1 Samwelĩ 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsandũko lya Nyamuhanga lĩkagalaya Abafĩlĩstĩnĩ

¹ NʼAbafĩlĩstĩnĩ babya ibamabitwala erĩsandũko lya Nyamuhanga, mobatwalalyo eAsdodĩ bakalũsyalyo eEbenĩezerĩ.

² NʼAbafĩlĩstĩnĩ mobatwala erĩsandũko lya Nyamuhanga, mobatwalalyo omo nyũmba yʼesanamu ya Dagonĩ, mobasingikalyo oko mũsĩke wa Dagonĩ.

³ Kandi omugulu Abaasdodĩ babuka omo ngyakya-ngyakya, lebaya, Dagonĩ abiriwa ahisi oko bũsũ buwe embere syʼerĩsandũko lyʼOmwami Mukulu. Neryo mobĩmya Dagonĩ mobamusingika aho wuwe kandi.

⁴ Nʼomugulu babuka omo ngyakya-ngyakya yʼaho, lebaya, Dagonĩ abiriwira oko bũsũ oko kitaka embere syʼerĩsandũko lyʼOmwami Mukulu; nʼomutwe wa Dagonĩ, nʼebiganza bibiri byosĩ ĩbyabĩrĩtwĩkĩraho oko kisayi kyʼolũkyo; na Dagonĩ ĩnĩabĩrĩsĩgala mo kahindiyiri kasa.

⁵ Busana nʼekyo, abahererĩ ba Dagonĩ, kutse mundundi ukingira omo nyũmba ya Dagonĩ, siberyata oko kisayi kyʼolũkyo lwa Dagonĩ eAsdodĩ erĩhĩka mũnabwĩre.

⁶ Nĩkwa ebyala byʼOmwami Mukulu mobyalĩtohera Abaasdodĩ, naye mwaheryabo, mwĩtabo omo bihute, eAsdodĩ nʼemitano yayo.

⁷ Nʼomugulu abandu bʼeAsdodĩ balangira ebyabere, mobabũga bati, Erĩsandũko lyʼOmwami Mukulu Sĩryendĩsyĩkala netu; kusangwa ebyala biwe byamakala ũkwʼĩtwe, nʼuku Dagonĩ nyamuhanga wetu.

⁸ Neryo mobatumirana erĩhĩndanĩa abakama bosĩ bʼAbafĩlĩstĩnĩ aho bali, bati, Tukolekĩ nʼerĩsandũko lya Nyamuhanga wʼAbaĩsraelĩ kwehĩ? Nabo mobasũbĩrya bati, Erĩsandũko lya Nyamuhanga wʼAbaĩsraelĩ litwalawe eGatĩ. Neryo mobatwala erĩsandũko lya Nyamuhanga wʼAbaĩsraelĩ eyo.

⁹ Neryo babere babitwalalyo, ebyala byʼOmwami Mukulu mobyalwa nʼomũyĩ oyo omo bũlĩge bunene. Kandi mwĩta abalume bʼomũyĩ oyo, abana nʼabakulu; mobalasa kwʼebihute.

¹⁰ Kyaleka ibatuma erĩsandũko lya Nyamuhanga eEkronĩ. Neryo omugulu erĩsandũko lya Nyamuhanga lyahĩka eEkronĩ, Abaekronĩ mobalaka, bati, Bamatuletera erĩsandũko lya Nyamuhanga wʼAbaĩsraelĩ, erĩtwĩta nʼabandu betu.

¹¹ Busana nʼekyo mobatuma erĩyahĩndanĩa abakama bosĩ bʼAbafĩlĩstĩnĩ, kandi mobabũga bati, Mutume erĩsandũko lya Nyamuhanga wa Ĩsraelĩ lyʼerya, lisube kandi aho walyo, lĩkasyatwĩta, nʼabandu betu; kusangwa habiribya omwaga wʼoluholo omo mũyĩ gosĩ; ebyala bya Nyamuhanga mobyakala eyo.

¹² Nʼabandu abatahola mobalasa kwʼebihute nʼekiriro kyʼomũyĩ mokyahetukira elubula.