1 Yoane 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkĩrĩrya lyetu lĩkakĩnda ekihugo

¹ Oyũkĩkĩrĩraya Yesu kwʼali Kristo, Nyamuhanga abirimubuta, nʼoyo wanzĩre ĩse anzĩre nʼomwana wuwe.

² Tũnasĩ ko twanzĩre abana ba Nyamuhanga, Ũmwʼekĩ tuti, Tukanza Nyamuhanga nʼerikola ebihano biwe.

³ Kusangwa erianza Nyamuhanga ni ʼkwama ebihano biwe, kandi ebihano biwe sĩbĩkalĩre.

⁴ Kusangwa oyũbũtĩrwe na Nyamuhanga akakĩnda ekihugo. Neryo erĩkĩrĩrya lyetu lyo lyabĩrĩkĩnda ekihugo.

⁵ Kandi nindi Oyũkakĩnda ekihugo kwehĩ? Yo nʼoyũkĩkĩrĩraya ko Yesu ni Mugala wa Nyamuhanga.

Erĩtũla omwatsi wa Kristo

⁶ Yesu Kristo yoyo wasa: nĩkwa mwasa omo magetsi nʼomusasi. Mwatasa nʼamagetsi masa, nĩkwa omo magetsi nʼomusasi.

⁷ Kandi nĩ Mũlĩmũ yo yũkatũlago, kusangwa Omũlĩmũ ni wʼekwenene.

⁸ Kusangwa abalangĩrĩ basatu bakatũlago, Omũlĩmũ, nʼamagetsi, nʼomusasi. Nʼabasatu aba bakabũga kiguma.

⁹ Tũkalĩga omwatsi owakatũlawa nʼabandu, nĩkwa erĩtũlago lya Nyamuhanga lĩlabĩre, kusangwa Nyamuhanga yo wabĩrĩtũla omwatsi wʼomugala wuwe.

¹⁰ Oyũkĩkĩrĩraya Omugala wa Nyamuhanga awite erĩtũlago omo mutima wuwe; nʼoyũtĩkĩrĩraya Nyamuhanga, abirimuyira mo mũbehĩ, kusangwa sĩalĩtĩkĩrĩrya omwatsi ogo Nyamuhanga abĩrĩtũla busana nʼomugala wuwe.

¹¹ Nʼomwatsi ogo atũla goyũ: ati, Nyamuhanga abirituha engebe yʼerikota, nʼengebe eyĩ ikabanika omo Mugala wuwe.

¹² Oyuwite Omugala awite engebe, nʼoyutawite Omugala wa Nyamuhanga siawite engebe.

Engebe yʼerikota

¹³ Ngabasakira emyatsi eyĩ, ĩnywe mwĩkĩrĩrye omo lĩna lyʼomugala wa Nyamuhanga, imwatoka eriminya ko muwite engebe yʼerikota.

¹⁴ Ekĩ kikaleka ĩtwasĩka embere sya Nyamuhanga, kusangwa twamabũlya kindu omwʼisonda liwe, akatowa.

¹⁵ Neryo kusangwa tũnasĩ kwʼakatowa, tũnasĩ kandi kwʼakatuha ebyo tũkamũbũlaya.

¹⁶ Omundu amalangira mũlĩkyabo akakola ekibi ekitereta oluholo, angasaba Nyamuhanga, naye asyamuha engebe. Eki kikahula abakakola ekibi ekitereta oluholo. Kandi hali ekibi ekikaleta oluholo; sĩndĩbũga nyiti mwasyasaba busana nʼekibi ekyo.

¹⁷ Ebyosĩ bitatunganene ni kibi, nikwa hali ekibi ekitereta oluholo.

¹⁸ Tũnasĩ omundu oyo Nyamuhanga akabuta, sialikwamirira ebibi. Kusangwa Omugala wa Nyamuhanga akamũtegaya ndeke, nʼomubi Oyũ sĩalimũtũlako.

¹⁹ Kandi tũnasĩ ko tuli ba Nyamuhanga, nʼekihugo kyosĩ kiri omo bũtokĩ bwʼOmubi Oyũ.

²⁰ Nĩkwa tũnasĩ kʼomugala wa Nyamuhanga abĩrĩhĩka, nʼerituha eriminya, itwatoka eriminya Nyamuhanga owʼekwenene. Kandi tumatikene na Nyamuhanga owʼekwenene, kandi tumatikene nʼomugala wuwe Yesu Kristo. Oyũ ni Nyamuhanga wʼekwenene, kandi iye ni ngebe yʼerikota.

²¹ Ĩnywe bana bage, mũyĩtegaye oko syonyamuhanga syʼamabehĩ.