1 Timoteo 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩramya lyʼekanĩsa

¹ Neryo ngatsũka eribahatikana nyiti, Eriremba-lemba, nʼerisaba, nʼerĩbũlya, nʼeriha ewasĩngya, bikolawe embere sya Nyamuhanga, busana nʼabandu bosĩ.

² Kandi busana nʼabami, nʼabandi bosĩ abakatabala, tutoke erisiba buholo butsira mwaga, itukakenga Nyamuhanga, nʼeriyitondeka ndeke.

³ Ekĩ ni kibuya, kandi kĩkatsemesaya Nyamuhanga Omũlamya wetu,

⁴ oyo wanzĩre abandu bosĩ balamĩbawe, nʼeriminya ndeke omwatsi wʼekwenene.

⁵ Kusangwa hali Nyamuhanga muguma, nʼOmũsanganĩa muguma, oyũkasanganaya Nyamuhanga nʼabandu, omundu oyo ni Kristo Yesu,

⁶ oyo wayiha busana nʼerĩtongolya abandu bosĩ. Neryo ekyo akola nĩ kĩmĩnyĩsyo oko mugulu atolere ngoko Nyamuhanga anzĩre abandu bosĩ ĩbalamĩbwa.

⁷ Busana nʼomwatsi oyũ, natumawa eribya Omũgambũlĩ, nʼomukwenda, nʼOmũkangĩrĩrya wʼebihanda babane erĩkĩrĩrya nʼeriminya omwatsi wʼekwenene. Sindibiha, ngabũga kwenene.

⁸ Neryo ngasonda abalume ehosĩ basabe, abalume ababiriyiha uku Nyamuhanga ibakasumba ebyala byabo erisaba, butsira erihitana kutse obuhaka.

⁹ Kandi nyanzĩre abakalĩ nabo bambale esyongimba esitolerebo, nʼerĩyĩteya omo mwatsi wʼerĩyĩsũga. Kandi erĩyĩsũga lyabo siribye eriluka esyonzwiri syo muhanda, kutse erĩyĩsũga eryʼesyamagetsi, kutse eryʼesyolulu, kutse esyongimba syʼobũgũlĩ bunene.

¹⁰ Nĩkwa babye nʼemikolere mibuya, eyitolere abakalĩ abakayahula mo bandu abakakenga Nyamuhanga.

¹¹ Abakalĩ bangiga omo bũkũtũ-kũtũ ibakayolobeka.

¹² Kandi sĩndĩrĩga omũkalĩ akakangĩrĩrya kutse eribya nʼehamũlĩ oko balume, nĩkwa babye bũkũtũ.

¹³ Kusangwa Adamu yo watsũka erihangikwa, nʼenyũma wʼaho Hawa.

¹⁴ Kandi Adamu mwatatebĩbwa, nĩkwa omũkalĩ yo watebĩbawa, yo wahalaya.

¹⁵ Nĩkwa omũkalĩ asyalamĩbwa omwʼibuta bana, amakwamirira omwʼĩkĩrĩrya nʼolwanzo, nʼeriyihigula, kandi omwʼĩteya.