1 Samwelĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Abafĩlĩstĩnĩ bakakĩnda Abaĩsraelĩ nʼeriheka erĩsandũko

¹ Nʼekĩnywa kya Samwelĩ mokyahĩka oko Baĩsraelĩ bosĩ. NʼAbaĩsraelĩ mobayalwa nʼAbafĩlĩstĩnĩ, mobahanda ekilaliriro emũsĩke wʼeEbenĩ-ezerĩ, nʼAbafĩlĩstĩnĩ mobahanda ekilaliriro eAfekĩ.

² NʼAbafĩlĩstĩnĩ mobayitondeka erilwa nʼAbaĩsraelĩ; neryo omugulu bayalwa, Abaĩsraelĩ mobakĩndwa embere syʼAbafĩlĩstĩnĩ; mobĩta abandu ba Ĩsraelĩ elfu ĩnĩ (4,000) aho balwira.

³ Nʼomugulu abandu bahĩka oko kilaliriro, abakulu bʼAbaĩsraelĩ mobabũga bati, Busana nakĩ Omwami Mukulu abĩrĩtwĩtĩra embere syʼAbafĩlĩstĩnĩ kwehĩ? Twende erĩsandũko lyʼerilagana lyʼOmwami Mukulu eSĩlo busana netu, ĩryahĩka omo katĩkatĩ ketu, nʼerĩtũlamya omo byala byʼesyonzĩgũ syetu.

⁴ Neryo mobatuma abandu eSĩlo; mobalũsyayo erĩsandũko lyʼerilagana lyʼOmwami Mukulu wʼemilondo, oyo wĩkere endata oko makerũbĩ. Nʼabagala babiri ba Elĩ, Hofũnĩ na Fĩnehasĩ, babyayo haguma nʼerĩsandũko lyʼerilagana lyʼOmwami Mukulu.

⁵ Nʼomugulu erĩsandũko lyʼendagane yʼOmwami Mukulu lyahĩka omo kilaliriro, Abaĩsraelĩ bosĩ mobũta obogo, kyaleka ekihugo ĩkyasũkana.

⁶ Nʼomugulu Abafĩlĩstĩnĩ bowa omulenge wʼolukanda, mobabũga bati, Olukanda nʼobogo bunene obũ omo kilaliriro kyʼAbaebrania nĩ bwakĩ kwehĩ? Neryo mobaminya ngoko erĩsandũko lyʼOmwami Mukulu lyamahĩka omo kilaliriro.

⁷ Kandi Abafĩlĩstĩnĩ mobubaha, kusangwa bati, Nyamuhanga amahĩka omo kilaliriro. Mobabũga bati, Obũlĩge kwĩtwe! Kusangwa omwatsi owali ngʼoyũ sialiatabya.

⁸ Obũlĩge kwĩtwe! Nindi wasyatũlamya omo byala byʼesyonyamuhanga syʼamaka esĩ kwehĩ? Esĩ sye yĩsyonyamuhanga esĩta Abamĩsĩrĩ omo mĩsĩndo yosĩ yʼebĩhũnze omo mbwarara.

⁹ Mubye nʼamaka, mubye ngʼabalume, ĩnywe Bafĩlĩstĩnĩ, imutabya bakobe bʼAbaebrania ngoko babya benyũ; mubye ngʼabalume, mulwe.

¹⁰ NʼAbafĩlĩstĩnĩ mobalwa, nʼAbaĩsraelĩ mobasĩngwa mobatibita obuli mundu omo hema yiwe; kandi mohabya erĩkwa ĩnene; kusangwa oko Baĩsraelĩ mohawa bandu elfu makũmĩ asatu (30,000) abakagenda omo bisando.

¹¹ Nʼerĩsandũko lya Nyamuhanga molyanyegwa; nʼabagala babiri ba Elĩ, ye Hofũnĩ na Fĩnehasĩ, mobahola.

Erihola lya Elĩ na mwalĩana wuwe

¹² Neryo omundu wa Benyamĩna mwatibita akalũa omo mulondo, mwahĩka eSĩlo ekiro ekyo kisa-kisa, nʼesyongimba siwe ĩsĩsatangĩrye nʼolũtũtũ oko mutwe wuwe.

¹³ Nʼomugulu ahĩka, Elĩ abya ĩkere oko kĩtũmbĩ kiwe oko mũsĩke wʼenzira akalebya; kusangwa omutima wuwe mwatitimana busana nʼerĩsandũko lya Nyamuhanga. Nʼomugulu omundu oyo ahĩka omo mũyĩ, erĩtũlago, omũyĩ gosĩ mwalaka.

¹⁴ Nʼomugulu Elĩ owa omulenge wʼekiriro, mwabũlya ati, Olukanda lʼobogo olũ nĩ lwakĩ kwehĩ? Nʼomundu oyo mwanguha, mwasa eribwira Elĩ.

¹⁵ Nĩkwa Elĩ abya wʼemyaka makũmĩ mwenda nʼomunani; nʼameso wuwe ĩnĩabĩrĩrĩbana, isiakitoka erilangira.

¹⁶ Nʼomundu oyo mwabwira Elĩ ati, Nĩna ngye ndĩalũa omo mulondo wʼamalwa. Kwenene indiatibita ngabala omo mulondo wʼamalwa mũnabwĩre. Neryo Elĩ mwabũga ati, Ko mwatsi abere ati mugala wage?

¹⁷ Nʼoyo waleta engulu eyo mwasũbya ati, Abaĩsraelĩ babirisaga Abafĩlĩstĩnĩ, kandi habiribya erĩkwa ĩnene omo katĩkatĩ kʼabandu, nʼabagala bawe babiri nibya, ye Hofũnĩ na Fĩnehasĩ, baholĩre, nʼerĩsandũko lya Nyamuhanga lyabirinyegwa.

¹⁸ Neryo omugulu ahula erĩsandũko lya Nyamuhanga, Elĩ mwawa bũnyũma-nyũma oko kĩtũmbĩ kiwe oko mũsĩke wʼolũkyo; nʼebĩkya biwe mobyatwĩka, neryo mwahola, kusangwa abya mũsyakulu, ĩnĩalĩtohĩre. Naye mwatswera Abaĩsraelĩ emyaka makũmĩ ani.

¹⁹ Na mwalyana wuwe, mũka Fĩnehasĩ, abya mukule, hakũhĩ nʼeributa; nʼomugulu owa esyongulu syʼerinyegwa lyʼerĩsandũko lya Nyamuhanga, kandi ngoko ĩse-byala wuwe nʼĩba wuwe babirihola, mũnama, mwabuta; kusangwa amalũmĩ ĩnĩabĩrĩmũhĩkako.

²⁰ Neryo oko mugulu wʼerihola liwe, abakalĩ abahangana hakũhĩ, mobamubwira bati, Sigubahe, kusangwa wabiributa mugala. Nĩkwa mwatasũbĩryabo, kutse mwatahĩra hʼomutima.

²¹ Kandi mwaluka omwana mo Ĩkabodĩ, kiti, Olukengerwa lwabĩrĩlũa omo Ĩsraelĩ; kusangwa erĩsandũko lya Nyamuhanga lyabirinyegwa, na busana nʼĩse-byala wuwe nʼĩba wuwe.

²² Neryo mwabũga ati, Olukengerwa lwabĩrĩlũa omo Ĩsraelĩ; kusangwa erĩsandũko lya Nyamuhanga lyabirinyegwa.