʼĩnywe, abosĩ abakahuluka omo Sabato, mwasyateya obũteya bwʼenyũmba yʼOmwami Mukulu busana nʼomwami.

⁸ Neryo mwasyatĩmba oko mwami oko mbande syosĩ, obuli mundu inianawite omo byala biwe ebindu byʼamalwa; nʼoyũkahĩka hakũhĩ nenyũ ĩtawe; nenyũ mubye haguma nʼomwami omugulu akahuluka, nʼomugulu akingira.

Yoasĩ akayirawa mo mwami

⁹ Nʼabakulu bʼamagana mobakola ebyosĩ ngoko mũhererĩ Yehoyada ahanabo. Neryo obuli mundu mwatwala abandu buwe, abakingira omo Sabato, bakalũa omo Sabato, mobahĩka uku Yehoyada omũhererĩ.

¹⁰ Nʼomũhererĩ mwaha abakulu bʼamagana amatũmo nʼesyongabo esyabya syʼOmwami Dawĩdĩ, esyabya omo nyũmba yʼOmwami Mukulu.

¹¹ Nʼabateya mobahangana obuli mundu nʼebindu biwe byʼamalwa omo byala biwe erĩtsũka oko luhande lwʼamali lwʼenyũmba nʼerĩhĩka oko luhande lwʼamalembe lwʼenyũmba, hakũhĩ nʼekiherero nʼenyũmba, ĩbakatĩmba oko mwami.

¹² Neryo mwahũlũkya omugala wʼOmwami, kandi mwamũhĩra kwʼembĩta, kandi mwamuha erĩtũlago lyʼemigambo, mobamuyira mo mwami, nʼerĩmũhakabya amagũta; neryo mobakangatira ebyala, bati, Omwami akote!

Atalia akakwa

¹³ Neryo omugulu Atalia owa omulenge wʼabateya nʼowʼabandu, mwahĩka ahali abandu omo nyũmba yʼOmwami Mukulu.

¹⁴ Neryo mwasamalira, neryo, omwami inianahangene hakũhĩ nʼendũyĩ, ngʼemitsye ko yabya, nʼabakulu nʼabakabuha esyongubi hakũhĩ nʼomwami; nʼabandu bosĩ bʼekihugo mobatsema, mobabuha esyongubi. Na Atalia mwatulanga esyongimba siwe, mwabirikira, ati, Oluhote! Oluhote!

¹⁵ Neryo Yehoyada omũhererĩ mwahana abakulu bʼamagana abasondolĩ bʼemilondo, mwabwirabo ati, Mũmũhũlũkaye omo katĩkatĩ kʼemilondo; nʼoyukamukwama mũmwĩte omo mũyalĩ. Kusangwa omũhererĩ mwabũga ati, Syĩtĩrawe omo nyũmba eyo.

¹⁶ Neryo mobamuhigulira enzira, naye mwalaba omo nzira esyosabayĩrĩ sikingiriramo omo nyũmba yʼOmwami; neryo mwĩtĩrwaho.

Endagano haguma na Nyamuhanga, nʼerĩkwa lya Baalĩ

¹⁷ Neryo Yehoyada mwayira endagano omo katĩkatĩ kʼOmwami Mukulu nʼomwami nʼabandu, babye bandu bʼOmwami Mukulu; nʼomo katĩkatĩ kʼOmwami nʼabandu nibya.

¹⁸ Nʼabandu bosĩ bʼekihugo mobaya oko nyũmba ya Baalĩ, mobateryayo; mobatulanga ekiherero kyayo nʼesyosanamu syayo mobatsũtsangasyo mo bitswe-bitswe kutsibu, kandi mobĩtĩra omũhererĩ wa Baalĩ, ye Matanĩ, embere syʼekiherero. Nʼomũhererĩ mwahĩra abakulu busana nʼenyũmba yʼOmwami Mukulu.

¹⁹ Kandi mwatwala abakulu bʼamagana, nʼAbakarĩtĩ, nʼabateya, nʼabandu bosĩ bʼekihugo; mobandagalya omwami erĩlũa omo nyũmba yʼOmwami Mukulu, mobasa omo nzira yʼolũkyo lwʼabateya erĩhĩka oko nyũmba yʼOmwami. Naye mwĩkala omo kĩtũmbĩ kyʼabami.

²⁰ Neryo abandu bosĩ bʼekihugo mobatsema, nʼomũyĩ mwatũlera. Na Atalia ĩbamabĩmwĩta omo mũyalĩ hakũhĩ nʼenyũmba yʼOmwami.

²¹ Yoasĩ abya wʼemyaka irinda omugulu atsũka eribya mwami.