1 Yoane 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Kristo Omũwatĩkya wetu

¹ Ĩnywe, abana bage balere, ngabasakira emyatsi eyĩ, isimwakola ebibi. Nĩkwa omundu amakola ekibi, tuwite Embũyĩ uku Tata, ye Kristo oyutunganene.

² Kandi Kristo ni mbanulo busana nʼebibi byetu, kandi si busana nʼebibi byetu bisa, nĩkwa busana nʼebibi byʼekihugo kyosĩ.

³ Twamateya ebihano bya Nyamuhanga, tukaminya ko tũmwasĩ.

⁴ Omundu amabũga ati, Nyĩnamwasĩ, isialikenga ebihano biwe, oyo nĩ mũbehĩ, kandi sialikwama omwatsi wʼekwenene.

⁵ Nĩkwa omundu oyukakenga ekĩnywa kiwe, kwenene olwanzo luwe busana na Nyamuhanga lwabĩrĩhĩkana. Busana nʼekĩ tũnasĩ ndeke ko tuwatene na Nyamuhanga.

⁶ Nʼoyũkabũga ati awatene na Nyamuhanga, litolere naye inialendera ngoko Kristo alendera.

Ekihano kihya-kihya

⁷ Abanze betu, sindibasakira ekihano kihya-kihya, nĩkwa ni kihano kya kera, ekyo mutula nakyo okwʼĩtsũka. Ekihano kya kera nĩ kĩnywa ekyo mwowa.

⁸ Nĩkwa kandi ekihano ekyo ngabasakira ni kihya-kihya, nʼekwenene yakyo ikalolawako omwisi wa Kristo nʼomwisi wenyũ nibya. Kusangwa omwĩrĩmya akalenga, nʼekyakakala kyʼekwenene kĩnemũkolerya.

⁹ Oyũkabũga ati akalendera omo kyakakala, nĩkwa akakwa mũlĩkyabo yʼobusu anemulendera omo mwĩrĩmya erĩhĩka lino.

¹⁰ Nĩkwa oyo wanzĩre mũlĩkyabo akasiba omo kyakakala, kandi siawite omwatsi owakaleka ogundi mundu iniakola ebibi.

¹¹ Nĩkwa Oyũkakwa mũlĩkyabo yʼobusu, ali omo mwĩrĩmya, kandi akalendera omo mwĩrĩmya, ĩsĩasĩ eyo akaya, kusangwa omwĩrĩmya abirimuyira mo ndĩma-tĩme.

¹² Ngabasakira ĩnywe bana balere, kusangwa ebibi byenyũ byabiribuyirwa busana nʼerĩna lya Kristo.

¹³ Ngabasakira ĩnywe, abotata, kusangwa mũnasĩ oyutula okwʼĩtsũka. Ngabasakira ĩnywe balwana, kusangwa mwabĩrĩkĩnda Omubi Oyo.

¹⁴ Ngabasakira, ĩnywe bana, kusangwa mũnasĩ Tata. Nabiribasakira ĩnywe abotata, kusangwa mũnasĩ oyutula okwʼĩtsũka. Nabiribasakira, ĩnywe balwana, kusangwa muli bʼamaka, nʼekĩnywa kya Nyamuhanga kikasiba omwisi wenyũ. Kandi mwabĩrĩkĩnda Omubi Oyo.

¹⁵ Simwanze ekihugo, kutse emyatsi eyʼekihugo. Omundu amanza ekihugo siawite olwanzo lwa Tata.

¹⁶ Kusangwa ebyosĩ bya muna-kihugo, esyongumbu syʼomubiri, kandi esyongumbu syʼameso, kandi emiyiheko yʼabandu, ebyosĩ ebĩ ni byʼekihugo, sĩbyelũa uku Tata.

¹⁷ Nʼekihugo, nʼesyongumbu syakyo, byasyahwa. Nĩkwa oyukakola erisonda lya Nyamuhanga asyakota kera na kera.

Enzĩgũ ya Kristo

¹⁸ Bana bage, ni mugulu wʼendũlĩ. Mwabĩrĩowa ngoko enzĩgũ ya Kristo yasyasa. Na lino esyonzĩgũ nyingi sya Kristo syabĩrĩhĩka; busana nʼekĩ tũnasĩ kwʼali mugulu wʼendũlĩ.

¹⁹ Abandu aba sibabya bʼũkwʼĩtwe, kyaleka ĩbatũlũako. Kusangwa kumbe babya bʼũkwʼĩtwe, nga babĩrĩsĩgala netu. Nĩkwa mobagenda ikyaminyikala ndeke abosĩ abo ko bate bʼũkwʼĩtwe.

²⁰ Nĩkwa Kristo abĩrĩbũtũlĩra Omũlĩmũ Abũyĩrĩre, neryo mũnasĩ ndeke omwatsi wʼekwenene.

²¹ Sinditabasakira kusangwa sĩmwasĩ omwatsi wʼekwenene, nĩkwa kusangwa mũnasĩgo. Nʼakandi kusangwa mũnasĩ ko hate eribiha erĩkalũa oko mwatsi wʼekwenene.

²² Omũbehĩ nindi kwehĩ? Yo nʼoyukagana Yesu kwʼali Kristo. Enzĩgũ ya Kristo yeyĩ, yo yukagana Tata nʼomugala.

²³ Kusangwa oyukagana Omugala siawite Tata nibya, nʼoyũkalĩga Omugala awite Tata nibya.

²⁴ Neryo ĩnywe, mubike omo mitima yenyũ omwatsi ogo mwowa erĩmbere. Neryo omwatsi ogo mwowa erĩmbere amabya abĩkĩre omo mitima yenyũ, nenyũ mwasyamatikana nʼomugala na Tata.

²⁵ Kandi erilaga eryo Kristo abirituha lyerĩ, ye ngebe yʼerikota.

²⁶ Nabiribasakira emyatsi eyĩ busana nʼabo abakalenga erĩbatalya.

²⁷ Nĩkwa Kristo abĩrĩbũtũlĩra Omũlĩmũ wuwe, naye ĩkere omwisi wenyũ; isimuli nʼobwaga bwʼerĩkangĩrĩrĩbwa nʼomundu. Kusangwa Omũlĩmũ wuwe akabakangĩrĩraya emyatsi yosĩ, nʼemyatsi eyĩ ni kwenene, sĩ yʼamabehĩ. Neryo ngoko abiribakangĩrĩrya erikola, mubye mukamatikana na Kristo.

²⁸ Neryo lino, abana bage balere, mubye mukamatikana na Kristo, neryo itwabya ĩtũnasĩkĩre omugulu asyahuluka, nʼerĩtĩndakwa esĩsonĩ embere siwe oko kiro ekyo asyasa.

²⁹ Mwamabya mũnasĩ Kristo kwʼatunganene, muminye kwʼabosĩ abakakola ebitunganene, babiribya bana ba Nyamuhanga.