1 Samwelĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Abagala ba Samwelĩ bakakola ebibi

¹ Neryo Samwelĩ abere abibya mũsyakulu, mwahĩra abagala buwe mo batswerĩ oko Baĩsraelĩ.

² Nĩkwa erĩna lyʼakambere kuwe lyabya Yoelĩ; nʼerĩna lyʼowʼakabiri wuwe, iyo Abĩa. Mobabya batswerĩ eBerĩ-seba.

³ Nʼabagala buwe mobatakwama emibere yiwe, nĩkwa mobakita erisonda ebindu, mobĩmya esigulo, mobahengemya erĩbanza.

Abaĩsraelĩ bakayisondera omwami

⁴ Neryo abakulu bosĩ bʼAbaĩsraelĩ mobayĩhĩndanĩa haguma, mobahĩka uku Samwelĩ eRama.

⁵ Mobamubwira bati, Lebaya, wabirikula, nʼabagala bawe sibetakwama emibere yawe; lino ũtũhĩrĩre hʼOmwami wʼeritutswera ngʼebindi bihanda.

⁶ Nĩkwa omwatsi oyo mwabya mubi uku Samwelĩ, omugulu babũga bati, Utuhe omwami atutswere. Na Samwelĩ mwasaba Omwami Mukulu.

⁷ NʼOmwami Mukulu mwabwira Samwelĩ ati, Uhulikirire omulenge wʼabandu omo byosĩ bakakubwira; kusangwa uwe bategana, nĩkwa ĩngye bakagana, bati sinyibye mwami wabo.

⁸ Ngʼemĩbĩrĩ yosĩ babirikola erĩtsũka ekiro nalũsayabo eMĩsĩrĩ erĩhĩka ekiro kino, ĩbakanyĩsĩganaya eriyakolera esindi nyamuhanga, ko bakakukola batya nibya.

⁹ Neryo uhulikirire omulenge wabo; nĩkwa ukungebo ndeke, nʼerĩkangyabo omuhanda wʼOmwami oyo wasyatabalirabo.

¹⁰ Na Samwelĩ mwabwira bandu abamusaba omwami ebĩnywa byosĩ byʼOmwami Mukulu.

¹¹ Neryo mwabũga ati, Eyĩ yo yikandisyabya mibere yʼOmwami oyo wasyabatabalako. Asyĩmya abagala benyũ, nʼerĩyĩhĩrĩrabo ewuwe, busana nʼesyogalĩ siwe, nʼeribya abakagenda oko sabayĩrĩ siwe; nabo basyatibita embere syʼesyogalĩ siwe.

¹² Kandi asyayĩhĩrĩrabo mo basondolĩ bʼamaelfu nʼabasondolĩ bʼoko makũmĩ atanu; kandi eririma malima wuwe, nʼerigesa amagese wuwe, nʼerĩkokotya ebindu biwe byʼamalwa, nʼebindu byʼesyogalĩ siwe.

¹³ Kandi asyĩmya abali benyũ eribya abakenga amagũta awakakumba ndeke, nʼeribya bahũkĩ, nʼabatsũmbĩ bʼobundu.

¹⁴ Kandi asyĩmya amalima wenyũ, nʼamalima wenyũ wʼebĩnyũ, nʼamalima wenyũ wʼemĩzeĩtũnĩ, agowene wa kugo, iniahago abagombe buwe.

¹⁵ Kandi asyĩmya ekiguma kyʼerĩkũmĩ kyʼembuto yenyũ, nʼekyʼamalima wenyũ wʼebĩnyũ, nʼerihakyo oko bĩmanĩrĩ buwe, nʼoko bagombe buwe.

¹⁶ Kandi asyĩmya abagombe benyũ bʼobulume, nʼabagombe benyũ bʼobũkalĩ, nʼabalwana benyũ abowene ndeke, nʼesyopunda syenyũ, nʼerĩhĩrasyo oko mũbĩrĩ wuwe.

¹⁷ Asyĩmya ekiguma kyʼerĩkũmĩ omo bihangulo byenyũ; nenyũ mwasyabya bagombe buwe.

¹⁸ Kandi mwasyalaka oko kiro ekyo busana nʼomwami wenyũ oyo mwayisoga; nʼOmwami Mukulu sĩendĩsyabasũbĩrya oko kiro ekyo.

¹⁹ Nĩkwa abandu mobagana erihulikirira omulenge wa Samwelĩ; bati, Iyihi, nĩkwa twanzĩre omwami busana netu,

²⁰ tutoke eribya ngʼebindi bihanda, nʼomwami wetu atoke eritutswera, nʼerigenda embere syetu, nʼeritulwira amalwa wetu.

²¹ Na Samwelĩ mowa ebĩnywa byosĩ byʼabandu, kandi mwakanĩryabyo omo matwĩ wʼOmwami Mukulu.

²² NʼOmwami Mukulu mwabwira Samwelĩ, ati, Uhulikirire omulenge wabo, ũhĩre kubo kʼOmwami. Neryo Samwelĩ mwabwira abalume ba Ĩsraelĩ, ati, Mugende, obuli mundu oko mũyĩ wuwe.