1 Samwelĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsandũko lya Nyamuhanga likasuba aho walyo haguma nʼolũsũnzo

¹ Nʼerĩsandũko lyʼomukama Mukulu molyabya omo kihugo kyʼAbafĩlĩstĩnĩ emikera irinda.

² NʼAbafĩlĩstĩnĩ mobabirikira abahererĩ nʼabalagũlĩ, bati, Twasyakolakĩ nʼerĩsandũko lyʼOmwami Mukulu kwehĩ? Mũtũkangaye ngoko twangasũbyalyo aho walyo.

³ Neryo mobabũga bati, Mwamasũbũlya erĩsandũko lya Nyamuhanga wʼAbaĩsraelĩ, sĩmũsũbũlayeryo busa; nĩkwa kwenene mũsũbũlayeryo nʼobuhere bwʼolubanza; neryo mwasyalamĩbwa, kandi mwasyamĩnyĩsĩbwa nga busana nakĩ ebyala biwe sibyetabalũako.

⁴ Neryo mobabũga bati, Obuhere bwʼolubanza bwasyabyakĩ obo twasyamũsũbũlĩrya kwehĩ? Neryo mobabũga bati, Ebihute bitanu byʼesyamagetsi, nʼesyombũkũlĩ ĩtanu syʼesyamagetsi ngʼemiganzo yʼabakama bʼAbafĩlĩstĩnĩ; kusangwa ekĩhũnzo kiguma mokyabya ũkwʼĩnywe bosĩ, nʼoko bakama benyũ.

⁵ Neryo mwasyakokotya ebĩsosekanĩo byʼebihute byenyũ, nʼebĩsosekanĩo byʼesyombeba syenyũ esĩkaheraya ekihugo; kandi mwasyaha olukengerwa uku Nyamuhanga wa Ĩsraelĩ; mbino asyangũhya ebyala biwe ũkwʼĩnywe, nʼoko nyamuhanga syenyũ, nʼoko kihugo kyenyũ.

⁶ Neryo busana nakĩ mũkakalaya emitima yenyũ kwehĩ? Ngoko Abanya Mĩsĩrĩ na Farao bakalaya emitima yabo. Omugulu akala kutsibu kubo, mobatahamula abandu erigenda kwehĩ? Nabo mobagenda.

⁷ Neryo lino mũyĩkokoteraye egalĩ nyihya, nʼesyonde ĩbĩrĩ esikakamawa, esitesyaya ko ngomo; kandi mubohere egalĩ yʼoko nde esyo, mũlũsaye ebyana byo kusyo eriretabyo eka.

⁸ Neryo mutwale erĩsandũko lyʼOmwami Mukulu mũhĩreryo oko galĩ; kandi mũhĩre ebindu ebyo byʼesyamagetsi, omo kasandũko oko mũsĩke walyo ebyo mũkamũsũbũlĩraya mo buhere bwʼolubanza; mutumeyo igende.

⁹ Neryo mulangire, yamahetuka omo nzira yʼomutano wayo eBetĩ-semesĩ, inina ye watukolera ekibi kinene ekĩ; nĩkwa bite bitya itwaminya isi bye byala biwe byatwĩta; ĩbyatũbũlĩkĩranaya.

¹⁰ Nʼabandu abo mobakola batya, mobĩmya esyonde ĩbĩrĩ esikakamawa, mobabohera kusyo kwʼegalĩ, kandi mobakingira ebyana byasyo byʼeka.

¹¹ Neryo mobahĩra erĩsandũko lyʼOmwami Mukulu oko galĩ, nʼakasandũko akali mwʼesyombeba syʼesyamagetsi nʼebĩsosekanĩo byʼebihute byabo.

¹² Nʼesyonde mosyĩmya enzira itunganene omo nzira yʼeriya eBetĩ-semesĩ; mosyakwama enzira nene, isinemwama sikagenda, mositakitira oko mali kutse oko malembe nʼabakama bʼAbafĩlĩstĩnĩ mobakwamasyo erĩhĩka oko mutano wʼeBetĩ-semesĩ.

¹³ Neryo abandu bʼeBetĩ-semesĩ ibakagesa engano yabo omo musya; mobasumba ameso wabo, mobalangira erĩsandũko, mobatsema erilangiralyo.

¹⁴ Nʼegalĩ moyahĩka omwʼirima lya Yosũa Omũbetĩ-semesĩ, moyimanaho, ahabya erĩbwe ĩnene. Nabo mobatulanga emiti yʼegalĩ, mobahera esyonde eribya buhere bwʼerĩokererya oko Mwami Mukulu.

¹⁵ Kandi Abalawĩ mobakĩmya erĩsandũko lyʼOmwami Mukulu, nʼakasandũko ako haguma nalyo, akahĩrawa mwʼebindu byʼesyamagetsi kandi mobahĩrabyo okwʼĩbwe ĩnene eryo. Nʼabandu bʼeBetĩ-semesĩ mobahera amahere wʼerĩokererya mobakera amahere ekiro ekyo oko Mwami Mukulu.

¹⁶ Neryo abakama batanu bʼAbafĩlĩstĩnĩ babere babilangira ekyo, mobasuba eEkronĩ ekiro ekyo.

¹⁷ Nʼebĩ ni bihute byʼesyamagetsi ebyo Abafĩlĩstĩnĩ basũbũlaya busana nʼobuhere bwʼolubanza oko Mwami Mukulu. Omuguma busana nʼeAsdodĩ, omuguma busana nʼeGaza, omuguma busana nʼeAskelonĩ, omuguma busana nʼeGatĩ, omuguma busana nʼeEkronĩ;

¹⁸ nʼesyombeba syʼesyamagetsi ngʼemiganzo yʼemĩyĩ yosĩ yʼAbafĩlĩstĩnĩ eyabya yʼabakama batanu, ye mĩyĩ yikongotere nʼeyʼehĩyĩ hyʼokolĩ. Erĩbwe ĩnene aho bahĩra erĩsandũko lyʼOmwami Mukulu, nĩ mũlangĩrĩ erĩhĩka mũnabwĩre omwʼirima lya Yosũa Omũbetĩ-semesĩ.

Nyamuhanga akĩta Ababetĩ-semesĩ busana nʼerikengemerera omo sandũkũ

¹⁹ Kandi mwĩta abandu bʼeBetĩsemesĩ, kusangwa mobakengemerera omwʼĩsandũko lyʼOmwami Mukulu, mwĩta bandu makũmĩ alinda (70), nʼabandu mobalira, kusangwa Omwami Mukulu ĩnĩabĩrĩta abandu bangi.

²⁰ Kandi abandu bʼeBetĩ-semesĩ mobabũga, bati, Nindi wangatoka erihangana embere syʼOmwami Mukulu, Nyamuhanga oyũbũyĩrĩre kwehĩ? Kandi asyahetukira ukundi akalũa kwĩtwe kwehĩ?

²¹ Neryo mobatuma bakwenda oko syondũlanĩ syʼeKĩrĩatĩ-yearĩmũ, bati, Abafĩlĩstĩnĩ babĩrĩsũbũlya erĩsandũko lyʼOmwami Mukulu; mwandagale, mũhetũkĩrayeryo ewenyũ.