1 Timoteo 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebyo wangakolera abĩkĩrĩrye

¹ Suhayire omundu mukulu, nĩkwa umulemba-lembe nga tata wawe. Uhane abalwana nga ni bagala benyũ.

² Kandi uhane abakekulu ngʼabokoyo, nʼabakalĩ balere ngʼabali benyũ, igunemuhana nʼomutima ate kwʼebibi.

³ Ukenge abakwakalĩ abali bakwakalĩ kwenene.

⁴ Nĩkwa omũkwakalĩ amabya awite abana kutse abitsikulu, batsũke erirembera abʼenyũmba yabo, omwʼikenga Nyamuhanga nʼerĩswawatĩkya ababũtĩ babo nʼaboso-kulu babo, kusangwa ekĩ kĩkasĩmawa na Nyamuhanga.

⁵ Nĩkwa oyuli mũkwakalĩ kwenene, oyutawite mundu wʼerĩmũwatĩkya, abĩhĩra amaha wuwe uku Nyamuhanga, akakwamirira erisaba nʼerĩmũbũlya erĩmũwatĩkya omo kiro nʼomwʼitungi.

⁶ Nĩkwa omũkwakalĩ oyũkayĩtsemesaya nĩ mũholĩ nomo angabya akineho.

⁷ Neryo uhanebo emyatsi eyĩ, Sibabye bakahulwa nabi.

⁸ Nĩkwa omundu amatendirembera abʼekĩtũnga kiwe, kutse kwilaba abʼenyũmba yiwe, omundu oyo abirigana ekisomo, kandi ni mubi kwilaba oyũtĩkĩrĩrye.

⁹ Sĩmũhĩre omũkwakalĩ okwʼiganza lyʼabakwakalĩ, emyaka yiwe yamatindalaba emyaka makũmĩ ndatu, iniabiribya mũkalĩ wʼomundu muguma.

¹⁰ Kandi abye ĩnĩakũmayĩre busana nʼemĩbĩrĩ yowene; landi amabya oyo wabĩrĩkũlya abana bo ndeke, kandi amabya ĩnĩabĩrĩkokya abagenĩ bʼehali, kutse ĩnĩabĩrĩnabya ebisando byʼabandu ba Nyamuhanga, kandi amabya abĩrĩwatĩkya abali omo bũlĩge, kandi amabya abiriyiha erikola obuli mũbĩrĩ owene.

¹¹ Nĩkwa ugane erihandika abakwakalĩ balere, kusangwa omugulu bakakwa esyongumbu esikaleka ibanza eriheruka, neryo bakaleka Kristo.

¹² Neryo bakaya oko lubanza, kusangwa babĩrĩtwa erilaga lyabo lyʼerĩmbere.

¹³ Kandi bakabegera erigala-ganda nʼerirendera-lendera omo manyũmba wʼabandu. Kandi butsira erigala-ganda lisa, nĩkwa bakabya mbandanganĩa, nʼerĩyĩhĩra omo myatsi yʼabandi, ĩbakabũga emyatsi eyitatolere.

¹⁴ Neryo ĩngye nyanzĩre abakwakalĩ balere ibaheruka, babute abana, bategeke amanyũmba wabo, sibahe esyonzĩgũ syetu omwanya wʼeritwahula nabi.

¹⁵ Kusangwa abandi bakwakalĩ babiritswa nʼerikwama Satanĩ.

¹⁶ Kandi omũkalĩ kutse omulume oyuli Mukristo, amabya awite abakwakalĩ omo nyũmba yiwe, alemberebo, sĩalũhaye ekanĩsa, neryo ekanĩsa itoke erirembera abakwakalĩ abatawite ekyʼerĩwatĩkyabo.

¹⁷ Abakulu abakasondola ndeke baganzawe ngʼabatolere erihembwa kabiri. Kandi kwilaba aho, abakulu abakakola kutsibu omo mũbĩrĩ wʼerĩtũla Engulu Yowene, nʼerĩkangĩrĩrya bandu.

¹⁸ Kusangwa Amasako ati, Simusyeboha obuno bwʼenume yʼende omugulu ĩkahũmba engano. Kandi ati, Omũhĩngĩ atolere obũhĩngĩ buwe.

¹⁹ Sũlĩge eritsongera busana nʼomukulu ahate abalangĩrĩ babiri kutse basatu.

²⁰ Abakakola ebibi ukungebo embere syʼabandu bosĩ, abandi nabo batoke eriubaha.

²¹ Ngakuhana embere sya Nyamuhanga, nʼembere sya Kristo Yesu, nʼembere syʼabamalaĩka abo ayisoga nyiti, Ukwame amategeko aya, sutswere ute watondesya, kandi sũlebaye ndi nandi.

²² Siwanguhe erĩhĩra ebyala oko mundu busana nʼomũbĩrĩ wʼOmukama. Kandi susangire ebibi byʼabandi, nĩkwa Ũyĩtegaye eribya nʼomutima ate kwʼebibi.

²³ Sũpũlaye amagetsi masa, nĩkwa wĩmaye ebĩnyũ bike busana nʼendwala yʼenda yawe, kusangwa Wabere ukalwalalwala.

²⁴ Ebibi byʼabandi bandu biminyikere ndeke, kandi bikatangabo okwʼitswera lyabo; nʼabandi, ebibi byabo bikaminyikala enyũma.

²⁵ Kandi litya emĩbĩrĩ yowene ikaminyikala ndeke. Nʼemĩbĩrĩ eyĩtowene siritoka erĩbĩswa.