1 Timoteo 6 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Abakobe bosĩ baganze abakama babo ngʼabandu batolere erĩsĩkya lyosĩ, neryo erĩna lya Nyamuhanga nʼerĩkangĩrĩrya lyetu sibitsumawe.

² Kandi abawite abakama Bakristo sibaponebo, kusangwa nĩ balĩkyabo. Nĩkwa, litolere ibakolerabo ndeke kwilaba, kusangwa abakabana omugaso wʼomũbĩrĩ wabo ni Bakristo abanzĩre. Ũkangĩrĩraye nʼerihana emyatsi eyĩ.

Erĩkangĩrĩrya lyʼamabehĩ nʼobuteke bwʼekwenene

³ Omundu amaleta erĩkangĩrĩrya lyʼogundi mũsĩndo, ĩsĩalĩrĩga ebĩnywa byʼekwenene byʼomukama wetu Yesu Kristo, kutse erĩkangĩrĩrya erĩkakenga Nyamuhanga,

⁴ omundu oyũ awite omutwe munene, ĩsĩasĩkĩ. Kandi awite omutima wʼobuhaka, nʼerinegena omo bĩnywa, ebikaleta obũha, nʼerigabana, nʼebĩtsũmĩ, nʼerĩganĩrya ibi.

⁵ Kandi bikaleta erinegena omo katĩkatĩ kʼabandu bʼobũlengekanĩa obũtsandĩre, isibakiwite omwatsi wʼekwenene. Bakaganĩraya bati, erikenga Nyamuhanga likaleta endũndĩ yʼebindu.

⁶ Nĩkwa erikenga Nyamuhanga likaleta endũndĩ nene, omundu amabya akatsemera ebyo awite.

⁷ Kusangwa motutasa nʼekindu omo kihugo, kandi sitwendisyatoka eritwala kindu, twalũamo.

⁸ Neryo twamabya nʼakalyo nʼekyʼeriyiswika, tutsemere ebyo.

⁹ Nĩkwa abakayĩtsũtsa eribya bateke bakawa omwʼirengwako, nʼerihambwa omo kitego kyʼesyongumbu nyingi nyĩkĩrũ, esĩkagalaya. Esyongumbu esĩ sĩkatsandaya bandu nʼerĩheryabo.

¹⁰ Kusangwa erianza ebindu likaleta emĩsĩndo yosĩ yʼebibi. Abandi bandu abakasimbirirabyo babirireka erĩkĩrĩrya, babĩrĩyita omo malĩge mangi.

Eritegeka Tĩmoteo

¹¹ Nĩkwa uwe, mundu wa Nyamuhanga, Usage emyatsi yosĩ eyĩ, ukwamirire eritunganene, erikenga Nyamuhanga, erĩkĩrĩrya, olwanzo, erĩsĩka, erihehera.

¹² Uyitsinge omo malwa owene wʼerĩkĩrĩrya, kandi uhambe ndeke engebe yʼerikota eyo Nyamuhanga akubirikirira. Kandi mowakangya ndeke erĩkĩrĩrya lyawe embere syʼabalangĩrĩ bangi.

¹³ Ngakuhana embere sya Nyamuhanga, oyukaha engebe oko byosĩ, kandi embere sya Kristo Yesu, oyo wakanganaya ndeke embere sya Ponto Pilato.

¹⁴ Ngakuhana nyiti, ũtegaye amategeko aya butsira kahinira kutse erigusa, erĩhĩka oko Kiro kyʼeributuka lyʼomukama wetu Yesu Kristo.

¹⁵ Nyamuhanga asyaleta eributuka eryo oko mugulu atolere. Nyamuhanga nĩ mũtabalĩ ĩyowene, oyukapipawa, ni Mwami wʼabami, ni Mukama wʼabakama.

¹⁶ Iye ĩyowene yukakota; kandi ĩkere omo kyakakala ekite kyangahĩkwamo. Sihali mundu oyo wabirimulolako, kandi sihali mundu wangatoka erimulolako. Erĩsĩkya nʼobũtokĩ bwa kera na kera bibye ukwʼiye, Amina.

¹⁷ Uhane abateke abʼebindu bʼekihugo kino sibayiheke, kutse erĩhĩra amaha wabo oko bindu ebyangahwaho. Nĩkwa bahĩre amaha wabo uku Nyamuhanga oyukatuha ndeke-ndeke ebindu byosĩ eritsemerabyo.

¹⁸ Kandi uhanebo uti, bakole ebibuya, babye abateke omo mikolere yowene bahĩtaye ndeke, kandi basangire ebindu byabo nʼabandi.

¹⁹ Litya basyayibikira obuteke obwasyawatĩkyabo omo mugulu owakandisyasa.

Neryo basyabana engebe eyiri ngebe kũndũ.

²⁰ Uwe Tĩmoteo, ũtegaye ndeke ebyo wabirihabwa eribika. Usage ebĩnywa bitya-bitya ebitekenga Nyamuhanga nʼobuhaka bũkĩrũ bʼomwatsi owakahulawa nabi mo menge.

²¹ Abandi bakabũga bati babiribana amenge ayo, nĩkwa babiritala nʼerireka erĩkĩrĩrya.